Read Bibliya Yera 1951 Yesaya 41 Bible Online

Yesaya 41 - Bibliya Yera 1951 bible

Yesaya 41

¹Ni mucereze munyumvirize, yemwe ababa ku kiyaga; amahanga ni yiyubure, asubire mu nkomezi nsha, bīgire hafi; maze bahēreko bavuge: twegerane, tubūrane.

²Ni nde yavyukije ūva i burasirazuba, akāma anesha ukw ashingūye ikirenge? Amugomoreye amahanga, amuha kuganza abami, ayagomorera inkota yiwe iyahindura nk’umukungugu, n’umuheto wiwe uyahindura nk’ibishingwe bikubebga n’umuyaga.

³Arabatōta, agenda aja imbere ata nkomanzi; mber’ ajana inzira ibirenge vyiwe bitigeze gucamwo.

⁴Ni nde yabikoze akabishitsa, ahamagaye abantu uk’ urunganwe rwabo rwagenda rukurikirana uhereye kw itanguriro? Ni jewe Uhoraho, uwa mbere n’ uw’ iherezo, ni jewe nyene.

⁵Ababa ku kiyaga barabibonye, baratinya; abo ku mpera z’isi bahinda agashitsi: bīgira hafi, baraza.

⁶Umuntu wese yafashije umubanyi wiwe, akabarira mugenzi we, ati Gumya umutima.

⁷Nuk’ umuhinga aremesha umucuzi w’izahabu, ūryohoza inyundo akaremesha ūcurira kw ibuye, akavuga, at’ Ivyuma twabiteranije neza; maz’ akagikomeresha imisumari ngo kigume.

⁸Ariko weho Isirayeli musavyi wanje, Yakobo uwo natoranije, ruvyaro rwa Aburahamu umukunzi wanje:

⁹wewe uwo natoye, nkagukūra ku mpera z’isi, nkaguhamagara ng’uve ku mfuruka zayo, nkakubgira, nt’ Ur’ umusavyi wanje, naragutoranije sinagutaye;

¹⁰ntutinye, kuko ndi kumwe nawe; ntukihebure, kuko nd’ Imana yawe: nzogukomeza, nzogutabara, mbere nzokuramira n’ukuboko kw’i buryo kw’ukugororoka kwanje.

¹¹Eh’ abakurakiye bose bazotētērwa bamāramāre: abagutonganya bazocika ubusa, baranduke.

¹²Abaguhāririza uzobarondera, ubabure, kand’ abakurwanya bazocika ubusa, bakamangane.

¹³Kuko jewe Uhoraho Imana yawe nzogufata ukuboko kw’i buryo, nkubgire, nti Ntutinye, ndagutabara.

¹⁴Ntutinye, musiba we Yakobo, namwe nkehwa z’ Abisirayeli; nzogutabara, ni k’ Uhoraho agize; kand’ Uwera w’ Abisirayeli ni we mucunguzi wawe.

¹⁵Rāba nzoguhindura igisekuzo[12] gisha, gikarishe gifise amenyo: uzohūragura imisozi uyinoze, uzohindura uturambi nk’ umuguruka.

¹⁶Uzobigosora umuyaga ubitumure, agashururu kabishwiragize: nawe uzohimbarwa n’Uhoraho, wirate Uwera w’ Abisirayeli.

¹⁷Impahazwa n’ abakene barondera amazi bakayabura, ururimi rwabo rukagwa umwumwa; jewe Uhoraho nzobishura, jewe Imana ya Isirayeli sinzobaheba.

¹⁸Nzoziburura inzūzi mu mpinga z’imisozi y’uruharabuga, n’amasōko hagati mu myonga: ubugaragwa nzobuhindura ikidengeri c’amazi, n’igihugu cumye nzogihindura imbizi z’amazi.

¹⁹Mu bugaragwa nzohatera ibiti vy’amasederi n’ivy’ imishita n’ivy’ imihadasi n’ivya elayo; kandi mu gahinga nzohashira ibiti vy’akajwari n’ivy’ imitidari n’ivy’ imiteyashuri bikurane;

²⁰kugira ngo barābe, bamenye, bitegereze, batahurire hamwe yuk’ ukuboko kw’Uhoraho ari kwo gukoze ivyo, kandi k’Uwera w’Abisirayeli ari we yabiremye.

²¹Ni muzane imibūrano yanyu, ni k’Uhoraho agize; muserure inyanduruko zanyu zikomeye, ni k’Umwami wa Yakobo agize.

²²Ni babiserure, batubarire ibizoba: ni muvuge ivyabayeho ivy’ ari vyo, kugira ngo tuvyiyumvire, tumenye iherezo ryavyo; canke se mutwereke ibizoza.

²³Muvuge ibigiye kuzoza hanyuma kugira ngo tumenye ko mur’ imana: mupfe gukora iciza canke gukora ikibi, kugira ngo tukirābe twese, tujorerwe.

²⁴Rāba nta co murimwo, kandi n’igikorwa canyu n’ ubusa: ūbahitamwo aba abaye umuyobe.

²⁵Nahagurukije umuntu avuye i burārūko, kand’ araje; uwambaza izina ryanje avuye i burasirazuba: azokāta abaganza nk’ūkāta urwondo, canke nk’uk’ umubumvyi akāta ibumba.

²⁶Ni nde yabivuze uhereye ubga mbere ngo tubimenye, canke ni nde yabivuze kera kugira ngo tuvuge, tut’ Ivyo n’ivy’ ukuri? N’ukuri koko nta wabivuze, n’ukuri nta wavyerekanye, n’ukuri nta wumvise amajambo yanyu.

²⁷Ni jewe nabanje kubgira Siyoni, nti Ngabo baraje! I Yerusalemu mpatuma intumwa yo kubabgira ubutumwa bgiza.

²⁸Naritegereje, mbona ata wuriho; muri bo ubgabo nta n’ umujanama ariho yoshobora kunyishura n’ijambo na rimwe mbabajije.

²⁹Rāba bose ibikorwa vyabo nta co birimwo kandi n’ubusa gusa: ibishushanyo vyabo vyāvugutiwe mu nkero ni bga muyaga kandi n’ubusa.