Read Bibliya Yera 1951 Yesaya 28 Bible Online

Yesaya 28 - Bibliya Yera 1951 bible

Yesaya 28

¹Igitsibo c’ubgibone bg’ababorewe b’Abefurayimu kizobona ibara, bo n’ishurwe ry’ ubgiza bg’icubahiro ciwe rikabiranye, riri ku mutwe w’ikiyaya kimera cane c’abatsindwa na vino, na ryo rizobona ibara.

²Rāba Uhoraho afise umunyenkomezi w’ubushobozi; ni we azobatūra hasi n’inkomezi, nk’akabushungwe k’urubura, nk’ikirura gitikiza, nk’ugusendanisha kw’amazi y’inkomezi ashēshe.

³Igitsibo c’ubgibone bg’ababorewe b’Abefurayimu kizosiribangwa,

⁴kandi n’ishurwe ry’ubgiza bg’icubahiro ciwe rikabiranye, riri ku mutwe w’ikiyaya kimera cane, na ryo rizomera nk’insukoni y’isega, ici ritarasohora: ūyikubise ijisho, akiyishikana mu ntoke akayiyongobeza ako kanya.

⁵Kur’ uwo musi Uhoraho Nyen’ ingabo azobera abantu biwe b’amasigarira igitsibo c’icubahiro n’umugāra w’ubgiza:

⁶n’uwicaye aca imanza azomubera umutima uca iziroranye, kand’ azobera inkomezi abasubiza urugamba inyuma y’ amarembo.

⁷Ariko n’Abayuda na bo baradandabagiranywa na vino, bakubishwa iserere n’ibiboreza; umuherezi n’ūvugishwa n’Imana baradandabagiranywa n’ ibiboreza, vino irabamaze, bakubishwa iserere n’ibiboreza; iyo bakiriko barērekwa baradandabagirana, iyo bakiriko baraca imanza barazunguzwa.

⁸Kukw ameza yose yuzuyekw ibirutsi n’ishishi, ata hantu hasigaye.

⁹Uyo azokwigisha nde ubgenge? Kand’ azotahuza ubutumwa nde? Mbega n’abacūtse n’abavuye kw ibere?

¹⁰Kukw ivyiwe ar’ ibgirizwa ku rindi, ibgirizwa ku rindi, n’umurongo ku wundi, umurongo ku wundi, hamwe tumwe, ahandi utundi.

¹¹Noneho rer’ Uhoraho azovuganira n’ubu bgoko mu kanwa katumvikana no mu rurimi rundi;

¹²ari bgo yari yarabariye, at’ Uku ni kwo kuruhuka, mureke ūrushe aruhuke; aha ni ho buruhukiro: ariko banka kwumva.

¹³Ni co gituma kuri bo ijambo ry’Uhoraho rizobabera ibgirizwa ku rindi, ibgirizwa ku rindi, n’umurongo ku wundi, umurongo ku wundi, hamwe tumwe, ahandi utundi; kugira ngo bagende, bagwe bagaramye, bavunagurike, bategwe, bafatwe.

¹⁴Nuko rero ni mwumve ijambo ry’Uhoraho, mwa bacokoranyi mwe, baganza ubu bgoko bur’ i Yerusalemu!

¹⁵Ko muvuga, muti Twasezeranye isezerano n’ urupfu, kandi twemeranije n’i kuzimu; mut’ Icago ni casendanisha kigahita mu gihugu, muti Ntikizodushikako; muti Kuko twironkeye ubuhungiro mu binyoma, tukaba tunyegeye musi y’ ubugunge:

¹⁶ni co gitumye Umwami Uhoraho avuga, ati Rāba, ndashira i Siyoni ibuye ryo kuba itanguriro, ibuye ryagejejwe, ari ryo ryo kugumya imfuruka, riri n’igiciro, rishikamye cane; kand’ uwizera ntazohutagiza.

¹⁷Kand’ imanza ziroranye ni zo nzogira umugozi ugera, n’ubugororotsi nzobugira karisho:[8] urubura ruzovumbura ubgo buhungiro bg’ibinyoma, kand’ amazi azosendanisha aho hantu ho kwinyegeza.

¹⁸Maz’ isezerano mwasezeranye n’urupfu rizopfa, kand’ inyemero mwemeranije n’i kuzimu ntizohama; arikw icago ni casendanisha kigahita mu gihugu, ni ho kizobasiribangira hasi.

¹⁹Uko kizoba gihita kwose kizobafata; kuko kizokwama gihita uko bukeye, ku murango no mw ijoro, kandi gutahura bga butumwa kuzozana gucika ivutu gusa.

²⁰Kuk’ uburiri ari bugufi umuntu atoshobora kuburamvyako, kand’ ikirago kikaba akaberere umuntu atoshobora kuciyorosa.

²¹Kuk’ Uhoraho azohaguruka nk’uko yahagurutse ku musozi Perasimu, azoraka nk’uko yarakiye mu kiyaya c’i Gibeyoni; akore igikorwa ciwe, igikorwa ciwe c’igitangaza, ashitse igikorwa ciwe, igikorwa ciwe c’akumiza.

²²None rero mureke kuba abacokoranyi, kugira ngw imvuto murimwo ntizirushirize gukanasha; kuko numvise yukw ivyo Umwami Uhoraho Nyen’ ingabo yagabiye ar’ ugutikiza igihugu cose.

²³Ni mutege amatwi, mwumve ijwi ryanje; mwumvirize, mwumve amajambo yanje.

²⁴Mbeg’ umurimyi avyiririra kuzobiba, yama avyirira na ntaryo? Mbega yama avyirira agakubita imvyirire na ntaryo?

²⁵Iy’ amaze kuyikuma ntahava akamija uburo, akabiba izitwa kumino, akabiba ingano mu mirongo, na sayiri akayibiba aho yayitunganirije, akabiba n’izitwa kusemeti ku rubibe rwaho?

²⁶Kukw Imana yiwe imwereka neza, ikamwigisha.

²⁷Kuk’ uburo budahūzwa imihini ifise ubugi, na kumino ntihūzwa no gutembagazwako ikurudumu y’umukogote; arik’ uburo buhūzwa umuhini, na kumino ihūzwa ikibando.

²⁸Mbeg’ impeke z’umutsima mu gusekura barazimenagura? Ereg’ umuntu ntiyokwama arazihūra: mbere naho yozitembagazako ikurudumu y’umukogote wiwe n’amafarasi yiwe, yirinda kutazimenagura.

²⁹Ivyo na vyo biva k’Uhoraho Nyen’ ingabo, umujanama w’igitangaza, w’ubgenge bg’agahebuza.