Read Bibliya Yera 1951 Yesaya 47 Bible Online

Yesaya 47 - Bibliya Yera 1951 bible

Yesaya 47

¹Manuka wicare mu mukungugu, wa nkumi y’i Babuloni; wa mukobga w’Abakaludaya, icara hasi hatari ku ntebe y’ubgami, kuk’ utazokwongera kuvugwa k’udibamye canke ko wāmikaye.

²Fata urusyo usye, utwikurure mu maso hawe; kūra imvune zawe, ukūre impuzu ushitse mu bibero, ujabuke inzūzi.

³Ubgambure bgawe buzotwikururwa, mber’ ibiteye isoni vyawe bizoboneka; nzokwīhōra, kandi sinzogira akagongwe,

⁴ni k’Umucunguzi wacu agize, izina ryiwe n’Uhoraho Nyen’ ingabo, Uwera w’Abisirayeli.

⁵Icara wumaniwe, wibembeteranye mu mwiza, wa mukobga w’ Abakaludaya we, kuk’ utazokwongera kwitwa Umugabekazi w’ibihugu.

⁶Nari narakiye abantu banje, mpindura igihumane ishamvu yanje, ndabakugomorera; nawe nta kagongwe wabagiriye, abatāma wabatwaje amanyama birengeje.

⁷Urīyāga, uti Nzoba umugabekazi ibihe bidashira. Ivyo ntiwarushe ubishirak’ umutima, canke ngo wibuke iherezo ryavyo.

⁸Nuko rero ni wumve ibi, wewe wihaye ibihimbaro, ukicara ata co winona, ukīyāga mu mutima, uti Ni jewe ndiho, nta wundi atari jewe; sinzosigara nd’ umupfakazi, kandi sinzomenya kubura abana ic’ ari co.

⁹Arikw ivyo vyompi bizokugwako umusi umwe, kubura abana no gupfakara: bizogushikako uko vyakabaye, nah’ ubupfumu bgawe bgoba bginshi bute, n’ amahezayo yawe akaba isinzi.

¹⁰Kuko widibamiye mu bubi bgawe ata co wicura, ukavuga, uti Nta wumbona; ubgenge bgawe n’ukumenya kwawe ni vyo bikujimije; wīyāga mu mutima, uti Ni jewe ndiho, nta wundi atari jewe.

¹¹Ni co kizotuma ivyago bigushikako, ntumenye amahezayo yavyo; ibara rikugweko, ntushobore kuryīkūrako, kand’ ubugesera utazi buzokuzako giturumbuka.

¹²Nuko hagararana amahezayo yawe, n’ivy’ ubupfumu bgawe uko bingana, ivyo wakobereje uhereye mu buto bgawe: namba kumbure vyogira ico bikumarira, namba kumbure vyogushoboza.

¹³Wacumukujwe n’abakugīra inama benshi; abaragurisha ijuru, n’abaragurisha inyenyeri, na bamwe bahora bakumenyesha ibigira bikubeko, uk’ ukwezi kubonetse, ni baze bagukize.

¹⁴Rāba bazoba nk’ibishingwe, umuriro uzobaturira; ntibazokwikiza inkomezi z’ imbeya zawo; ntuzoba amakara yo kwota, cank’ umuriro wo kwicarako.

¹⁵Uko ni ko bizokubera, ivyo wakobereje; abādandaza nawe uhereye mu buto bgawe bazokwīgīra, umuntu wese yīgīre ahiwe; ntihazogira ūgukiza.