Read Bibliya Yera 1951 Yesaya 37 Bible Online

Yesaya 37 - Bibliya Yera 1951 bible

Yesaya 37

¹Maz’ umwami Hezekiya avyumvise, yitantamurirakw impuzu ziwe, yambara amagunira, yinjira mu ngoro y’Uhoraho.

²Maz’ atuma Eliyakimu umuzezwarugo, na Shebuna umukarani, n’abakuru bo mu baherezi, bambaye amagunira, k’ūvugishwa n’Imana Yesaya mwene Amosi.

³Baramubgira, bati Hezekiya aradutumye, ng’ Uyu musi n’umusi w’umubabaro n’ibihano n’ugushinyagurirwa, ngo Kukw abana bagomba kuvuka, kandi nta nkomezi zo kubavyara.

⁴Ngo Kumbure Uhoraho Imana yawe yokwumva amagambo ya Rabushake, ayo shebuja umwami w’i Ashuri yamutumye gutuka Imana nzima, Uhoraho Imana yawe akamuhana kubg’ ayo magambo yumvise. Ngo Nuko rero, shirak’ usenge, usabire amasigarira agisigaye.

⁵Nukw abantu b’umwami Hezekiya bashika kuri Yesaya.

⁶Yesaya arababgira, at’ Uku abe ari ko mubgira shobuja, mut’ Uku ni k’Uhoraho agize, ngo Ntutinye ayo magambo wumvise, abo baja b’umwami w’i Ashuri bamurogoseko.

⁷Ngo Rāba, azomushiramw’ uwundi mutima, kand’ azokwumva impuha zitume asubira mu gihugu ciwe; kandi ngw Azomwicishiriza inkota mur’ ico gihugu ciwe nyene.

⁸Nuko Rabushake asubira inyuma, asanga umwami w’i Ashuri ateye i Libuna; ajayo kuko yari yumvise ko yavuye i Lakishi.

⁹Bukeye umwami w’i Ashuri yumva bavuga Tiruhaka umwami w’i Etiyopiya, bat’ Araje kugutera. Avyumvise, atuma intumwa kuri Hezekiya,

¹⁰mut’ Uku abe ari ko muzobgira Hezekiya umwami w’i Buyuda, mut’ Iyo Mana wishimiye ntiz’ iguhende, ngw I Yerusalemu ntihazotangwa mu maboko y’umwami w’i Ashuri.

¹¹Muti Mbega ntiwumvise ukw abami b’i Ashuri bāgiriye ibihugu vyose, bakabirandura rwose? muti None wewe uzokira?

¹²Muti Mbeg’ imana z’amahanga, ayo ba sekuru bāranduye, zarakijije ab’ i Gozani n’i Harani n’i Resefu n’Abanyedeni baba i Telasari?

¹³Mut’ Umwami w’i Hamati ari hehe, cank’ umwami w’i Arupadi, n’umwami w’umurwa w’i Sefaravayimu, n’uw’ i Hena n’uw’ i Iva?

¹⁴Bukeye Hezekiya ashikirizwa ico cete n’izo ntumwa, aragisoma; maz’ aradūga, aja mu ngoro y’ Uhoraho, arakigaranzura, agishira imbere y’Uhoraho.

¹⁵Nuko Hezekiya asenga Uhoraho,

¹⁶at’ Uhoraho Nyen’ ingabo, Mana y’Abisirayeli, uvyagiye ku bakerubi, ni wewe Mana wenyene y’ibihugu vy’abami bose bo mw isi, ni wewe waremye ijuru n’isi.

¹⁷Tega ugutwi Uhoraho, wumve; tereza inyonga zawe, Uhoraho, witegereze; wumve amagambo yose ya Senakeribu yatumye ino kugutuka wewe Mana nzima.

¹⁸Uhoraho, n’ivy’ ukuri abami b’i Ashuri bārahoneje ayo mahanga yose n’ibihugu vyayo,

¹⁹bātereye imana zabo mu muriro; ariko ntizar’ imana nya mana, zar’ izakozwe n’intoke z’abantu mu biti no mu mabuye; ni co catumye bazihonnya.

²⁰Nuko none, Uhoraho Mana yacu, udukize, udukūre mu maboko yiwe, kugira ngw ibihugu vy’abami bose bo mw isi bamenye kw ari wewe Uhoraho wenyene.

²¹Maze Yesaya mwene Amosi atuma kuri Hezekiya, ut’ Uku ni k’ Uhoraho, Imana y’Abisirayeli, agize, ngw Ivyo wamutakambiye ku vya Senakeribu umwami w’i Ashuri, yavyumvise.

²²Ut’ Iri ni ryo jambo Uhoraho yamuvuzeko, at’ Umukobga w’inkumi w’i Siyoni aragukēngereye, agutwengeye mw ijigo; umukobga w’i Yerusalemu akuzungurije umutwe.

²³Uwo watonganije ukamurogotako ni nde? Ni nde wirahiye akararamango ukamurābana agakēngērwe? Erega ni jewe Uwera w’Abisirayeli.

²⁴Watumye abantu bawe kuntuka, jewe Umwami Imana, uravuga, ng’ Udūganye igitero cinshi c’imikogote yawe y’intambara, ushitse mu mpinga z’imisozi, no mu dushōka tw’i Lebanoni; ngo Wiciye ibiti vy’amasederi vyaho birebire, n’ivy’ akajwari vyaho vyiza‐vyiza; ngo Wahanyuragiye ushika ku mpinga yaho hirya cane, no mu biti vyo mw itongo ryaho rimera cane.

²⁵Ngo Wimvye amazi urayanywa; wakamishije inzūzi zo muri Egiputa ubgōro bg’ ibirenge vyawe.

²⁶Mbega ntiwumvise uko nabigenjeje kera, mbigabiye mu bihe vyashize? None narabishikije, kugira ng’ uhonnye ibisagara vyubakiwe inzitiro, ubihindure ibirundo vy’amasakamburira.

²⁷Ni co catumye abābibamwo baba imburamaboko, bagacika ivutu, bakamāramāra; bagacika nk’ubgatsi bgo ku gahinga, nk’ubgatsi bg’urumerera, nk’ivyatsi vyimejeje ku nzu, nk’ingano zirumvye zikir’ ibironge.

²⁸Ariko ndazi imyicarire yawe, n’ amaja n’amaza yawe, n’ingene wanshangashiriwe.

²⁹None rero kubg’ ubushangashirwe wangiriye, n’uko numvise ivy’ agashamango kawe, nzogutūngīra umurinda wanje mu mazuru, n’umujiginya wanje mu kanwa, ngusubize mu nzira wazananye.

³⁰Ut’ Ariko weho Hezekiya, iki ni co kizokubera ikimenyamenya: uyu mwaka muzorya ivyimejeje ubgavyo, mu mwaka ugira kabiri muzorya utunagano twavyo, mu mwaka ugira gatatu muze mubibe, mwimbure, mutere inzabibu, muziryeko.

³¹Kand’ amasigarira arokotse yo mu nzu ya Yuda bazokwongera gushōra imizi hasi, ahahera hejuru bahūrike ivyamye.

³²Kuko muri Yerusalemu hazosokoroka amasigarira, no ku musozi Siyoni have abārokotse: ishaka ry’Uhoraho Nyen’ ingabo rizoshitsa ivyo.

³³Uti Ni co gitumye Uhoraho avuga ivy’ umwami w’i Ashuri, ati Ntazoruha agera mur’ iki gisagara, canke ngw aharase n’umwampi, canke ngw ahatumbereze n’inkinzo, canke ngw aharunde ikirundo co kwūririrako.

³⁴Ut’ Inzira yazananye ni yo nyene izomusubizayo; ntazoruha agera mur’ iki gisagara, ni k’Uhoraho agize.

³⁵Ut’ Arik’ Uhoraho ngw Azozigama uyu murwa kugira ngw awukize, abikoze kubgiwe no kubg’ umusavyi wiwe Dawidi.

³⁶Maz’ umumarayika w’Uhoraho arasohoka, atera mu nsago z’Abashuri, yicamw’ ingabo ibihumbi ijana na mirongumunani na bitanu: abantu bavyutse mu gatondo basanga ingabo zose ar’ imihindigiti y’imivyimba.

³⁷Nuko Senakeribu umwami w’i Ashuri aca arataha, asubira inyuma, aja kuba i Ninewe.

³⁸Umusi ur’ izina, arikw arasenga mu ngoro y’ikigirwamana ciwe citwa Nisiroki, Adurameleki na Sharezeri abana biwe bamwicisha inkota; baca bahungira mu gihugu c’i Ararati. Maz’ umuhungu wiwe Esarihadoni asubira ku ngoma yiwe.