Read Bibliya Yera 1951 Yesaya 26 Bible Online

Yesaya 26 - Bibliya Yera 1951 bible

Yesaya 26

¹Kur’ uwo musi iyi ndirimbo izoririmbirwa mu gihugu ca Yuda, ngo Dufise igisagara gikomeye; Imana izoshirah’ agakiza kabe inzitiro n’ibihome bidukīngīra.

²Ni mwugurure amarembo, kugira ngw ihanga rigororoka rikitondera ivy’ ukuri rishike.

³Uzozigama amahoro masa umuntu akwegamikako umutima wiwe, kukw akwizigiye.

⁴Ni mwizigire Uhoraho ibihe vyose: kuk’ UHORAHO YEHOVA ari we gitandara camah’ ibihe bidashira.

⁵Kuko yashubije hasi ababa ahantu ho hejuru mu gisagara cishira hejuru; agitsinda hasi, agitsinda hasi akagishitsa mw ivu, mber’ agishitsa no mu mukungugu.

⁶Ibirenge bizogisiribanga, ni vyo birenge vy’impahazwa, hahonyangwe n’ abakene.

⁷Inzira y’umugororotsi iratunganye: ni wewe usena inzira y’umugororotsi.

⁸Mbere mu nzira y’imanza zawe ziroranye, Uhoraho, ni ho twamye tukwitegeye; izina ryawe n’ukuba rurangiranwa kwawe ni vyo imitima yacu ihahamiye.

⁹Nakwifurishije umutima wanje mw ijoro; mbere nzokurondeza umushaha wanje wose ubudahumeka; kukw iy’ imanza zawe ziroranye ziri mw isi, ababa mw isi biga kugororoka.

¹⁰Umunyavyaha naho yogirirwa neza nta ho yokwiga kugororoka; mu gihugu c’ubugororotsi azohakorera ibigabitanyo, kandi ntazoruha yitegereza ubgiza bg’Uhoraho.

¹¹Uhoraho, umanitse ukuboko, yamara ntibabibona; ariko bazobona umwete ugirira abantu, bamāramāre; mber’ umuriro uzorigata abansi bawe.

¹²Uhoraho, uzoturonsa impore, kukw ivyo dukora vyose ari wewe ubidusohoreza.

¹³Ewe Uhoraho Mana yacu, abandi bami batari wewe bamye batuganza; arikw izina ryawe ryonyene ni ryo twatura.

¹⁴Bo barapfuye, ntibazokwongera kubaho; barahwereye, ntibazozuka: ni co catumye ubahana, ubarandura, ukazimanganya ukwibukwa kwabo kwose.

¹⁵Wagwije ihanga, Uhoraho we, wagwije ihanga; urashemagizwa: wunguye imbibe zose z’igihugu.

¹⁶Uhoraho, aho baboneye amagorwa ni ho bagushengereye; iy’ uguhana kwawe kubashikiriye basuka amajojwa.

¹⁷Nk’uk’ umugore akuriwe amera, iy’ igihe ciwe co kuvyara gishitse, aribga agatakishwa n’ibise vyiwe, uko ni ko twari tumeze imbere yawe, Uhoraho.

¹⁸Twari dukuriwe, turaribga, bimera nk’aho twavyaye umuyaga gusa; nta gakiza twazaniye isi, kandi nta bo kuba mw isi bāvutse.

¹⁹Abapfuye bawe bazoba bazima; imivyimba y’abantu bawe izozuka. Ni mwikangure, muririmbe, yemwe abaryamye mu mukungugu: kukw ikime cawe kimeze nk’igitonda ku vyatsi, kand’ ivu rizogarura abapfuye.

²⁰Wa bgoko bganje, ngwino winjire mu nzu yawe, wiyugarane, ube urihishije akanya gato, gushitsa ah’ ubushangashirwe buzoshirira.

²¹Kuk’ Uhoraho arikw arava i we azanywe no guhanira ababa mw isi ukugabitanya kwabo; ivu rizogaragaza ibitenga vy’amaraso yaviriye kuri ryo, kandi ntirizoba rigitwikiriye abishwe bo muri ryo.