Read Bibliya Yera 1951 Yesaya 35 Bible Online

Yesaya 35 - Bibliya Yera 1951 bible

Yesaya 35

¹Ahagadutse n’ubgeranyange hazonezerwa, ubugaragwa buzohimbarwa, bushurike amashurwe nk’aya habaseleti.

²Buzoshurika amashurwe menshi, buhimbaranwe umunezero n’indirimbo; buzohabga ubgiza bg’i Lebanoni, n’ugushaza kw’i Karumeli n’i Sharoni: bazobona ubgiza bg’Uhoraho, ugushaza kw’ Imana yacu.

³Mukomeze amaboko areganutse, mugumishe amavi aregarega.

⁴Mubgire abahagaritse imitima, muti Rema, nta co mutinya: rāba, Imana yanyu izozanana n’uguhōra, ni kwo kwitura kw’Imana; izoza ibakize.

⁵Ni ho impumyi zizohumūka, n’ibipfamatwi bizozibūrwa.

⁶Ico gihe ūcumbagira azosimba nk’ impongo, ururimi rw’ikiragi ruririmbe: kukw amazi azodudubiriza ahagadutse, imigezi itembere mu bugaragwa.

⁷Kand’ umusenyi uhiye uburimbi uzohinduka ibidengeri, n’ahagataye hazocika amasōko: mu bgishinzo bg’imbgebge, aho zāgandagaza, hazemera ivyatsi n’amarenga n’ imibere.

⁸Kandi hazobay’ inzira y’iroro, iyo nzira izokwitwa Inzira Yera. Abanduye imitima ntibazoyicamwo, arikw izoba iy’ abantu biwe. Abayicamwo, naho hobamw’ ibijuju, ntibazozimira.

⁹Nta ntambge izohaba, nta gikōko na kimwe c’inkazi kizoyigeramwo, ntibizoyibonekamwo: arikw abācunguwe ni bo bazoyicamwo.

¹⁰Abācunguwe n’ Uhoraho bazogaruka, bashike i Siyoni baririmba; umunezero udashira uzoba ku mitwe yabo: bazobona uguhimbarwa bo n’ umunezero, kand’ umubabaro n’ ugusuhuza umutima bizohunga.