Read Bibliya Yera 1951 Yesaya 32 Bible Online

Yesaya 32 - Bibliya Yera 1951 bible

Yesaya 32

¹Rāba, umwami azoganza mu bugororotsi, n’abaganwa bazotwaza imanza ziroranye.

²Kandi mur’ abo, uw’ ari we wese azoba nk’aho kwikinga umuyaga, n’ubgugamo bg’ikirura; azoba nk’ inzūzi z’amazi ahantu hagadutse, kandi nk’igitūtu c’igitandara kinini mu gihugu kiruhisha.

³Amaso y’ababona ntazoba agihwihwisha, kand’ amatwi y’abumva azokwumviriza neza.

⁴Umutima w’ūhutikiranya uzomenya ubgenge, n’ururimi rw’abagigimiza ruzotobora neza ibirashe.

⁵Igipfapfa ntibazoba bakimwita umupfasoni, kand’ uwigungirako ntibazoba bakimwita umunyabuntu.

⁶Kukw igipfapfa kivuga ivy’ ubupfu, umutima wiwe ugakora ivy’ ukugabitanya, ngw akore ibihumanya, avuge ibigoramye k’ Uhoraho, akarekerana ūshonje inzara, n’ūfise inyota akamwima ico anywa.

⁷Kand’ ibikoreshwa vy’uwigungirako ni bibi: agira akazikira k’ikibi ko kuzikiriza abagorwa n’amagambo y’ibinyoma, naho hoba umukene afise urubanza.

⁸Arik’ umunyabuntu imigabo yiwe n’ukugira ubuntu, kand’ ukwo kugira ubuntu azogushishikara.

⁹Yemwe bagore bidibamiye, ni muve hasi, mwumve ijwi ryanje; yemwe bakobga b’ibidage, ni mutegere amatwi amajambo yanje.

¹⁰Muzomara imisi irenze umwaka muhagaritse imitima, yemwe mwa bidage mwe, kukw imyengo izobura, kandi nta kwimbura kuzobaho.

¹¹Hinda agashitsi, yemwe bagore bidibamiye; hagarika imitima, yemwe mwa bidage! Mwiyambure impuzu, mwīsige ubusa, mukenyere amagunira mu rukenyerero.

¹²Bazokwishishitira bababajwe n’amatongo yabanezereza, n’imizabibu yaregeza.

¹³Mu gihugu c’abantu banje hazomera amahwa n’imikēre; mbere bizomera no ku mazu yose banezererwamwo yo ku murwa w’umunezero;

¹⁴kukw ingoro izohebga, umurwa bahora bayebanganako uzoba imisaka; umusozi n’umunara w’abateramyi bizohinduka amasenga gushitsa ibihe bidashira, bizoba aho guhimbara indogoba z’inyeshamba, hazoba ubgatsi bg’imikuku;

¹⁵gushitsa aho Mpwemu azodusukirwako avuye hejuru, ubugaragwa bugacika itongo rimera cane, kand’ itongo ryamera cane rikitwa ishamba.

¹⁶Maz’ ukuroranya kuzotsindaza mu bugaragwa, n’ubugororotsi buzoba mw itongo rimera cane.

¹⁷Ubugororotsi buzovyara amahoro, kand’ ubugororotsi buzozana ugutekereza n’ivyizigiro gushitsa ibihe bidashira.

¹⁸Kand’ abantu banje bazoba mu ngo z’amahoro, no mu mazu bahabe amarembe, no mu buruhukiro butagira inkomanzi.

¹⁹Arik’ urubura ruzotsinda ikibira hasi, igisagara gisangangurwe rwose.

²⁰Murahiriwe, yemwe ababiba mu biyaya vy’ amazi yose, mukarekura inka n’ indogoba kugenda umwagambo.