Read Bibliya Yera 1951 Yesaya 40 Bible Online

Yesaya 40 - Bibliya Yera 1951 bible

Yesaya 40

¹Ni muhūmurize abantu banje, ni mubahūmurize, ni kw Imana yanyu igize.

²Muremēshe imitima y’ab’i Yerusalemu, mubabgire musemerera yukw intambara zaho zabangurukanye, k’ umwenda w’igicumuro cabo ushize, kukw ivyaha vyabo vyose babihaniwe kabiri n’ukuboko kw’ Uhoraho.

³Ijwi ry’ūsemerera, ati Ni mutegure inzira y’Uhoraho mu bugaragwa, musenere Imana yacu inzira y’iroro mu bgeranyange.

⁴Umwonga wose uzokwuzuzwa, n’umusozi wose n’akarambi bizoringanizwa; ahār’ udutumba hazotega, uduhogoro ducike ikiyaya.

⁵Maz’ ubgiza bg’Uhoraho buzohishurwa, kand’ abafise umubiri bose bazobubonera rimwe, kukw akanwa k’Uhoraho ari ko kabivuze.

⁶Ijwi ry’ūvuga, ati Semerera. Uwundi ati Nsemerere iki? Ut’ Abafise umubiri bose n’ivyatsi gusa, n’ubgiza bgabo bgose bumeze nk’amashurwe yo ku musozi:

⁷ivyatsi birūma, amashurwe agakabirana, kukw impwemu z’Uhoraho zībihūhako: n’ukuri abantu n’ivyatsi gusa.

⁸Ivyatsi birūma, amashurwe agakabirana, arikw ijambo ry’Imana yacu rizohorah’ ibihe bidashira.

⁹Yewe ubarira Siyoni ubutumwa bgiza, dūga umusozi muremure; yewe ubarira Yerusalemu ubutumwa bgiza, semerera cane ushimitse; semerera, ntutinye; ubgire ibisagara vy’i Buyuda, ut’ Eh’ Imana yanyu!

¹⁰Eh’ Uhoraho Imana azoza afise ubushobozi, kand’ ukuboko kwiwe kuzomutwarira: rāba, azoza azanye impēra, kand’ inyishu yiwe ir’ imbere yiwe.

¹¹Azoragira umukuku wiwe nk’umwungere, azoterura imyagazi mu maboko, ayitware mu gikiriza, kand’ izonsa azoziyobora buhoro‐buhoro.

¹²Ni nde yigeze kugera amazi y’ikiyaga ku rushi, akageresha ijuru itambge ry’intoke, akaronka ingero yokwirwamw’ umukungugu wo kw isi, akagera imisozi ku munzane, n’uturambi ku ngero?

¹³Ni nde yigeze kurōngōra Mpwemu w’Uhoraho, akamwigisha nk’ah’ ar’ umujanama wiwe?

¹⁴Ni nde Mpwemu yigeze kugīsha inama, kandi ni nde yigeze kumwigisha, akamwigisha kuroranya, akamwigisha ubgenge, akamwereka uburyo bgo gutahura?

¹⁵Ereg’ amahanga ameze nk’ ima ry’amazi riri mu mubindi, agereranywa n’umukungugu ufashe ku munzane; rāba aterura ibizinga vyo mu kiyaga nk’ah’ ar’ akantu gato k’ubusa.

¹⁶Kand’ i Lebanoni ntihoboneka inkwi zo gucana zirangije, kandi n’ibikōko vyaho ntivyorangiza kuba ikimazi co kwosa.

¹⁷Imbere yiwe amahanga yose ni nk’ubusa; kuri we agereranywa nk’ah’ ari hanyuma y’ubusa, nk’akarēre kagaragara.

¹⁸None rer’ Imana mwoyigereranya na nde, canke mwoyishushanya n’ishusho ki?

¹⁹Ikigirwamana, umuhinga arakiyaza, umucuzi w’izahabu akacomekakw izahabu, akagicurira imigufu y’ifeza.

²⁰Ūbaye mworo, atoshoboye ishikanwa ringana rirtyo, yironkera igiti kitazobora, maz’ akironderera umukozi w’umuhinga wo guhagarika ico kigirwamana, ngo kigume.

²¹Ntimwaribgabimenye? Ntimwaribgavyumve? Ntimwaribgabibarirwe uhereye mbere na mbere? Ntimwaribgabitahure uhereye ah’ itanguriro ry’isi ryashiriweho?

²²Iyo ni yo ivyagiye ahihese hejuru y’isi, ababa mw isi bameze nk’uduhori; ni yo igaranzura amajuru nk’impuzu y’agakangayenzi, ikayāgānura nk’ihema ryo kubamwo;

²³ni yo ihindura abaganwa ubusa; ikamanganya abacamanza bo mw isi, bakaba nk’akarēre kagaragara.

²⁴Bābaye bagiteragirwa, bābaye bakibibga, igishitsi cabo cābaye kigishinga imizi hasi, irabahūha, barakabirana, agashururu kabazingazinga nk’ibishingwe.

²⁵None rero mwongereranya na nde twongana? ni k’Uwera abajije.

²⁶Ni mwunamure amaso yanyu murābe hejuru, murābe uwaremye izo nyenyeri uw’ ari we, asohora ingabo zazo mu bitigiri: azihamagara zose mu mazina; kubg’ ububasha bg’ubushobozi bgiwe, no kubg’ inkomezi ziwe nyinshi, nta n’imwe ihara.

²⁷N’iki gituma uvuga, yewe Yakobo, ukiganyira, yewe Isirayeli, ut’ Inzira yanje inyegejwe Uhoraho, kand’ ut’ Ivyanje Imana yanje iravyirengagiza?

²⁸Ntiwaribgabimenye? Nturavyumva? Uhoraho n’Imana ihoraho, Umuremyi w’impera z’isi; ntadendebukirwa, nta ho aruha; ubgenge bgiwe ntibuserangurika.

²⁹Ni we aha inkomezi abadendebukiwe, kand’ ūtagira intege amwongeramw’ inkomezi.

³⁰Imisore yonadendebukirwa, ikaruha, n’imisore y’imikangara yokwicakw igatemba,

³¹arikw abīteze Uhoraho bazokwama biyubura mu nkomezi nsha; bazodūgisha amababa nk’ inkukuma,[11] biruke ntibaruhe, bagende ntibadendebukirwe.