Read Bibliya Yera 1951 Yesaya 52 Bible Online

Yesaya 52 - Bibliya Yera 1951 bible

Yesaya 52

¹Ikangure, ikangure, wambare inkomezi zawe, ewe Siyoni; ambara imyambaro yawe ishajije, ewe Yerusalemu wa murwa wera; kuk’ uhereye none muri wewe hatazoshika ūtākebge cank’ igihumane.

²Haguruka wikunkumure umukungugu, uheze uze wicare ewe Yerusalemu: wibohore imvuto zo mw izosi ryawe, ewe mukobga w’i Siyoni wajanywekw inyagano.

³Kuk’ ukw ari k’Uhoraho agize, ati Mwaguzwe ubusa: na none muzocungurwa ata mahera.

⁴Kuk’ ukw ari k’Umwami Uhoraho agize, at’ Ubga mbere abantu banje bāramanutse baja muri Egiputa gusuhukirayo: Abashuri babahahaza ata nyanduruko.

⁵None rero nkora iki hano? ni k’ Uhoraho agize; kw abantu banje bānyazwe ku busa! Ababaganza barayogora, ni k’Uhoraho agize, kandi bīriza umusi batuka izina ryanje.

⁶Nuko rer’ abantu banje bazomenya izina ryanje; kur’ uwo musi bazomenya kw ari jewe mvuga: mbere ni jewe nyene.

⁷Ereg’ ibirenge vy’ūzanye inkuru nziza ni vyiza ku misozi, akamamaza ivy’ amahoro, akazana inkuru nziza z’ivyiza, akamamaza ivy’ agakiza, akabarira Siyoni, at’ Imana yawe iri ku ngoma!

⁸Ijwi ry’abashibamyi bawe! Bashize hejuru bavugiriza impundu hamwe; bazovyibonera imbonankubone aho Uhoraho azogaruka i Siyoni.

⁹Ni muturike munezerwe, muririmbire hamwe, yemwe misaka y’i Yerusalemu: kuk’ Uhoraho aremesheje abantu biwe, acunguye Yerusalemu.

¹⁰Uhoraho akumye impuzu ku kuboko kwiwe kwera mu maso y’amahanga yose, kand’ impera z’isi zose zizobona agakiza k’Imana yacu.

¹¹Ni mugende, ni mugende, muveyo; ntimugakore ku kintu gihumanya na kimwe; muve hagati yaho; mwitunganye, yemwe abashorezi b’imbombovu z’Uhoraho.

¹²Kuko mutazovayo mwihuta, canke ngo mugende nk’abahunga: kuk’ Uhoraho azobaja imbere; Imana y’Abisirayeli izobīmiriza.

¹³Rāba, umushumba wanje azoja imbere, azokuzwa ashirwe hejuru, asumbe abandi.

¹⁴Nk’uko benshi yababereye akumiza — kuko mu maso hiwe hononekaye ntihase n’ah’ umuntu, n’ishusho yiwe yononekaye ntise n’iy’ abana b’abantu —

¹⁵uko ni kw azojoreza amahanga menshi; abami bazozibira akanwa kabo imbere yiwe: kuko bazobona ico batābgiwe, n’ico batumvise bazocitegereza.