Read Bibliya Yera 1951 Yesaya 45 Bible Online

Yesaya 45 - Bibliya Yera 1951 bible

Yesaya 45

¹Ibi ni vyo jewe Uhoraho mbgira uwo narobanuje amavuta, ni we Kuro, uwo mfashe ukuboko kw’i buryo, kugira ngo nsiribange amahanga imbere yiwe, kandi nzokenyurura inkindi z’abami, kugira ngo ndamwugururire inzugi imbere yiwe, kand’ amarembo ntazokwugarirwa:

²nti Nzoja imbere yawe, kand’ ahar’ uduhogoro nzohasena; nzomenagura inzugi z’imiringa, nzovunagura ibihindizo vy’ivyuma:

³kandi nzoguha itunga rihishijwe mu mwiza, n’ubutunzi bunyegejwe mu mpisho, kugira ng’ umenye kw ari jewe Uhoraho nguhamagaye mw izina, jewe nyene Imana y’Abisirayeli.

⁴Kubga Yakobo umusavyi wanje, Isirayeli uwo natoranije, nguhamagaye mw izina, nakwise iry’ icubahiro, nah’ utaribgammenye.

⁵Ni jewe Uhoraho, nta wundi; atari jewe nta yindi Mana iriho. Nzogukenyeza nah’ utigeze kummenya,

⁶kugira ngo bamenye uhereye i burasirazuba ugashitsa i burengerazuba yukw ata yindi atari jewe: ni jewe Uhoraho, kandi nta wundi.

⁷Ni jewe nkomoko y’umuco, nd’ umuremyi w’umwiza; nd’ isōko y’impore, nd’umuremyi w’ivyago: ni jewe Uhoraho nkora ivyo vyose.

⁸Mwa majuru, murekure ukugororoka kuve mw ijuru, n’ikirēre kigucuncubure: isi yasame, itengengerekw agakiza, ikamezanye n’ukugororoka: ni jewe Uhoraho nabiremye.

⁹Azobona ibara, ūhāririza uwamuremye, kand’ ar’ akajo mu tujo two kw isi! Mbeg’ ibumba ryobaza ūrikw araribumba, riti Har’ ico wobumba? Cank’ igikorwa ukora covuga kw ata maboko ufise?

¹⁰Azobona ibara, ūbaza se, at’ Ubgo wotera inda? akabaza nyina, at’ Ubgo wotwara inda?

¹¹Uku ni k’Uhoraho agize, Uwera wa Isirayeli, Umuremyi wiwe, ati Mbega murambaza ibizoza? Murangaba ku vy’abahungu banje n’ igikorwa c’amaboko yanje?

¹²Ni jewe naremye isi, kandi ndayiremerakw abantu; ni jewe nibambiye amajuru n’amaboko yanje, kand’ ingabo z’inyenyeri zose zo kuri yo ndazigaba.

¹³Ni jewe mpagurukije Kuro mu bugororotsi, kandi nzororanya inzira ziwe zose; ni we azokwubaka umurwa wanje, kandi ni we azorekura abantu banje bānyazwe, adahongewe cank’ adahērewe, ni k’Uhoraho Nyen’ ingabo agize.

¹⁴Uku ni k’Uhoraho agize, at’ Abakozi ba Egiputa n’abadandaza ba Etiyopiya n’abagabo barebare b’i Sabe bazoza bagukomere amashi, bazoba abawe, bagukurikire, bazoza bari mu minyororo, bakwikubite imbere, bagutakambire, bati N’ukuri Imana iri muri wewe, kandi nta yindi iriho, nta yindi Mana.

¹⁵N’ukuri ur’ Imana yihishije, wewe Mana y’ Abisirayeli, Umukiza.

¹⁶Bazotētērwa, bamāramāre bose, bazomāramārira hamwe, abakora ibishushanyo vy’ibigirwamana.

¹⁷Arikw Abisirayeli bazokizwa n’Uhoraho, abakirishe agakiza kadashira: ntimuzotētērwa, canke ngo mumāramāre, no gushitsa ibihe bitazoshira.

¹⁸Uku ni k’Uhoraho agize, uwaremye amajuru, ni we Mana; uwabumvye isi akayirema; yarayikomeje, ntiyayiremye ngw ibek’ ubusa gusa, ariko yayibumvye kugira ngw ibekw abantu: ati Ni jewe Uhoraho, kandi nta wundi.

¹⁹Sinavugiye mu mpisho, ahantu ho mu gihugu c’umwiza; nta ho nabariye uruvyaro rwa Yakobo, nti Ni mundonderere ubusa. Jewe Uhoraho mvuga ibiroranye, nsigura ivy’ ukuri.

²⁰Ni mukorane, ni muze, mwīgirire hafi hamwe, mwebge abarokotse bo mu mahanga: abīkorera igiti c’ikigirwamana cabo c’ikibāzano, bagasenga imana idashobora gukiza, nta bgenge bagira.

²¹Ni mubivuge, ni mubizane, mbere ni baje inama hamwe: ni nde yerekanye ivyo uhereye mu bihe vya kera? Ni nde yabimenyekanishije uhereye kera? Si jewe, Uhoraho? Kandi nta yindi Mana atari jewe, Imana igororotse kand’ Umukiza; nta yindi atari jewe.

²²Ni muntumbere mukizwe, mwa mpera zose z’isi: kukw ari jewe Mana, ata yindi.

²³Ndirahiye, ijambo ry’ukuri rivuye mu kanwa kanje ritazokwirahuruzwa, yukw amavi yose azompfukamira, n’indimi zose zizondahira.

²⁴Uhoraho, muri we honyene ni ho har’ ukugororoka n’inkomezi, ni ko bazomvuga; kuri we ni ho abantu bazoza; kand’ abamurakiye bose bazotētērwa.

²⁵Uhoraho, muri we ni ho uruvyaro rwose rwa Isirayeli ruzotsindanishiririzwa, rukamwirata.