Read Bibliya Yera 1951 Yesaya 48 Bible Online

Yesaya 48 - Bibliya Yera 1951 bible

Yesaya 48

¹Ni mwumve ibi, yemwe nzu ya Yakobo, abitwa izina rya Isirayeli, bakanduruka mu rura rwa Yuda; abarahira izina ryanje Uhoraho, bakavuga Imana ya Isirayeli, ariko mu bitar’ ivy’ ukuri canke mu vy’ukugororoka.

²Kuko biyita abo ku murwa wera, bakishingikiriza ku Mana ya Isirayeli; Uhoraho Nyen’ ingabo ni ryo zina ryanje.

³Kera navuze ibizoba bitaraza; ni koko vyavuye mu kanwa kanje, ndavyerekana: kandi nabikoze giturumbuka, birashika.

⁴Nari nzi k’udakūrwa kw ijambo, kandi kw izosi ryawe ari nk’umutsi umeze nk’icuma, n’uruhanga rwawe ari nk’umuringa:

⁵ni co catumye mbikubarira uhereye kera, bitaraba nkabikwereka; kugira ngo woye kuvuga, uti Ya mana yanje ni yo ibikoze, ni ca gishushanyo canje c’ikibāzano, ni ca gishushanyo canje cavugutiwe mu nkero, ni co cabigeze.

⁶Waravyumvise, non’ ehe vyitegereze vyose: mbega ntuvyemera? Guhēra ubu ngira mbereke ibisha, vyari bihishijwe, utigeze kumenya.

⁷Bigizwe ubu nyene, s’ivya kera: kugeza uyu musi ntiwigeze kuvyumva; kugira ngo woye kuvuga, ut’ Erega nari nsanzwe ndabizi.

⁸N’ukuri koko ntiwaribgavyumve, ntiwaribgabimenye, mber’ uhereye kera ntivyaribgashike mu matwi yawe: kuko nari nzi k’ur’ umuryarukanyi w’agahebuza, kandi wiswe ikigāba uhereye ukiva mu nda.

⁹Kubg’ izina ryanje reka ntenyenye kukurakira; kubg’ ishimwe ryanje reka nkwihanganire, noye kukurandura.

¹⁰Ehe ndakuvugutiye, ariko si nk’ifeza; nkugeragereje mu ruganda rwo kubabazwa.

¹¹Kubganje, mbere kubganje nyene nzobikora; n’iki cotuma izina ryanje rikēngērwa? Kand’ icubahiro canje sinzogiha uwundi.

¹²N’unyumve, yewe Yakobo, yewe Isirayeli nahamagaye; ndi We. Nd’ uwa mbere kandi nd’ uw’ iherezo.

¹³Mber’ ukuboko kwanje ni kwo kwashizeh’ itanguriro ry’isi, n’ukuboko kwanje kw’i buryo ni kwo kwabamvye ijuru: iyo mbihamagaye bivira hasi rimwe.

¹⁴Mwese ni mukorane mwumve. Ni nde wo muri bo yigeze kuvuga ivyo? Uwo jewe Uhoraho nkunda azogirira Babuloni uko ngomba, kand’ ukuboko kwiwe kuzotera Abakaludaya.

¹⁵Ni jewe, jewe nyene nabivuze; mbere naramuhamagaye, ndamuzanye, kand’ urugendo rwiwe ruzogira amahirwe.

¹⁶Ni mwīgire hafi mwumve ibi: uhereye mw itanguriro nta ho navugiye mu mpisho; uhereye aho vyabereyeho, nariho: kandi non’ Uhoraho Imana antumanye na Mpwemu wiwe.

¹⁷Uku ni k’Uhoraho Umucunguzi wawe, Uwera w’ Abisirayeli agize, ati Ni jewe Uhoraho Imana yawe, nkwigisha ibikugirira ikimazi, nkakurōngōra mu nzira ukwiye gucamwo.

¹⁸Iy’ uba warumviye ivyagezwe vyanje, uba waragize amahoro ameze nk’ uruzi, kand’ ukugororoka kwawe kuba kwarabaye nk’imipfunda y’ ikiyaga;

¹⁹kand’ uruvyaro rwawe rwobaye nk’umusenyi, n’abava mu nda yawe bobaye nk’umuhekeheke wawo; izina ryawe ntiryorandutse canke ngo rizimangane imbere yanje.

²⁰Ni muve i Babuloni, muhunge muve mu Bakaludaya, muvuge ibi, mubikwize, muvyamamaze gushitsa ku mpera y’isi, mubivugishe ijwi ry’indirimbo, mut’ Uhoraho acunguye umusavyi wiwe Yakobo.

²¹Kand’ aho yabarōngōra mu bugaragwa nta ho bishwe n’inyota; yabatembeshereje amazi ava mu gitandara; yasatuye igitandara, amazi arasendanisha.

²²Nta mahoro y’abanyavyaha, ni k’Uhoraho agize.