Read Bibliya Yera 1951 Yesaya 39 Bible Online

Yesaya 39 - Bibliya Yera 1951 bible

Yesaya 39

¹ Ico gihe Merodaki‐Baladani mwene Baladani umwami w’i Babuloni arungikira Hezekiya ivyete n’ingemurano, kuko yari yumvise ko yarwaye agakira.

²Maz’ abātumwe Hezekiya abākīra neza, abereka mu nzu ah’ abīka ibintu vyiwe vy’igiciro, amafeza n’amazahabu n’imibavu n’amavuta y’igiciro kinini, no mu nzu hose ah’ abīka ivyo kurwanisha, n’ikintu cose co mu vyo atunze cariho. Nta kintu na kimwe co mu ngoro yiwe canke co mu gihugu ciwe cose Hezekiya atāberetse.

³Bukeye haza uwavugishwa n’Imana Yesaya ku mwami Hezekiya, aramubaza, at’ Abo bantu bavuze iki? Kandi baje i wawe bavuye hehe? Hezekiya aramwishura, ati Baje bavuye mu gihugu ca kure i Babuloni.

⁴Arongera aramubaza, ati Babonye ibiki mu ngoro yawe? Hezekiya aramwishura, at’ Ibiri mu ngoro yanje vyose bābibonye: nta kintu na kimwe co mu vyo ntunze ntāberetse.

⁵Maze Yesaya abarira Hezekiya, ati Ni wumve ijambo ry’Uhoraho Nyen’ ingabo.

⁶Eh’ imisi izoza, ibiri mu ngoro yawe vyose, n’ivyo ba sogokuruza bābītse bigashitsa n’ubu, bizosahurwa bijanwe i Babuloni; nta kintu na kimwe kizosigara, ni k’Uhoraho agize.

⁷Kand’ abahungu bawe uzoba wīkūriye mu nda wavyaye bazobajana, bagirwe inkone zo kuba mu ngoro y’umwami w’i Babuloni.

⁸Maze Hezekiya yishura Yesaya, at’ Ijambo ry’Uhoraho uvuze ni ryiza. Yongera kuvuga, ati Kazima hagiye kuba amahoro n’umutēkāno nkiriho.