Read Bibliya Yera 1951 Yesaya 42 Bible Online

Yesaya 42 - Bibliya Yera 1951 bible

Yesaya 42

¹ Nguyu umushumba wanje, uwo nama nshigikiye, uwo natoranije, ahimbara umutima wanje: nashize Mpwemu wanje kuri we; azoshikana amateka mu banyamahanga.

²Ntazoyogora, ntazosemerera, kandi ntazokwumvikanisha ijwi mu nzira.

³Ntazohohosha irenga rivunitse, n’urumuri ruyenga ntazoruzimya: azoshikana amateka mu vy’ukuri.

⁴Ntazodendebukirwa, ntazocika intege, gushitsa ah’ azoshingira amateka mw isi; ababa ku kiyaga bazokwitega ivyagezwe vyiwe.

⁵Uku ni kw Imana Uhoraho agize, uwaremye amajuru akayāgānura, uwagaranzuye isi n’ivy’ imera, uwahaye abantu bo muri yo guhumeka, kand’ abayigendako akabaha ubugingo:

⁶ati Jewe Uhoraho naguhamagaye mu bugororotsi: nzogufata nkuzigame, ngutange ng’ ubere abantu isezerano, n’abanyamahanga ubabere umuco;

⁷ng’ uhumūre impumyi, ng’ usohore imbohe mw ibohero, n’abicaye mu mwiza ngo bave mu nzu y’imbohe.

⁸Jewe nd’Uhoraho, iryo ni ryo zina ryanje; icubahiro canje sinzogiha uwundi, n’ishimwe ryanje sinzoriha ibigirwamana vy’ibibāzano.

⁹Rāba ivya mbere birashitse, kandi ndabamenyesha n’ibisha; bitaraseruka ndabibabgira.

¹⁰Ni muririmbire Uhoraho indirimbo nsha, n’ishimwe ryiwe uhereye ku mpera y’isi; muririmbe yemwe abagenda ku kiyaga, n’ibiri muri co vyose, namwe biyaya vyo kuri co, n’ababibamwo.

¹¹Ubugaragwa n’ibisagara vyabgo ni birangurure ijwi, n’imihana y’Abakedari; ababa i Sela baririmbe, basemerere bari ku mpinga z’imisozi.

¹²Ivyo ni vyubahe Uhoraho, vyamamaze ishimwe ryiwe mu baba ku kiyaga.

¹³Uhoraho azoja gutera nk’umuhizi, arwanane ishaka nk’intōre mu ntambara: azobīrahira, mber’ azobīvuga n’ijwi rirenga; abansi biwe azobagirira ibikomeye.

¹⁴Eh’ aho nahoreye; naracereje, ndiyumanganya: noneho ndataka cane nk’umugore ari mu bise, nzohezagirika nsēmagiritse.

¹⁵Nzotongora imisozi n’uturambi, numishe ivyatsi vyose vyaho; mu nzūzi nzohahindura i musozi, kandi nzokamya ibidengeri.

¹⁶Nzozana impumyi mu nzira zitazi, ndazirōngōre mu ndari zitari zizi, nzohindura umwiza ube umuco imbere yazo, n’ahagoramye nzohagorora. Ivyo nzobishitsa, sinzobaheba.

¹⁷Arikw abīshimira ibishushanyo vy’ibibāzano bazosubizwa inyuma, bazotētērwa cane, bo n’ababgira ibishushanyo vyāvugutiwe mu nkero, bati Mur’ imana zacu.

¹⁸Mwa bipfamatwi ni mwumve; mwa mpumyi ni murābe kugira ngo mwitegereze.

¹⁹Ni nde mpumyi atar’ umushumba wanje, canke gipfamatwi nk’intumwa yanje ntuma? Ni nde mpumyi nk’ umugendanyi wanje, kand’ ahumye nk’umushumba wanje, jewe Uhoraho?

²⁰Abona vyinshi yamara ntiyitegereza; amatwi yiwe arazibūtse, yamara ntiyumva.

²¹Vyahimbaye Uhoraho kudūza ivyagezwe no kuvyubahiriza, kubg’ ukugororoka kwiwe.

²²Aba bantu n’abantu bāsahuwe, bānyazwe inkōkōre; bose bāratezwe, bagwa mu vyobo, kandi babanyegeje mu mabohero; n’abo gucika inyagano, ata wo kubakiza; n’abo gucika inyagano, ata wo kuvuga ati Barekure.

²³Ni nde muri mwebge yotegera ugutwi ivyo, agaca uruma akumva ivy’ igihe kizoza?

²⁴Ni nde yatanze aba Yakobo ngo banyagwe, kand’ Abisirayeli akabaha ababanyaga? Mbega s’Uhoraho, uwo twacumuyeko, kandi ntitwemeye kugendera mu nzira ziwe, ntitwumviye ivyagezwe vyiwe?

²⁵Ni co catumye aturekurirak’ uburake bgiwe bg’inkazi n’intambara zikomeye; bikaduturira impande zose, kandi ntitwabimenya, vyaraduturiye yamara ntitwabishirak’ umutima.