Read Bibliya Yera 1951 Yesaya 38 Bible Online

Yesaya 38 - Bibliya Yera 1951 bible

Yesaya 38

¹ Mur’ iyo misi Hezekiya ararwara agera hafi yo gupfa. Bukeye ūvugishwa n’Imana Yesaya mwene Amosi aza kuri we, aramubgira, at’ Uku ni k’Uhoraho agize, ngo Tunganya ivyo mu rugo rwawe, kuk’ ugira upfe, utagikira.

²Maze Hezekiya ahindukiriza amaso ku rusika, asenga Uhoraho,

³ati Tegēra, Uhoraho we, ni wibuke ingene nagendera mu vy’ukuri imbere yawe n’umutima utunganye, ngakora ivyo ubona kw ari vyiza. Hezekiya ararira cane.

⁴Maz’ ijambo ry’Uhoraho rishika kuri Yesaya,

⁵riti Genda ubarire Hezekiya, ut’ Uku ni k’Uhoraho, Imana ya sogokuruza Dawidi, agize: uti Ngo yumvise ugusenga kwawe, abonye n’amosozi yawe; ut’ Ehe ku misi yawe yongeyekw imyaka cumi n’itanu.

⁶Uti Kand’ azokurokorana n’iki gisagara, agukūre mu maboko y’ umwami w’i Ashuri; uti Kand’ azozigama iki gisagara.

⁷Ut’ Iki ni co kimenyamenya aguhaye, cemeza yukw azoshitsa ico avuze:

⁸eh’ agira ngw ahēre ah’ igitūtu kigeze ku ntambuko z’urugero rwashinzwe na Ahazi, agisubizanyeyo n’izuba intambuko cumi. Nukw izuba rigaruka intambuko cumi riva aho ryari rigeze kuri za ntambuko.

⁹Ibi ni vyo Hezekiya umwami w’Abayuda yanditse, amaze gukira indwara yiwe yari yararwaye.

¹⁰Naravuze, nti Ndakenyutse, ngiye guca mu marembo y’i kuzimu: Natswe imyaka yanje yar’ igisigaye.

¹¹Ndavuga, nti Sinzobona Uhoraho, Uhoraho mu gihugu c’abariho: Sinzokwongera kubona umuntu n’umwe wo mu baba mw isi.

¹²Inzu yanje ikūweho, imvanyweko nk’ukw ihema ry’ umwungere ritaragama. Ubugingo bganje ndabuzinze nk’uk’ ūjisha azinga; agira ancācūre ku mambo: Umusi ugeze kwīra azoba amaze kumpeza.

¹³Nariyumanganije nshitsa mu gatondo; arikw avunagura amagufa yanje yose nk’ ukw intambge igira: Umusi ugeze kwīra azoba amaze kumpeza.

¹⁴Ndanihīra nk’intamba ijwigira, canke nk’inyanana yānāga, Nkaniha nk’inuma iguguza; amaso yanje yaheze hejuru; Uhoraho, ndegeranijwe: nyishinga.

¹⁵Novuga ikindi ki kandi? Ni we yavuganye nanje, kandi ni we nyene yabikoze. Nuko nzogenda niyoroheje mu myaka yanje yose, nibuka umubabaro war’ umeze nk’umururazi mu mutima wanje.

¹⁶Mwami, ivyo ni vyo bibeshah’ abantu, Kandi mur’ ivyo vyonyene ni ho umutima wanje ubonera ubugingo. Nuko nkiza, umbesheho.

¹⁷Ereg’ icatumye ngira umubabaro w’umururazi mwinshi kwar’ ukugira ngo ndonke amahoro; Kand’ urukundo wakunze ubugingo bganje rwātumye ubukiza urwobo rw’ iborero, Kukw ivyaha vyanje vyose wabirengeje inyuma yawe.

¹⁸Kukw i kuzimu hadashobora kuguhimbaza, n’urupfu ntirushobora kugutazira, Kand’ abamanuka baja muri rwa rwobo ntibashobora kwishimira ukuri kwawe.

¹⁹Umuntu muzima, umuntu muzima ni we azoguhimbaza, nk’uko ndiko ndaguhimbaza uyu musi. Umuvyeyi azomenyesha abana biwe ingen’ ur’ uwo kwizigirwa.

²⁰Uhoraho, nkiza, Ni co kizotuma turirimba indirimbo zanje tuvugira inanga Turi mu ngoro y’Uhoraho imisi yose y’ukubaho kwacu.

²¹Kandi Yesaya yari yaravuze, ati Ni bābīre intore ibumbabumbge mu nsukoni, bayomeke ku kivyimba, kand’ azokira.

²²Kandi na Hezekiya yari yarabajije, at’ Ikimenyamenya kizoba iki, cerekana ko nzodūga nkaja mu ngoro y’Uhoraho?