Read Bibliya Yera 1951 Yesaya 36 Bible Online

Yesaya 36 - Bibliya Yera 1951 bible

Yesaya 36

¹ Mu mwaka ugira icumi na kane umwami Hezekiya ari ku ngoma, Senakeribu umwami w’i Ashuri yaradūze, atera ibisagara vyose vyubakiwe inzitiro vy’i Buyuda, arabitsinda.

²Bukeye umwami w’i Ashuri atuma Rabushake ava i Lakishi ajanye ingabo nyinshi, aja i Yerusalemu, ku mwami Hezekiya. Ashitseyo ahagarara ku mugende wo ku kidengeri co haruguru, ku nzira yo ku kibuga c’umumesuzi.

³Maz’ umuzezwarugo Eliyakimu mwene Hilukiya, n’umukarani Shebuna, n’umwanditsi w’ivyaja biraba yitwa Yowa mwene Asafu, barenga irembo baramusanganira.

⁴Rabushake arababarira, ati Ni mubarire Hezekiya, mut’ Uku ni k’umwami ahambaye, ni we mwami w’i Ashuri, agize: ngo Mbeg’ ivyo vyizigiro wizigiye n’ibiki?

⁵Ngw Inama yawe n’ inkomezi zo kurwana, erega n’ amajambo y’impfagusa. Ngo Mbeg’ uwo wishimiye ni nde, yatumye umugarariza?

⁶Ngw Erega wishimiye ya nkoni y’ irenga rivunitse, ni ryo Egiputa, umuntu yoryishimikiza ryomutobekeranya ikiganza. Ng’ Uko ni ko Farawo umwami wa Egiputa amerera abamwishimiye bose.

⁷Naho mwomubarira ko mwishimiye Uhoraho Imana yanyu: none si yo Hezekiya yakūyeh’ ibitabo vyayo n’ibicaniro vyayo, akabarira Abayuda n’ab’ i Yerusalemu, ati Muze musengere imbere y’iki gicaniro?

⁸Muti None rero, enda shinga na shebuja umwami w’i Ashuri, muti Na we Rabushake araguha amafarasi ibihumbi bibiri, namba nawe ubgawe woshobora kuronka abo uyūriza.

⁹Muti None se woshobora ute gukora mu maso y’umugabisha n’umwe wo mu basavyi ba shebuja bo hanyuma y’abandi, mut’ Asangw’ ar’ ukwishimira Abanyegiputa kw ari bo bazoguha imikogote ikwegwa n’ amafarasi n’abo kuyagenderako?

¹⁰Muti Mbega yadūze gutera iki gihugu no kukirandura, atari kubg’ Uhoraho? Mut’ Ereg’ Uhoraho ni we nyene yamubariye, ati Dūga utere ico gihugu, ukirandure.

¹¹Maze Eliyakimu na Shebuna na Yowa bishura Rabushake, bat’ Enda se turakwinginze, utubarire mu Gisiriya, kuko tucumva; ariko nta co utubaririra mu Kiyuda mu matwi y’aba bantu bari hejuru ku ruzitiro rw’amabuye.

¹²Ariko Rabushake arabishura, ati Mbega mugira ngo databuja yantumye kuri shobuja namwe gusa kubabgira aya majambo? Ntiyantumye kur’ aba bagabo bicaranye namwe hejuru ku ruzitiro, kugira ngo barīre amavyi yabo hamwe n’ayo basōvye?

¹³Maze Rabushake arahagarara, avuga n’ijwi rirenga mu rurimi rw’Ikiyuda, ati Ni mwumve amajambo y’umwami ahambaye, ni we mwami w’i Ashuri.

¹⁴Uku ni k’umwami agize, ngo Hezekiya ntabahende; ngo Kukw atazoshobora kubakiza.

¹⁵Ngo Kandi Hezekiya ntabizigize Uhoraho, ababarira, ng’ Uhoraho ntazobura kubakiza, kandi ng’ Uyu murwa ntuzotangwa ng’ukorokere mu maboko y’umwami w’i Ashuri.

¹⁶Ntimwumvire Hezekiya: kuk’ ukw ari k’umwami w’i Ashuri agize, ngo Kunda mwuzure na we, musokoroke muje iy’ ari, umuntu wese ngw abone kurya ku muzabibu wiwe no ku musukoni wiwe, no kunywa ku mazi yo mw ivomo ryiwe,

¹⁷ngo Gushitsa igihe azozira akabajana mu gihugu gihwanye n’icanyu, igihugu c’ingano na vino, igihugu c’indya n’inzabibu.

¹⁸Ngo Mwiyubare, Hezekiya ntabahende, avuga ng’ Uhoraho azobakiza. Mbega mu mana z’ abanyamahanga hari n’imwe yigeze gukiza igihugu cayo ngo ntigikorokere mu maboko y’umwami w’i Ashuri?

¹⁹Ngo Mbeg’ imana z’i Hamati n’izo muri Arupadi ziri hehe? Imana z’i Sefaravayimu ziri hehe? Ngo Mbega zarakijije Samariya ngo ntihakorokere mu maboko yiwe?

²⁰Ngo N’izihe mu mana zose zo mur’ ivyo bihugu zākijije igihugu cazo ngo ntigikorokere mu maboko yiwe, ng’ Uhoraho na we akize Yerusalemu ngo ntihakorokere mu maboko yiwe?

²¹Maze barihorera, ntibamwishura ijambo na rimwe, kukw ijambo ry’umwami ryari ryavuze, ngo Ntimugire ico mumwishura.

²²Hanyuma wa muzezwarugo Eliyakimu mwene Hilukiya, n’ umukarani Shebuna, n’umwanditsi w’ivyaja biraba yitwa Yowa mwene Asafu, baza kuri Hezekiya bitantamuriyekw impuzu zabo, bamudondera amagambo ya Rabushake.