Read Bibliya Yera 1951 Yesaya 30 Bible Online

Yesaya 30 - Bibliya Yera 1951 bible

Yesaya 30

¹Abana b’ibigāba bazobona ibara, ni k’Uhoraho agize, bagīsha inama abandi atari jewe, bakifatanya n’abandi atari Mpwemu wanje, kugira ngo bagereke icaha ku kindi;

²bakava hasi ngo bamanuke muri Egiputa batabajije irivuye mu kanwa kanje; ngo bisunge inkomezi za Farawo, bironkere ubgugamo mu gitūtu ca Egiputa!

³Nuko rero za nkomezi za Farawo zizobatētereza, na bga bgugamo bgo mu gitūtu ca Egiputa buzobambika ibara.

⁴Kukw abaganwa biwe bar’ i Sowani, n’intumwa ziwe zishitse i Hanesi.

⁵Bose bazomāramāra kuko bazosanga ar’ abantu batabasha kubagirira ikimazi, batazobatabara, ata kimazi bafise, atar’ ukubatētereza no kubatukisha.

⁶Imbūri yo ku bikōko vy’i bumanuko. Baca mu gihugu c’ amagorwa n’umubabaro, ah’ intambge y’ingore n’iy’ ingabo zituruka, hakaba n’imamba n’inzoka z’ubumara buturira ziguruka, baremētse indogoba z’imikangara ivy’ ubutunzi bgabo, bashize n’ivy’ itunga ryabo ku mapfupfu y’ ingamiya, kugira ngo baje kubishikanira abantu batazobagirira ikimazi.

⁷Kuko gutabara kwa Egiputa ar’ ubusa, ata co kumaze: ni co gituma mpīta Rahabu[9] yiyicariye gusa.

⁸None rero genda, uvyandike ku gisate imbere yabo, uvyandike no mu gitabo, kugira ngo mu bihe bizoza bibabere igishingantahe c’intahava.

⁹Kukw ar’ ubgoko bg’ibigāba, abana babesha, abana banka kwumva ivyagezwe vy’Uhoraho:

¹⁰babarira abamenyi, bati Ntimutumenyere, bakabgira n’aberekwa ibizoba, bati Ntimutubarire ivyo mweretswe vy’ukuri, ariko mutubarire ivyoroshe, muvugishwe ivy’ ibinyoma;

¹¹muve mu nzira mukikame, mukūre Uwera w’ Abisirayeli imbere yacu.

¹²Ni co gitumye Uwera w’Abisirayeli avuga, ati Ko mukēngereye iryo jambo, mukishimira agahahazo n’ ubugoryi, mukaba ari vyo mwishimikiza,

¹³ni co gituma ukwo kugabitanya kuzobabera nk’uruzitiro rw’amabuye rurerure rwase umugāga, ruminaraye ruri mu gutemba; guhomvoka kwarwo kuzoba giturumbuka mu kanya isase.

¹⁴Kand’ azorusāvya nk’ukw ikibumbano gisāba, iyo bakijanjanze ata kibabarwe; mu tunywenywe twaco ntihasigare n’akajo korahura umuriro mu ziko, canke kodaha utuzi mw ivomo.

¹⁵Umwami Uhoraho, Uwera w’Abisirayeli, uku ni ko yari yaravuze, ati Mu guhindukira no mu gutēkāna ni ho muzokirira; mu gutekereza no mu vyizigiro ni ho muzoherwa inkomezi; ariko mwebge ntimwabikunze.

¹⁶Yamara mwaravuze, mut’ Oya, ariko tuzoguruka ku mafarasi; kandi koko muzoba muhunga; kandi muti Tuzogendera ku y’impayamaguru; ni koko n’abazoba babirukana babakinagiza bazoba ar’ impayamaguru nyene.

¹⁷Abantu igihumbi bazokwirukanwa n’akāyaga k’umuntu umwe; akāyaga ka batanu kazotuma muhunga: gushitsa aho muzosigara mumeze nk’igiti kirekire gishinze ku mpinga y’umusozi, canke nk’ibendera ishinze ku gasozi.

¹⁸Ni kubg’ ivyo Uhoraho ashamaje kugira ngw abagirire ubuntu, kandi ni kubg’ ivyo azohaguruka kugira ngw abagirire ikigongwe, kuk’ Uhoraho ar’ Imana ica izibereye; hahirwa abashamaje bamwiteze bose.

¹⁹Yemwe bantu b’i Siyoni, ababa i Yerusalemu: ntimuzoba mukirira ukundi; ntazobura kubagirira ubuntu ni yumva ijwi ry’ugutakamba kwanyu; acumva azobishura.

²⁰Kandi nah’ Umwami Imana azobagaburira ivyo kurya vy’amagorwa n’amazi y’amarushwa, arikw abigisha banyu ntibazoba bacihisha ukundi: amaso yanyu azobībonera;

²¹kandi ni mwakikamira i buryo cank’ i bumoso, amatwi yanyu azokwumva ijambo ribaturutse inyuma rivuga, rit’ Iyi ni yo nzira, mube ari yo mujana.

²²Kandi muzotitura ifeza yometse ku bishushanyo vyanyu vy’ibibāzano, n’izahabu yometse ku bishushanyo vyanyu vyavugutiwe mu nkero; muzobishibura rwose nk’ikintu gihumanye, mubibarire, muti Vaho, mugende!

²³Kand’ azorekurira imvura imbuto muzobiba mu ndimiro, kand’ imihure ivuye mu ndimiro izoba inovereye yo gutunga amagara: ico gihe imikuku yanyu izorisha ivyanya binini.

²⁴Inka n’indogoba z’imikangara zirima zizorya ivyo kurya birimw’ umunyu, bigosojwe urutaro n’igitemere.

²⁵Ku gisozi cose gishizwe hejuru no ku musozi wose muremure hazoba amasōko n’imigezi y’amazi, ku musi wo gutōtōra abantu rwose, ah’ iminara izosidukira.

²⁶Kand’ umuco w’ukwezi uzomera nk’uw’ izuba, kand’ umuco w’izuba uzokwongerekanywa ibihetangabo ndwi, ungane n’umuco wo mu misi ndwi, ku musi Uhoraho azopfuka ibikomere vy’abantu biwe, akavūra n’inguma yabakubise.

²⁷Eh’ izina ry’Uhoraho riraza rivuye kure, rirurumbamw’ uburake bgiwe, ripfundukamw’ umwotsi w’intunda: iminwa yiwe yuzuye ubushangashirwe, kand’ ururimi rwiwe rumeze nk’umuriro utongora:

²⁸impwemu ziwe zimeze nk’umugezi ushēshe ugashika no mw izosi, ngo zigosoze amahanga urutaro rumara umuguruka: kand’ umujiginya uzimiza uzoba mu binyigishi vy’ amahanga.

²⁹Nuko muzogira indirimbo nk’iyo baririmba mw ijoro ku musi mukuru wera; muzogira n’umunezero wo mu mutima nk’uw’ umuntu afise umwironge aja ku musozi w’ Uhoraho, ngw ashikīre Igitandara c’Abisirayeli.

³⁰Kand’ Uhoraho azotuma ijwi ryiwe ry’icubahiro ryumvikana, azokwerekana ugukubita kw’ukuboko kwiwe mu bushangashirwe bg’uburake, no mu rubeya rw’umuriro utongora, no mu gusegenyuka kw’imvura n’ ikirura n’imināna y’urubura.

³¹Kukw ijwi ry’Uhoraho rizotuma Abashuri bahababuka, abakubitishe urugāge rwiwe.

³²Kand’ ikibando bāgerewe uko kimashuye kwose, ico Uhoraho abamashuza, hazovuga udushako tw’ingoma n’ inanga; kand’ azorwana na bo mu ntambara adasībiza ukuboko.

³³Kukw ikirundo c’inkwi citeguwe uhereye kera, mbere citeguriwe umwami; Uhoraho yakigize kirekire kandi kinini; ibigikomanije n’umuriro n’ibigiga vyinshi; impwemu z’Uhoraho zimeze nk’ umugezi w’amazuku ni zo zibidometse.