Read Bibliya Yera 1951 Yesaya 50 Bible Online

Yesaya 50 - Bibliya Yera 1951 bible

Yesaya 50

¹Uku ni k’Uhoraho abaza, at’ Icete c’uko tuvavanuye na nyoko, ico namwirukanishije, kiri hehe? Cank’ uwo narīriye umwenda ngatanga mwebge ngo mube inyishu, ari hehe? Ereg’ ukugabitanya kwanyu ni kwo kwatumye mutangwa, kand’ ibicumuro vyanyu ni vyo vyirukanishije nyoko.

²Mbeg’ aho naza, n’iki catumye ntagira uwo ndahasanga, ngahamagara, ntihagire uwitaba? Mbeg’ ukuboko kwanje kwabaye kugufi ngo kunanirwe gucungura? Canke se nta bubasha mfise bgo kurokora? Ereg’ iyo nkankamiye ikiyaga ndagikamya, inzūzi ndazihindura ubugaragwa; amafi yari muri zo aranuka, kukw ata mazi ariho, yatikijwe n’inyota.

³Nambika ijuru ukwirabura, ndaryorosa amagunira.

⁴Umwami Uhoraho ampaye ururimi rw’abigishwa, kugira ngo mmenye uko nosindagirisha ūrushe amajambo; ankangura uko bukeye, akangurira ugutwi kwanje kwumva, nk’ukw abigishwa bumviriza.

⁵Umwami Uhoraho anziburuye ugutwi, nanje sinabaye ikigāba, canke ngo mpindukire nsubire inyuma.

⁶Abankubita nabategeye ibitugu, n’imisaya ndayitegera abammomora ubganwa; kandi mu maso hanje sinahakinjishije gutēterezwa no gucirwakw amate.

⁷Arik’ Umwami Uhoraho arantabara, ni co gituma ntatētērwa: ni co gituma ndinduka, mu maso hanje hakamera nk’ibuye, kandi nzi yuko ntazomāramāra.

⁸Ūntsindishiriza ari hafi; non’ uwombūranya ni nde? Ngo tuve hasi duhagararane: umubūranyi wanje ni nde? N’aze tubangikane.

⁹Rāba Umwami Uhoraho ni we azompagarikira; non’ uwontsindisha ni nde? Ereg’ abo bose bazosāza nk’impuzu; inyenzi zizobarya zibamare.

¹⁰Ni nde muri mwebge yubaha Uhoraho, akumvira ijwi ry’umushumba wiwe? Ūgendera mu mwiza, adafise umuco, ni yizigire izina ry’Uhoraho, kandi yisunge Imana yiwe.

¹¹Umve mwese abacana umuriro, bakīshira imuri impande zose: ni mugende mumurikiwe n’umuriro wanyu, bo n’imuri mwidomekeye. Ivyo muzoronka mu kuboko kwanje n’ibi: muzoryamana umubabaro.