Read Bibliya Yera 1951 Yesaya 5 Bible Online

Yesaya 5 - Bibliya Yera 1951 bible

Yesaya 5

¹Hinge ndirimbe ivy’ umukunzi wanje, indirimbo y’uwo nkunda ivuga ivy’ uruzabibu rwiwe. Umukunzi wanje yagize uruzabibu ku musozi umera cane:

²yari yararurimiriye, akūramw’ amabuye, ateramw’ imizabibu y’ubgoko bgiza, arwubakamw’ umutara hagati, arwimbamwo n’ikinogo, agikora bga bgato: nuko yaziga ko ruzokwama inzabibu, ariko rwama ibijabija vy’inzabibu.

³None rero mwa baba i Yerusalemu, namwe bagabo b’i Buyuda, ndabinginze mudutātūre, twe n’uruzabibu rwanje.

⁴Ico nari gukorera uruzabibu rwanje ntārukoreye n’igiki? Ko naziga ko ruzokwama inzabibu, n’iki catumye rwama ibijabija vy’inzabibu?

⁵None rero reka mbereke ivyo ngira ngirire uruzabibu rwanje: ngira nkūreh’ ururombero rwarwo, maze rwonwe ruvumburwe; kandi nsambure uruzitiro rwarwo, rucibge iyondoyondo;

⁶kandi ndaruririke; ntiruzotuturirwa, ntiruzorimirirwa, ariko ruzomeramw’ imikere n’amahwa; kandi nzobuza ibicu vyoye kurugwishakw imvura.

⁷Kuk’ uruzabibu rw’Uhoraho Nyen’ ingabo ari rwo nzu ya Isirayeli, kand’ abagabo b’i Buyuda ari bo muzabibu wamuhimbara; kandi yabazigamw’ imanza zibereye arikw abasangamw’ uguhahaza: yabazigamw’ ubugororotsi arikw abasangamw’ amaborogo.

⁸Bazobona ibara, abomeka ingo ku zindi bakīkumirakw amatongo, gushitsa hatagira ahasigaye, mukaba ari mwebge mwenyene musigaye mwiganziye hagati mu gihugu!

⁹Uhoraho Nyen’ ingabo yavugiye mu matwi yanje, ati N’ukuri ingo nyinshi zizoba imisaka, mbere na nini‐nini nziza zizosigara ata wukizibamwo.

¹⁰Kukw imirima cumi y’imizabibu izoreta umubindi umwe, kand’ igisamba cagezwemw’ imbuto kizozana inkōko gusa.

¹¹Bazobona ibara, abazindurwa mu gatondo no kwirukira ibiboreza, bakarāra kw ijoro gushitsa vino ibaboreje!

¹²Mw inywa ryabo bagira inanga n’ikembe n’agashako k’ingoma n’umwironge na vino; yamara ntibītegereza igikorwa c’Uhoraho, ntibashira umutima ku gikorwa c’amaboko yiwe.

¹³Ni co catumye abantu banje bajanwa ar’ inyagano, ata co bigeze bamenya: abanyacubahiro bo muri bo bishwe n’inzara, kand’ ishengero ryabo ryose ryāgatuwe n’inyota.

¹⁴Ni co catumye i kuzimu harangara, hāsamitse akanwa kaho birengeje urugero: maz’ abakire b’i Yerusalemu na ba nyarucari baho barokeramwo, bakiri mu gahimbo, bavuza urwamo.

¹⁵Abantu bazosubizwa hasi, abahambaye bacishwe bugufi, abībone bacurike amaso hasi:

¹⁶arik’ Uhoraho Nyen’ ingabo azoba ashizwe hejuru n’imanza ziroranye, kand’ Imana Yera izokwerekanisha ukwera kwayo ubugororotsi.

¹⁷Ico gihe imyagazi y’intama izorisha nk’ah’ ari mu canya cayo, kand’ ivyo mu matongo y’abakire abayerera ni bo bazobirya.

¹⁸Bazobona ibara, abīkwegera igihano, bagikwegesheje umugozi w’ibinyoma, bakīkwegera akaziri nk’aho bagakwegesheje ikiyonzoyonzo gikwega umukogote:

¹⁹bakavuga, bati N’anyaruke, atebutse igikorwa ciwe tukirābe: kand’ imigabo y’Uwera w’Abisirayeli ni yīgire hafi ishike, kugira ngo tuyimenye!

²⁰Bazobona ibara, abīta ikibi iciza, iciza bakacīta ikibi; bagashira umwiza mu gishingo c’umuco, n’umuco mu gishingo c’umwiza; bagashira ibirura mu gishingo c’ibisosa, n’ibisosa mu gishingo c’ibirura!

²¹Bazobona ibara, abīyita abanyabgenge ubgabo, bakībgira kw ar’ abahanga!

²²Bazobona ibara, abīgira agakūra mu kunywa vino, bakaba abagabo bo guturiranya ibiboreza;

²³bagatsindanishiriza abanyakibi kubg’ ingurire, ariko bagakūra urubanza ku bagororotsi!

²⁴Nuko rero, nk’ukw ibirimi vy’umuriro bitongora ibirararara, kandi nk’uk’ ubgatsi bgumye bunyikira mu muriro, ni kw igishitsi cabo kizoba nk’ikibore, n’amashurwe yabo azotumuka nk’umukungugu: kuko bāgaye ivyagezwe vy’Uhoraho Nyen’ ingabo, bagakēngēra ijambo ry’Uwera w’Abisirayeli.

²⁵Ni co catumye uburake bg’Uhoraho buziriringira abantu biwe, akababangurira ukuboko, akabakubita, imisozi ikaja mu gatengo, maz’ imivyimba yabo ikamera nk’imyanda hagati mu mayira. Yamara na ho nyene uburake bgiwe ntiburahwama, arik’ ukuboko kwiwe kuracabanguye.

²⁶Kand’ azomanikira amahanga ya kure ibendera, abahamagaze uruhwa ngo bave ku mpera y’isi; na bo bazoza n’ingoga bihuta.

²⁷Muri bo nta wuzoruha canke ngw atsitare, nta wuzohunyiza canke ngw asinzire; n’umukanda bakenyeje ntuzokenyuruka, kandi n’utugozi tw’inkweto zabo ntituzocika;

²⁸imyampi yabo irasongoye, n’imiheto yabo yose irabanze; inzāra z’amafarasi yabo zizomera nk’isare, n’amakurudumu y’imikogote yabo azogenda nk’agashururu.

²⁹Ukwivuga kwabo kuzoba nk’ukw’ intambge, bazokwivuga nk’imigunza y’intambge: ni koko bazotontoma basahura isahu, bayīnyagira, ata wuriho wo gutabara.

³⁰Kur’ uwo musi bazobabomboranira hejuru nk’ukw ikiyaga kibomborana: kand’ uwokwitegereza ico gihugu yobona har’ umwiza n’ivyago, kand’ umuco uzimanganijwe n’ibicu bihubikije.