Read Bibliya Yera 1951 Yesaya 43 Bible Online

Yesaya 43 - Bibliya Yera 1951 bible

Yesaya 43

¹Ariko none, uku ni k’Uhoraho agize, uwakuremye, yewe Yakobo, kand’ akakubumba, yewe Isirayeli, ati Ntutinye, kuko nagucunguye, naguhamagaye izina, ur’ uwanje.

²Ni waca mu mazi nzoba ndi kumwe nawe, no mu nzūzi ntizizokurengera; ni waca mu muriro ntuzosha, kandi n’urubeya ntiruzokubabura.

³Kuko jewe nd’ Uhoraho Imana yawe, Uwera wa Isirayeli, Umukiza wawe. Nagutangiriye Egiputa kw incungu, Etiyopiya na Seba nahahevye kubgawe.

⁴Kuko wabaye uw’ igiciro kinini mu nyonga zanje, n’umwubahwa, nanje nkagukunda, ni co gitumye nzoheba abantu kubgawe, n’amahanga kubg’ ubugingo bgawe.

⁵Ntutinye, kuko ndi kumwe nawe; nzozana uruvyaro rwawe ndarukūye i burasirazuba, nzogukoraniriza hamwe ndagukūye i burengerazuba;

⁶nzobgira i burārūko, nti Barekure, n’i bumanuko, nti Ntubīmane; zana abahungu banje ubakūye kure, n’abakobga banje ubakūye ku mpera y’isi;

⁷n’umuntu wese yitirirwa izina ryanje, uwo naremeye icubahiro canje: naramubumvye, mbere naramuremye.

⁸Sohora impumyi zifise amaso, n’ibipfamatwi bifise amatwi.

⁹Amahanga yose n’akoranywe, amoko yose n’ahūrire hamwe: ni nde muri bo yoshobora kubimenyekanisha, akatwereka ivyabayeh’ ubga mbere? Ni bazane ivyabona vyabo batsindishirizwe; canke ni bumve bemere, bati N’ivy’ ukuri.

¹⁰Ni mwebge vyabona vyanje, ni k’Uhoraho agize, n’abasavyi banje natoranije, kugira ngo mummenye kandi munyizere, kandi mutahure ko nd’ uwo ndi we: nta mana yigeze kubumbga hirya yanje, kandi nta yizonza mu nyuma.

¹¹Jewe, jewe nyene nd’ Uhoraho; kandi nta wundi Mukiza atari jewe.

¹²Ni jewe nabitāngāje, ni jewe nakijije, ni jewe nabimenyekanishije, kandi nta yindi mana yariho muri mwebge: ni co gituma ari mwebge vyabona vyanje, ni k’Uhoraho agize, kandi ni jewe Mana.

¹³Eka ndi yo, uhereye no ku musi w’itanguriro; kandi nta woshobora kugira ico arokora ngw agikūre mu kuboko kwanje. Jewe ico nkora, ni nde yokibuza?

¹⁴Uku ni k’Uhoraho agize, Umucunguzi wanyu, Uwera w’ Abisirayeli, ati Natumye i Babuloni kubganyu, nzomanura abaho bose ar’ impunzi, ni bo Bakaludaya, mu māto bishimira.

¹⁵Ni jewe Uhoraho, Uwera wanyu, Umuremyi wa Isirayeli, Umwami wanyu.

¹⁶Uku ni k’Uhoraho agize, ni we aca inzira mu kiyaga, n’indari mu mazi asuriranya,

¹⁷agashikimura imikogote n’amafarasi, ingabo n’abahizi; birambaraye hamwe, ntibizovyuka ukundi; biradegeye, birazimye nk’ urutambi:

¹⁸ati Mwoye kwibuka ivya mbere, kandi ntimwiyumvire ku vya kera.

¹⁹Ehe ngira nkore ikintu gisha: ko kigira giseruke ubu, mbega ntimuzokimenya? Nzoca inzira no mu bugaragwa, ntembeshe inzūzi ahagadutse.

²⁰Ibikōko vyo mw ishamba bizonyubaha, bo n’imbgebge n’ibisīga vyitwa imbuni, kuko ntanze amazi mu bugaragwa, ngatembesha inzūzi ahagadutse, kugira ngo nnyweshe abantu banje, bamwe natoranije,

²¹abantu niremeye kugira ngo bamenyekanishe ishimwe ryanje.

²²Ariko rero, Yakobo we, ntiwanyambaje; Isirayeli we, waramparurutse.

²³Ntiwanzaniye imyagazi y’ibimazi vyawe vyo kwosa, kandi ntiwanyubahishije ibimazi vyawe. Sinakugoje kunshikanira amashikanwa, sinakuruhishije imibavu.

²⁴Nta vyitwa kanehe imota neza wanguriye amahera, kandi ntiwampāgije ibinure vy’ibimazi vyawe; ariko ni wewe wangoje ivyaha vyawe, mbere wanduhishije ibigabitanyo vyawe.

²⁵Jewe, ni jewe nyene nsibanganya ibicumuro vyawe kubganje nyene, kand’ ivyaha vyawe sinzovyibuka ukundi.

²⁶Nyibutsa, tubūrane; shinga urubanza rwawe, kugira ng’utsindishirizwe.

²⁷Sogokuruza wa mbere yakoze icaha, n’abashikirwa bawe bancumuyeko.

²⁸Ni co kizotuma ntētereza abakuru b’ahēra, kandi Yakobo nzomuhindura ikivume, na Isirayeli igitutsi.