Read Bibliya Yera 1951 Yesaya 3 Bible Online

Yesaya 3 - Bibliya Yera 1951 bible

Yesaya 3

¹Rāba Umwami, Uhoraho Nyen’ ingabo, anyaze ab’ i Yerusalemu n’Abayuda icishimikizo n’inkoni begamiye, icishimikizo cose, ari co vyo kurya vyabo, n’icishimikizo cose, ari co mazi yabo;

²hamwe n’umuhizi n’intōre, n’umucamanza n’ūvugishwa n’Imana, n’umupfumu n’umushingantahe,

³n’umugabisha w’ingabo mirongwitanu n’umunyacubahiro, n’umujanama, n’umukozi w’umuhinga, n’umupfumu w’incabanganya.

⁴Nzobaha abana babe ari bo babatwara, kand’ imicūko ni yo izobaganza.

⁵Abantu bazohahazanya, umuntu wese azohahazwa na mugenzi we, umuntu wese ahahazwe n’umubanyi wiwe: umusore azoshinyaguriza umutāma, n’inkēngērwa izoshinyaguriza umunyacubahiro.

⁶Ico gihe umuntu azofata uwo bavukana mu rugo rwa se, amubgire, ati Kw ari wewe ufise imyambaro, ba ari wewe utuganza, n’ibi bitongozi abe ari wewe ubitwara.

⁷Uwo musi na we azosemerera, ati Sinshobora kubasanasana, kukw i wanje ata vyo kurya ngira, ata n’imyambaro: nta co mungira umutware w’abantu.

⁸I Yerusalemu haradandabagiranye, i Buyuda haratemvye; kuk’ ururimi rwabo n’ibikorwa vyabo ar’ ibigarariza Uhoraho, bakajinyūrira imbere y’inyonga ziwe z’icubahiro.

⁹Ishusho yo mu maso habo ni yo ibāgiriza; bērura icaha cabo nk’ab’ i Sodomu, ntibagihisha. Ubugingo bgabo buzobona ibara, kukw ari bo bīhamagariye ivyago.

¹⁰Mubgire umugororotsi kw azomererwa neza, kukw azotungwa n’ivyo ibikorwa vyiwe vyāmūje.

¹¹Umunyavyaha azobona ibara! Azomererwa nabi, kukw azogererwa ingero y’ivyo amaboko yiwe yakoze.

¹²Yamar’ abantu banje, abana ni bo babacuranguza, kand’ abagore ni bo babaganza. Yemwe bantu banje, ababarōngōra barabazimiza, kandi bazimanganya inzira mwociyemwo.

¹³Uhoraho ahagurukijwe no kubūrana, kand’ ahagurukijwe no gucira amahanga imanza.

¹⁴Uhoraho azoshira abakuru b’abantu biwe n’abaganwa babo mu rukinja, ati Ni mwebge mwakomvye uruzabibu, ivyo mwanyaze impahazwa biri mu ngo zanyu:

¹⁵mukora ibiki, gusekura abantu banje, mugasya impahazwa? ni k’Umwami, Uhoraho Nyen’ ingabo, abaza.

¹⁶Bitayeko Uhoraho aravuze, ngw Abakobga b’i Siyoni ko bībona, bakagenda bararitse amazosi n’amaso y’ubgēruzi, bakagenda bīkūmagura, bajegeza amayugi ku maguru:

¹⁷ni co kizotuma Umwami Imana atēza abakobga b’i Siyoni ibihūshi mu bitwariro, Uhoraho agatwikurura ibiteye isoni vyabo.

¹⁸Kur’ uwo musi Umwami Imana azobashazūra ugushaza kw’inyerere zabo, n’ibikubi, n’ibihete,

¹⁹n’impeta zo ku matwi, n’indinga, n’inkekezo bīshīshira,

²⁰n’ibitsibo, n’imigufu yo ku maguru, n’imisipi, n’udukebano tw’ibitāmirana, n’uduhēko,

²¹n’impeta zo ku ntoke n’izo ku mazuru,

²²n’impuzu zo ku misi mikuru, n’imitamana, n’impuzu zo kurenza hejuru, n’udupfuko,

²³n’ivyirore, n’imvune zera, n’ibitambara bīteze mu mutwe, n’ubuyonga.

²⁴Maze mu gishingo c’imbazi hazoba umunūko; mu gishingo c’ikimano c’ubudede hazoba umugozi; mu gishingo c’umushatsi utsivye hazoba inkomvorera; mu gishingo c’impuzu y’igisāga hazoba igunira; n’ibikovukovu mu gishingo c’amarangi.

²⁵Intōre zawe zizokwicwa n’inkota, abahizi bawe bazogwa mu ntambara.

²⁶Amarembo y’i Siyoni azorira aboroge: hazokwicara hasi hasigaye ar’ umuzigirizwa.