Read Bibliya Yera 1951 Yesaya 33 Bible Online

Yesaya 33 - Bibliya Yera 1951 bible

Yesaya 33

¹Uzobona ibara, wewe unyaga kand’ utānyazwe, uryarukana kandi batākuryarutse! Ni waheza kunyaga, nawe uzonyagwa; kandi ni wamara kuryarukana, bazokuryaruka nawe.

²Ewe Uhoraho, utugirire imbabazi; ni wewe twiteze; utubere amaboko uko bukeye, mber’ utubere agakiza mu gihe c’amagorwa.

³Amoko ahungishijwe n’ijwi ryo guhūrīra; kubgo guhaguruka kwawe amahanga arasābagiye.

⁴Bazovumbura iminyago mwanyaze nk’ukw inzige zivumbura, bazoyigwako nk’uk’ ubuyige bg’intōteza bugwa.

⁵Uhoraho ashizwe hejuru nk’uko yibera iyo hejuru: yuzuza i Siyoni ibiroranye n’ubugororotsi.

⁶Mu bihe vyawe hazobah’ umutēkāno, n’ agakiza k’umurengera, n’ubgenge no kumenya: kwubaha Uhoraho ni bgo butunzi bgawe.

⁷Ehe, abahizi babo baraborogera hanze; intumwa zo gusaba impore ziriko zirarira cane.

⁸Inzira z’iroro zirasivye, nta wuhita akiboneka; yishe isezerano, akēngēra ibisagara, kandi ntagira udusoni ku bantu.

⁹Igihugu kiriganyira, kirahondobereye: Lebanoni haratēterewe, harakabiranye; Sharoni hameze nk’ ubugaragwa; Bashani na Karumeli hakoraguye amababi.

¹⁰Uhoraho aravuga, ati Hinge mvyaguruke non’ ubu, non’ ubu ngira mpaguruke, non’ ubu ngira nishire hejuru.

¹¹Muzosama inda y’umuguruka, muvyare ishingwe; impwemu zanyu ni wo muriro uzobatongora.

¹²Amahanga azoturirwa nk’uko baturira ishwagara; azomera nk’igiteme c’amahwa, kigaturirirwa mu muriro.

¹³Yemwe abari kure, ni mwumve ivyo nkoze, namwe abari hafi, ni mwemere ubushobozi bganje.

¹⁴Abanyavyaha b’i Siyoni baratinye; agatengo gafashe giturumbuka abatubaha Imana. Muri twebge ni nde yoshobora kubana n’umuriro utongora, kandi muri twebge ni nde yoshobora kubana n’ikibengebenge kidahengeshanya?

¹⁵Ūgendera mu bugororotsi akavuga ibitunganye, akagaya inyungu ziva mu gahahazo, agahungisha amaboko ngo ntiyābīre ingurire, akīziba amatwi ngo ntiyumve inama yo kuvisha amaraso, agahumiriza amaso ngo ntarābe ibibi:

¹⁶uwo ni we azoba ahataramutse hejuru, ahantu hiwe ho kwikinga hazoba igihome c’ amabuye; azohabga ivyo kurya bimutunga, kandi n’amazi ntazoyabura.

¹⁷Amaso yawe azokwitegereza umwami afise ubgiza bgiwe: azorāba igihugu kigera kure.

¹⁸Umutima wawe uzokwibuka ivyatera ubgoba; ukībaza, ut’ Uwaca ibitigiri vy’ ingorore ari hehe? Uwazākīra akarāba ko zishitse ari hehe? Uwaharūra iminara ari hehe?

¹⁹Ntuzoba ukibona ihanga ry’ inkazi, ihanga ry’imvugo igoye udashobora kwumva, riri n’ururimi rw’urunyamahanga udashobora gutahura.

²⁰Ni witegereze i Siyoni, umurwa twagiriramw’ imisi mikuru yacu: amaso yawe azobona i Yerusalemu hasigaye hatsimbataye har’ amahoro, ar’ ihema ritazokūrwaho, imambo zaryo ata ho zizoshingūrwa, ata n’ umugozi waryo uzocika.

²¹Arik’ Uhoraho azohabana natwe afise icubahiro, azotubera inzūzi zagutse n’imigezi, ah’ ata bgato buzosozwa, ata n’imasuba ihambaye izohaca.

²²Kuk’ Uhoraho ari we mucamanza wacu; Uhoraho ni we adushingira ivyagezwe; Uhoraho ni we Mwami wacu: azodukiza.

²³Imigozi yawe iradohotse, ntigishobora gukamvya epfo y’ umuringoti, ntigishobora kubamba igihuzu kigendesha ubgato: ico gihe bazogabangana isahu ry’ibitayega, mbere n’abacumbagira bazosahura isahu.

²⁴Kand’ uwaho ntazovuga, ati Ndarwaye: abantu bahaba bazoba bahariwe ukugabitanya kwabo.