Read Bibliya Yera 1951 Yesaya 61 Bible Online

Yesaya 61 - Bibliya Yera 1951 bible

Yesaya 61

¹ Mpwemu w’Umwami Uhoraho ari kuri jewe, kuk’ Uhoraho yandobanuje amavuta ngo mbgire abaciye bugufi ubutumwa bgiza; yantumye gutubika imitima imenetse, no kumenyesha abarindwa ko barekuwe, n’imbohe ko zugururiwe;

²ngo mmenyeshe abantu umwaka wo kwemererwamwo n’Uhoraho, n’ umusi wo kwīhōra w’Imana yacu; ngo nirure abagandaye bose,

³ngo nshirireh’ abagandaye i Siyoni igitsibo mu gishingo c’umunyota, ndabahe n’amavuta y’akaneza mu gishingo c’ukugandara, n’umwambaro wo guhimbaza mu gishingo c’umutima uhondobereye; kugira ngo baze bitwe ibiti vy’ukugororoka, imyeloni yatewe n’ Uhoraho, ngo bimutere icubahiro.

⁴Nuko bazokwubaka ahār’ imisaka kera, bahagarike ahāsanganguwe ubga mbere, kandi bazosubira kuvyura ibisagara vyāsenyutse, ivyāmaze ibihe vyinshi ar’ imisaka.

⁵Abanyamahanga bazohagarara ngaho babaragirire imikuku, kand’ abanyamahanga ni bo bazokora mu mirima yanyu no mu nzabibu zanyu.

⁶Ariko mweho muzokwitwa abaherezi b’Uhoraho, abantu bazobita abasavyi b’Imana yacu: muzorya itunga ry’abanyamahanga, ivyār’ icubahiro cabo ni mwebge muzovyirata.

⁷Kubg’ ukumāramāra kwanyu muzoshumbushwa kabiri; mu gishingo co gutētērwa muzonezererwa umugabane wanyu: ni co gituma mu gihugu canyu muzoshumbushwa kabiri, mugire umunezero utazoshira.

⁸Kuko jewe Uhoraho nkunda ibiroranye, nanka ubgambuzi n’ibigabitanyo; kandi nzobashumbusha ibikwiranye n’ukuri kwanje, nzosezerana namwe isezerano ritazoshira.

⁹Abazobakomokako bazomenyekana mu mahanga, n’uruvyaro rwanyu mu bandi bantu: abazobabona bose bazobemera yukw ar’ ihanga jewe Uhoraho mpaye umugisha.

¹⁰Nzonezererwa cane Uhoraho, umutima wanje uvugirize impundu Imana yanje; kuko yanyambitse imyambaro y’agakiza, akansēsa hejuru umutamana w’ubugororotsi, nk’uk’ umukwe ashazisha igitsibo, kandi nk’uk’ umugeni ashazisha utugenegene twiwe.

¹¹Nk’ukw isi ibaduka ibimeze, n’ indimiro imeza ivyayitewemwo, uko ni k’Umwami Uhoraho azomeza ukugororoka n’ishimwe imbere y’amahanga yose.