Read Bibliya Yera 1951 Yesaya 56 Bible Online

Yesaya 56 - Bibliya Yera 1951 bible

Yesaya 56

¹Uku ni k’Uhoraho agize, ati Ni mwitondere ibiroranye, mukore ivy’ ukugororoka: kukw agakiza kanje kagira gashike, n’ ukugororoka kwanje kugira guhishurwe.

²Hahirwa umuntu akora ivyo, n’umwana w’umuntu abibangiriza, akaziririza isabato ntayikēngēre, akarinda ukuboko kwiwe ntigukore icaha na kimwe.

³Kand’ umunyamahanga yifatanije n’Uhoraho yoye kuvuga, at’ Uhoraho ntazobura kuntandukanya n’abantu biwe; canke n’inkone yoye kuvuga, it’ Erega nd’ igiti cumye.

⁴Kuk’ ukw ari k’ Uhoraho agize ku vy’inkone ziziririza amasabato yiwe, zigahitamw’ ibimunezereza, zikabangiriza isezerano ryiwe,

⁵ati Nzozishirira icibutso mu ngoro yanje no mu rugo rwanje, ndazihe n’izina riruta kugira abahungu n’abakobga; nzoziha izina ritazoshira, ritazokūrwaho.

⁶Kandi n’abanyamahanga bīfatanya nanje Uhoraho kugira ngo bankorere, bakunde izina ryanje, babe abasavyi banje, umuntu wese aziririza isabato ntayikēngēre, akabangiriza isezerano ryanje,

⁷abo na bo nzobashikana ku musozi wanje wera, mbanezereze mu ngoro yanje yo gusengeramwo; ibimazi vyabo vyo kwoswa n’ivyo gukererwa bizokwemerwa ku gicaniro canje: kukw ingoro yanje izokwitwa inzu yo gusengerwamwo n’amahanga yose.

⁸Umwami Imana, umwe akoraniriza hamwe abāri birukanywe bo mu Bisirayeli, aravuze, ati Nzokwongera kumukoraniriza abandi, ukūye abiwe bāri bamaze gukoranywa.

⁹Yemwe bikōko mwese vyo mw ishamba, ni muze mutabagure, namwe bikōko vyose vyo mu kibira.

¹⁰Abashibamyi biwe n’impumyi, bose nta co bazi; bose ni nk’imbga z’ibiyingiyingi, zitazi gukuga; bararavūta, bararyama, bakunda gusinzira.

¹¹Mbere n’imbga z’ ibigunya, zitigera zihāga; kand’ abo bameze bartyo n’abungere! Nta co bashobora gutahura; bose bījaniye inzira zabo ubgabo, umuntu wese yironderera inyungu impande zose.

¹²Bati Ni muze mbazanire vino, twinywere inturire duhimbe. N’ejo na ho bizomera nk’uku, bizonarushiriza.