Read Bibliya Yera 1951 Yesaya 59 Bible Online

Yesaya 59 - Bibliya Yera 1951 bible

Yesaya 59

¹Ehe, ukuboko kw’Uhoraho ntikubaye kugufi ngo kunanirwe gukiza, n’ugutwi kwiwe ntikwapfuye ngo kunanirwe kwumva:

²arikw ibigabitanyo vyanyu ni vyo vyabatandukanije n’ Imana yanyu, kand’ ivyaha vyanyu ni vyo vyabakīngiriye mu nyonga hayo, bituma yanka no kwumva.

³Kukw amaboko yanyu yandujwe n’amaraso, n’intoke zanyu zandujwe n’ibigabitanyo; iminwa yanyu yama ivuga ibinyoma, n’ururimi rwanyu ruvugira ibibi mu ntamatama.

⁴Nta witwarira uwundi mu buryo buroranye, nta n’ūbūrana ivy’ ukuri; bizigira ibitagira ikimazi, bakavuga ibinyoma; basama inda z’ ukugira nabi, bakavyara ibigabitanyo.

⁵Baberagura amagi y’ imvuvyi, bajisha butangurirwa: ūriye amagi yabo agapfa; wamena irigi, hagaturumbukamw’ imamba.

⁶Ivyo bājishe butangurirwa ntibizovamw’ imyambaro, kandi ntibazoshobora kwipfuka ibikorwa vyabo; ibikorwa vyabo n’ ibikorwa vy’ubugāba, ibikorwa vy’ umuryano biri mu maboko yabo.

⁷Ibirenge vyabo vyirukira gukora ikibi, kandi bihutira kuvisha amaraso y’abatācumuye; ivyiyumviro vyabo n’ivyiyumviro vy’ubugāba; kugeseza no guhonnya biri mu nzira zabo.

⁸Inzira y’amahoro ntibayizi; mu ngendo zabo ntihabamw’ ibiroranye: bītoboreye inzira z’ibigoramange; ūzicamwo wese ntamenya amahoro.

⁹Ni co gituma ibiroranye biri kure yacu, kandi n’ukugororoka ntikudushikīra; twitega umuco tukabona umwiza; twitega ahakemutse tukagenda mu muzitanya.

¹⁰Dukabakaba ku nzu nk’impumyi, ni koko dukabakaba nk’abatagira amaso; ku murango w’amashōka dutsitara nko mu kajoro; mu bagikomeye tumeze nk’abapfuye.

¹¹Twese twivuga nk’igikōko citwa idubu, tukaniha nk’inuma iguguza; twitega ibiroranye, ariko nta vyo; twitega agakiza, ariko kakaba kure yacu.

¹²Kukw ibicumuro vyacu vyagwiriranye imbere yawe, kand’ ivyaha vyacu ari vyo bitwagiriza: kukw ibicumuro vyacu turi kumwe, kandi n’ibigabitanyo vyacu na vyo turabizi;

¹³turacumura kandi twihakana Uhoraho, duta inzira tukareka gukurikira Imana yacu, tukavuga ivy’ agahahazo n’ubugarariji; dusama inda y’ ibinyoma, tukabivuga biturutse mu mutima.

¹⁴Ibiroranye vyashubijwe inyuma, n’ukugororoka guhagaze kure; kuk’ ukuri kwatemvye mu nzira, kand’ ubgeranda ntibushobora gushika.

¹⁵Ni koko, ukuri kurakamanganye; kand’ ūhunze ibibi aba yinyagishije. Uhoraho yarabibonye, biramubabaza, kukw ata biroranye biriho.

¹⁶Kand’ abona yukw ata muntu ariho, atangazwa n’ukw ata wo kubahagarikira; ni co catumye ukwiwe kuboko ari kwo yizanishirije agakiza, kand’ ukugororoka kwiwe ni kwo yishimikije.

¹⁷Yambara ukugororoka nk’icuma gikīngira igikiriza, no ku mutwe inkofero y’agakiza; yambara impuzu zo guhōra ngo zimubere imyambaro, yiyambika ishaka nk’umutamana.

¹⁸Azobasubiriza mu nkōko ibihwanye n’ ivyo bakoze; abarwanizi biwe abasubize uburake, n’abansi biwe abīhōre, kandi n’ababa ku kiyaga azobasubiza inyishu.

¹⁹Ni ho bazokwubaha izina ry’Uhoraho, uhereye i burengerazuba, n’icubahiro ciwe uhereye iyo rirasira: kukw azoza nk’uruzi rusēnyerana, rukubebga n’impwemu z’Uhoraho.

²⁰Kand’ umucunguzi azoza i Siyoni, ku bo mu ba Yakobo bateye ibitugu ibicumuro, ni k’ Uhoraho agize.

²¹Nanje ngiri isezerano nsezeranye na bo, ni k’Uhoraho agize: impwemu yanje iri kuri wewe, n’amajambo yanje nshize mu kanwa kawe, ntibizova mu kanwa kawe, canke mu kanwa k’abuzukuru bawe, canke mu kanwa k’abuzukuruza bawe, uhereye none ugashitsa ibihe bidashira, ni k’Uhoraho agize.