Read Bibliya Yera 1951 Yesaya 44 Bible Online

Yesaya 44 - Bibliya Yera 1951 bible

Yesaya 44

¹Yamara noneh’ umve, yewe Yakobo musavyi wanje, yewe Isirayeli uwo natoranije:

²uku ni k’Uhoraho agize, uwakuremye akakubumba uhereye ukiri mu nda, kand’ ari we azogutabara: ati Ntutinye, yewe Yakobo musavyi wanje, yewe Yeshuruni uwo natoranije.

³Kuko nzosuka amazi ku gihugu gifise inyota, n’imigezi kw isi yumye; nzosuka Mpwemu wanje ku ruvyaro rwawe, n’umugisha wanje ku buzukuruza bawe:

⁴bazomera hagati mu vyatsi nk’ ibiti bimeze i ruhande y’inzūzi.

⁵Umwe azovuga, ati Nd’ uw’ Uhoraho, uwundi azokwiyita izina rya Yakobo, uwundi azokwiyandikira n’ukuboko kwiwe kw ar’ uw’ Uhoraho, yiyita izina rya Isirayeli.

⁶Uku ni k’Uhoraho agize, Umwami wa Isirayeli, ari we Mucunguzi wiwe, Uhoraho Nyen’ ingabo: ati Nd’ uwa mbere kandi nd’ uw’ iherezo, kandi nta yindi Mana atari jewe.

⁷Ni nde ahwanye nanje? N’abiserure, abitāngāze, abishire ngaho imbere yanje! Uhereye kera hose ni nde yamenyekanishije ibizoba? Ibigira bize n’ibizobaho ni babivuge!

⁸Mwoye gutinya canke guhagarika imitima: kera sinabibabariye nkabiserura? Namwe mur’ ivyabona vyo kunshingira intahe. Har’ iyindi Mana atari jewe? Mbere nta kindi gitandara kiriho: jewe nta co nzi.

⁹Abaryohora ibishushanyo bibājwe bose n’ubusa; n’ ibintu vyabo vy’igikundiro nta co bizomara, n’ivyabona vyabo ubgavyo nta co bibona, nta co bimenya; kugira ngo bamāramāre.

¹⁰Ni nde yaryohoye ikigirwamana, agacura igishushanyo kitagira ico kimaze?

¹¹Ereg’ abo bafatanije bose bazomāramāra; kand’ abo bahinga n’abantu buntu: bose ni bakoranire hamwe, baze ahabona; bazogira ubgoba, bamāramārire hamwe.

¹²Umucuzi acura incabiti, akayivugutira mu makara, akayikubitisha inyundo, akayicurisha ukuboko kwiwe kw’ inkomezi: yamara yasonza, agacika intege; atanyoye amazi, agaheza akagwa umwumwa.

¹³Umubāji arāmvura umugozi ku giti akahacisha ikaramu, akakibāza n’imbāzo, akakigera n’icuma kigera, akakibāza mw ishusho y’umuntu, kikagira akaranga nk’ak’ umuntu, kugira ngo kibe mu nzu.

¹⁴Yīcīra ibiti vy’amasederi, akābīra ivy’ imizo n’ivy’ imyeloni, akīhitiramw’ igiti kimwe mu vyo mu kibira. Atera igiti c’umworeni, imvura ikakimeza.

¹⁵Hanyuma kikazobera umuntu inkwi zo gucana, azozābīra azōte, mber’ arazicana agacumba umutsima: kand’ akakibāzamw’ ikigirwamana akagisenga, akibāzamw’ igishushanyo akacikubita imbere.

¹⁶Igihimba caco agicanisha umuriro, ikindi gihimba kimuhishiriza inyama akarya; agatara izishinze agahāga; mber’ akōta, akavuga, ati Ha ha! nshize imbeho, mbonye umuriro!

¹⁷Maz’ igisigaye akagihindura ikigirwamana, ar’ igishushanyo ciwe yabāje: akacikubita imbere akagisenga, akacambaza, ati Nkiza, kuk’ ur’ imana yanje.

¹⁸Nta co bazi, kandi nta co biyumvira, kukw amaso yabo yahumye ngo ntibashobore kubona, n’imitima yabo ngo ntibashobore gutahura.

¹⁹Erega nta wibuka, nta wumenya ngw atahure, ngw avuge at’ Igihimba caco nagicanishije umuriro, nacumvye umutsima ku makara yaco, ntarakw inyama ndazirya; mbeg’ igisigaye nogikorakw ikintu nk’ico c’ubuyobe? Mbega nokwikubita imbere y’ingiga y’igiti?

²⁰Ūshima umunyota gusa, umutima wibesha uba wamujimije, bituma adashobora gukiza ubugingo bgiwe, ngw aruhe yibaza, ati Mbeg’ ico mfise mu kuryo kwanje s’ikinyoma?

²¹Wibuke ivyo, yewe Yakobo, yewe Isirayeli, kuk’ ur’ umusavyi wanje. Ni jewe nakubumvye, ur’ umusavyi wanje: yewe Isirayeli sinzokwibagira.

²²Neyuye ibicumuro vyawe nk’igicu gitwaye intunda, n’ivyaha vyawe nk’igicu: garuka kuri jewe, kuko nagucunguye.

²³Muririmbe, mwa majuru, kuk’ Uhoraho abikoze; wa bgina bg’isi usemerere; ni muturike muririmbe, mwa misozi mwe, nawe kibira, n’igiti cose kirimwo: kuk’ Uhoraho yacunguye Yakobo, kand’ azokwihesha icubahiro muri Isirayeli.

²⁴Uku ni k’Uhoraho agize, Umucunguzi wawe, uwakubumvye uhereye ukiri mu nda, ati Ni jewe Uhoraho ndema vyose, nāguye ijuru nd’umwe, ngaranzura isi: har’ uwo twari kumwe?

²⁵Indagu z’abanyabinyoma ndazihindura ubusa, abapfumu nkabatēza ibisazi, nsubiza inyuma abanyabgenge, ubgenge bgabo nkabuhindura ubupfu.

²⁶Nkomeza ijambo ry’umusavyi wanje, ngashitsa inama z’intumwa zanje, mvuga ivya Yerusalemu, nti Hazokwongera gutūrika; n’ivy’ ibisagara vy’i Buyuda, nti Bizokwubakwa, kandi nzovyutsa ahāsenyutse haho.

²⁷Mbarira idamba, nti Kama, kandi nzokamya inzūzi zikujamwo;

²⁸mvuga ivya Kuro, nti N’umwungere wanje, azoshitsa ivyo ngomba vyose; nkavuga ivya Yerusalemu, nti Hazokwubakwa; nkabarira urusengero, nt’ Itanguriro ryawe rizoshirwaho.