Read Bibliya Yera 1951 Yesaya 60 Bible Online

Yesaya 60 - Bibliya Yera 1951 bible

Yesaya 60

¹Haguruka ukayangane, kuk’ umuco wawe ushitse, kand’ ubgiza bg’Uhoraho bukaba bukurasiye.

²Kuko rāba, umwiza uzotwikira isi, umwiza w’umuzitanya uzotwikira amahanga: arik’ Uhoraho azokurasira, kand’ ubgiza bgiwe buzokubonekako.

³Amahanga azoza ku muco wawe, n’abami bazoza ku gukayangana kwawe.

⁴Unamura amaso yawe weraguze, urābe, bose bakoraniye hamwe baza kuri wewe; abahungu bawe bazoza baturutse kure, n’ abakobga bawe bazoza bateruwe mu kwaha.

⁵Ni ho uzorāba, mu maso hawe hakeyuka, umutima wawe ukadidagizwa n’umunezero, ukāguka; kukw ibidandazwa vy’ibitayega bica mu kiyaga bizogaruka i wawe, n’ubutunzi bg’ amahanga buzokuzako.

⁶Isinzi ry’ingamiya rizogutwikira, inyana z’ingamiya z’i Midiyani n’izo muri Efa. Abaturutse i Sheba bose bazoza, bazoba bazanye izahabu n’imibavu, bavuge inkuru nziza z’ishimwe ry’Uhoraho.

⁷Imikuku yose y’i Kedari izokoranirizwa kuri wewe, amapfizi y’intama y’i Nebayoti azogukorera; azokwūrira igicaniro canje yemerwe, nzokwubahiriza inzu yanje y’icubahiro.

⁸Aba ni ba nde baguruka nk’igicu, kandi nk’ inuma zisubira mu turyango tw’ ivyari vyazo?

⁹N’ababa ku kiyaga banyiteze, amāto y’i Tarushishi ni yo abītangiye imbere, azanye abahungu bawe abakūye kure, bazanye ifeza zabo n’ izahabu kubg’ izina ryanje, jewe Uhoraho Imana yawe, Uwera w’Abisirayeli, kuko nakwubahirije.

¹⁰Abanyamahanga bazokwubaka inzitiro zawe, n’abami babo bazogukorera; kuko nagukubise ndatse, ariko nkugiriye imbabazi ndagutunze.

¹¹Amarembo yawe azokwama yuguruye, ntazokwugarirwa ku murango canke mw ijoro, kugira ngw abantu bakuzanire ubutunzi bg’amahanga, bo n’abami bayo babashoreye.

¹²Kukw ihanga n’ubgami bitazokwemera kugukorera bizohona; ni koko ayo mahanga azogesezwa rwose.

¹³Ubgiza bg’i Lebanoni buzokuzako, ibiti vy’amasederi n’ ivy’ imitidari n’ivy’ imiteyashuri bizozira hamwe, kugira ngo bisharize ahēra hanje, kand’ aho nshira ibirenge vyanje nzohubahiriza:

¹⁴abahungu b’abāguhahaza bazoza bakubite inkoro hasi imbere yawe, n’abāgukēngēra bīkubite imbere y’ibirenge vyawe, bakwite Umurwa w’Uhoraho, Siyoni h’Uwera w’Abisirayeli.

¹⁵Naho wahebge, ukankwa, ntihabe hakigira ūhita muri wewe, nzoguhindura ubgiza bginshi butazoshira, ube umunezero uk’ urunganwe rwawe ruzogenda rukurikirana.

¹⁶Kand’ uzokwonka amaberebere y’amahanga, uzokwonka amabere y’abami, kand’ uzomenya yuko jewe, Uhoraho, nd’ Umukiza wawe n’ Umucunguzi wawe, Inyenkomezi ya Yakobo.

¹⁷Mu gishingo c’imiringa nzozana izahabu, no mu gishingo c’ivyuma nzozana ifeza; nzane imiringa mu gishingo c’ibiti, n’ ivyuma mu gishingo c’amabuye; nzokwimika amahoro abe ari yo akuganza, n’ukugororoka abe ari kwo kugutwara.

¹⁸Umuryano ntuzokwumvikana ukundi mu gihugu cawe, bo n’ukugeseza n’ ugutikiza mu ngabano zawe; arikw inzitiro zawe uzozīta Gakiza, n’amarembo yawe uzoyīta Mpundu.

¹⁹Izuba si ryo rizoba rikikubera umuco ku murango, cank’ ukwezi ngo kukuboneshereze: ariko jewe Uhoraho ni jewe nzokubera umuco utazoshira, kandi jewe Imana yawe ni jewe nzokubera icubahiro.

²⁰Izuba ryawe ntirizoba rikirenga, kand’ ukwezi kwawe ntikuzoba kugikeha, kuko jewe Uhoraho nzokubera umuco utazoshira, kand’ imisi y’ikigandaro cawe izoba ishize.

²¹Abantu bawe bazoba abagororotsi bose, bazoba ben’ igihugu bgite gushitsa ibihe vyose; bazoba umuvyaro nitereye, igikorwa c’intoke zanje, kugira ngo bintere icubahiro.

²²Inkēngērwa izovamw’ igihumbi, kandi nyarucari azoba ihanga rikomeye. Jewe Uhoraho nzobishitsa n’ingoga, igihe cavyo kigeze.