Read Bibliya Yera 1951 Yesaya 24 Bible Online

Yesaya 24 - Bibliya Yera 1951 bible

Yesaya 24

¹Rāba Uhoraho agira ngw ahindure isi umusaka, ayigire amatongo, ayūbike, asanzaze abayibamwo.

²Maz’ ibizoba ku bantu buntu bizoba no ku muherezi; ibizoba ku mushumba bizoba no kuri shebuja; ibizoba ku mukobga w’umuja bizoba no kuri inabuja; ibizoba ku muguzi bizoba no k’ūshōra; ibizoba k’ūtiza bizoba no k’ūtira; ibizoba k’uwaka inyungu bizoba no k’uwakwa inyungu.

³Isi izohinduka umusaka inyagwe rwose; kuk’ Uhoraho ari we avuze iryo jambo.

⁴Igihugu kiriganyira, kirakabiranye; isi irahondobereye, irakabiranye, abakuru bo mw isi barahondobereye.

⁵Kand’ isi ihumanijwe n’abayibamwo; kuko barenze ivyagezwe, bagaca mw ibgirizwa, bakica isezerano ry’ intahava.

⁶Ni co catumye umuvumo utongora isi, kand’ abayibamwo ni vyo bahōwe: ni co catumye ababa mw isi baturirwa, hagasigara abantu b’imparūrwa.

⁷Umutobe wa vino uriganyira, uruzabibu rurahondobereye, ab’ umutima w’umunezero bose bazokwitsa umutima.

⁸Ibinezereza bivuye ku dushako tw’ingoma birashize, urwamo rw’ abanezerewe ruraheze, ugucuraranga kw’inanga kurashize.

⁹Ntibazonywa vino baririmba, ibiboreza bizobīhira ababinywa.

¹⁰Igisagara c’umuvurungano kirasanganguwe, inzu yose irasakiwe, kugira ngo ntihagire uwinjira.

¹¹Baririra mu nzira kuko babuze vino; ahār’ umunezero burīje mazingi, ibinezereza vyo mu gihugu biragiye.

¹²Mu gisagara hasigaye amatongo, n’ irembo rirasituwe.

¹³Kuk’ ukw ari ko bizomera mw isi hagati mu mahanga; bizomera nk’iyo banyiganyije igiti ca elayo, canke nk’uduhumbga tw’inzabibu iy’ iyimbura rishize.

¹⁴Abo bazoshira amajwi hejuru basemerere, batārīkishwe n’icubahiro c’Uhoraho bari ku kiyaga.

¹⁵Nuko ni muhimbarize Uhoraho i burasirazuba, muhimbarize izina ry’ Uhoraho, Imana y’Abisirayeli, mu bizinga vyo mu kiyaga.

¹⁶Twumvise indirimbo zituruka ku mpera y’isi, zit’ Icubahiro kibe ic’ umugororotsi. Maze nca ndavuga, nti Ndageranywe, ndageranywe! Mbonye ibara! Abaryarukanyi bararyarukanye, mber’ abaryarukanyi bararyarukanye rwose.

¹⁷Wewe uba mw isi, ibiteye ubgoba n’urusumanyenzi n’umutego bigushitseko.

¹⁸Nuk’ ūhunga induru y’ibiteye ubgoba azogwa mu rusumanyenzi; uwūrira ngw ave mu rusumanyenzi umutego uzomufata: kukw ingomero zo mw ijuru zigomorowe, kand’ amatanguriro y’isi akanyiganyiga.

¹⁹Isi iravungaguritse, isi irasataguritse, isi irahuzenze.

²⁰Isi izodandabagirana nk’imborerwa, izonyiganyizwa irya n’ino nk’umutara; igicumuro cayo kizoyiremēra, kand’ izotemba, ntiyongere kuvyuka ukundi.

²¹Maze kur’ uwo musi Uhoraho azohana ingabo zo hejuru mw ijuru, n’abami bo hasi mw isi.

²²Bazokoranirizwa hamwe, nk’ ukw imbohe zikoranirizwa mu kazu k’i bgina, bugaranirwe mw ibohero; kand’ imisi myinshi ni yashira bazohanwa.

²³Ni ho ukwezi kuzomāramāra, izuba ritētērwe; kuk’ Uhoraho Nyen’ ingabo azoba ari ku ngoma ku musozi Siyoni ari ho Yerusalemu, agire icubahiro imbere y’abashingantahe biwe.