Read Bibliya Yera 1951 Yesaya 22 Bible Online

Yesaya 22 - Bibliya Yera 1951 bible

Yesaya 22

¹Imbūri yo ku kiyaya c’ ukwerekwa. Noneh’ ubaye ute, abantu bawe bose ko būriye ku mazu hejuru?

²Wewe wuzuye urwamo, wa murwa w’imivurungano, wa gisagara cihaya, abishwe bo mu bawe kw atar’ abishwe n’inkota, kandi ntibagwe mu rugamba!

³Abākuganza bose ko bahungiye hamwe, bagafatanwa imiheto, kand’ abahizi bawe bose bakaba bafatiwe mpiri hamwe, naho bāri bahungiye kure!

⁴Kubg’ ivyo ndavuga, nti Ni murābe irya, munkūrekw amaso, mureke ndire nitunturire; ntimwigore ngo muranyirura umubabaro mfitiye ukunyagwa kw’i Yerusalemu umukobga w’ubgoko bgacu;

⁵kukw ar’ umusi w’ubgihebure n’ugusiribangwa n’ukuzazanirwa, uvuye ku Mwami, Uhoraho Nyen’ ingabo, mu kiyaya co kwerekwa; hariho gusangangura inzitiro z’amabuye, n’ amaruru ashika ku misozi miremire.

⁶Abelamu bapfukūye imitana, Abaramu baje bagendera ku mafarasi, kand’ ab’i Kiri basokoroye inkinzo.

⁷Maze mu biyaya vyawe vyiza‐vyiza huzuramw’ imikogote, kand’ abagendera ku mafarasi batonda urugamba kw irembo ry’igisagara.

⁸Agukūrakw igitwikirizo, yewe Yuda, ng’ uve i marwi; maz’ uwo musi ujarajara ibirwanishwa vyo mu nzu yitwa iy’ Ikibira.[7]

⁹Mubona ibirengero vy’ibizitiriye umurwa wa Dawidi kw ari vyinshi; mugomera amazi yo mu kidengeri co hepfo.

¹⁰Muharūra amazu y’i Yerusalemu, amazu muyasambura kugira ngo mukomeze uruzitiro.

¹¹Amazi yo mu kidengeri ca kera muyacira urugomero hagati y’inzitiro zompi: ariko ntimwasubiza ijisho ku wari yarakoze ivyo, kandi ntimwashira umutima ku wabiremye kera cane.

¹²Kur’ uwo musi Umwami Uhoraho Nyen’ ingabo yahamagariye abantu kwiririra no kwiborogera no kwimosha inkomvorera no gukenyera amagunira:

¹³yamara bashiraho kwinezereza no guhimbarwa, kubāga inka no kubāga intama, kurya inyama no kunywa vino: bati Ngo twīrīre, twinywere, kukw ejo tuzopfa.

¹⁴Maz’ Uhoraho Nyen’ ingabo yihishurira mu matwi yanje, arambgira, ati N’ukuri, ivyo bigabitanyo ntimuzopfa muvyogejwe ngo bibaveko, ni k’Umwami Uhoraho Nyen’ ingabo agize.

¹⁵Uku ni k’Umwami Uhoraho Nyen’ ingabo agize: ati Genda kuri wa mubgiriza Shebuna, ari we muzezwarugo, umubaze,

¹⁶ut’ Urakora iki ngaho? uti Kand’ uri kumwe na nde ngaho ko wiyimbiye imva aho nyene? uti Ko wiyimbiye imva ahahera ruguru, ukībāzira ubugaramango mu gitandara!

¹⁷Uti Rāba, Uhoraho azogushiburana inkomezi ugwe kure, wa munyagakēngērwe we, mber’ azokuzingazinga rwose!

¹⁸Uti N’ukuri azokugira itu, akuraririze nk’ umupira, ugwe mu gihugu cāgutse; ut’ Aho ni ho uzogwa, kandi ni ho imikogote yawe y’icubahiro izogangarara, wa gatētereza k’inzu ya shobuja.

¹⁹Nzokunyaga ububgiriza bgawe, kand’ uzosubizwa hasi ukūrwe mu bukuru bgawe.

²⁰Kur’ uwo musi nzohamagara umusavyi wanje Eliyakimu mwene Hilukiya,

²¹mmwambike umwambaro wawe, mmukenyeze umukanda wawe, mmushikirize ubutware bgawe; kand’ ababa i Yerusalemu n’ab’ inzu ya Yuda azobabera se.

²²Kand’ urupfunguzo rw’inzu ya Dawidi nzorushira ku bitugu vyiwe; kand’ azokwugurura ntihagire uwugara, azokwugara ntihagire uwugurura.

²³Nzomushimangira nk’umusumari ahantu hagumye, azobera inzu ya se intebe y’icubahiro.

²⁴Maze bazomusakārakw icubahiro cose c’inzu ya se, bene wabo n’ibiryango‐ryango, akabumbano kose gato, uhereye ku tubumbano tw’utwavya ugashitsa ku tubumbano tw’utubindi.

²⁵Kur’ uwo musi, ni k’Uhoraho Nyen’ ingabo agize, uwo musumari washimangiwe ahantu hagumye uzoshingūka; kand’ uzogazagurwa ukoroke, n’ibiremereye vyari kuri wo bizomenagurika; kuk’ Uhoraho abivuze.