Read Bibliya Yera 1951 Yesaya 29 Bible Online

Yesaya 29 - Bibliya Yera 1951 bible

Yesaya 29

¹Ewe Ariyeli, uzobona ibara, Ariyeli, wa murwa Dawidi yashagajeko! Mukurikiranye umwaka n’uwundi, mugire imisi mikuru mu bihe vyayo;

²maze Ariyeli nzoca mpababaza, hazoba kurira no kuboroga; kand’ aho hazombera nka Ariyeli nyene.

³Nzogusagazako ngutangatange impande zose, nzogukikiza ibihome ngute hagati, nzoguta hagati nkurundire ikirundo c’ivu kigukikije.

⁴Maz’ uzocishwa bugufi uvugire mw ivu, amajambo yawe azoba asokoroka hasi nk’ayava mu mukungugu; ijwi ryawe rizova mw ivu ryandara nk’iry’ umuzimu, amajambo yawe anywigirire mu mukungugu.

⁵Arikw ingabo z’abansi bawe zizohava zihinduka nk’umukungugu wiseye, n’ingabo z’agaterabgoba zizohinduka nk’umuguruka utumuka: mber’ ivyo bizobabera birtyo giturumbuka mu kanya gato.

⁶Hazoba guterwa n’Uhoraho Nyen’ ingabo, kw’imituragaro, n’ugutigita kw’isi, n’ukwasana gukomeye, n’agashururu, n’ikirura, n’imbeya z’umuriro utongora.

⁷Maz’ ingabo z’amahanga yose arwanya Ariyeli, abaharwananya n’igihome caho bose bakahagora, bazoba nk’inzozi, nk’ivyo umuntu yeretswe mw ijoro nko mu nzozi.

⁸Nuko bizomera nk’umuntu ashonje arota arikw ararya: ngo yikangure agasanga inda iri gusa; canke nk’ūfise inyota arota arikw aranywa: ngo yikangure agasanga akabiranye, agatuwe n’inyota. Uko ni kw ingabo z’amahanga yose arwanya umusozi Siyoni zizomera.

⁹Banza muhagarare, mujorerwe; mwihume amaso, muhume; muborerwe mutanyoye vino; mudandabagirane, bitavuye ku biboreza.

¹⁰Kuk’ Uhoraho abasutsekw impwemu y’uruhuni, agahuma amaso yanyu, ni yo bavugishwa banyu, agapfuka n’imitwe yanyu, ni yo bamenyi banyu.

¹¹Ukwerekwa kwose kwabahindukiye nk’ amajambo yo mu gitabo kimatanishijwe ishashara, iyo bagihaye umuntu azi gusoma, bat’ Enda se soma iki: akabishura, ati Sinshobora, kuko kimatanijwe;

¹²maze bagaha ico gitabo ūtazi gusoma, bat’ Enda se soma iki: akabishura, ati Ko ntazi gusoma.

¹³Umwami Imana aravuga, at’ Aba bantu ko bahora baza hafi yanje, bazanye akanwa kabo gusa, bakanyubahisha iminwa yabo, arikw imitima yabo bakayishira kure yanje, n’ukunyubaha kwabo kukaba ar’ icagezwe bigishijwe n’abantu.

¹⁴Nuko rero ngira nkore igikorwa c’igitangaza mur’ aba bantu, mbere n’igikorwa gitangaje c’akumiza: ubgenge bg’abanyabgenge babo buzoherengetera, n’ ubuhanga bg’abahanga babo buzokamangana.

¹⁵Bazobona ibara, abarondera kuzika inama zabo i kuzimu ngo bazihishe Uhoraho, ibikorwa vyabo bikaba mu mwiza, bakavuga, bati Ni nde atubona? kandi bati Ni nde atuzi?

¹⁶Ewe bupfu buri hano! Mbeg’ umubumvyi mumuhwanya n’ibumba, ngw ikintu cabumbge gihakane uwakibumvye, kiti Ntiyambumvye; cank’ ikintu caremwe kigahakana uwakiremye, kiti Nta bgenge agira?

¹⁷Mbega ntihasigaye akanya gato cane, Lebanoni hagacika itongo rimera cane, kand’ itongo ryamera cane rikitwa ishamba?

¹⁸Kur’ uwo musi ibipfamatwi bizokwumva amajambo yo mu gitabo, n’amaso y’impumyi azoca umwiza n’umuzitanya abone.

¹⁹Kand’ abaciye bugufi na bo bazogwiza umunezero banezererwa Uhoraho, n’abakene bo mu bantu bazohimbarwa n’Uwera w’Abisirayeli.

²⁰Kuk’ umuntu w’agaterabgoba atituwe, n’umucokoranyi aheze, kand’ abatambira kugabitanya bose barahonnye,

²¹ni bo bacumuza umuntu mw ijambo, bagatega umutego ūhanūrira mw ishikiro ry’igisagara, bakazibiranya umugororotsi n’amagambo y’ubusa.

²²None rer’ Uhoraho, ari we yacunguye Aburahamu, uku ni kw avuze ku vy’inzu ya Yakobo, ati Yakobo ntazokwongera gutētērwa, kandi mu maso hiwe ntihazosubira kubgerabgera.

²³Arik’ ubgiwe n’abana biwe ni babona ivyo amaboko yanje akorera hagati muri bo, bazokwemera izina ryanje ko ryera; mbere bazokwemera Uwera wa Yakobo ko nera, bahindire agashitsi jewe Imana y’ Abisirayeli.

²⁴Kandi n’abazimira mu mitima bazoca ubgenge, n’abidodomba bazokwemera kwigishwa.