Read Bibliya Yera 1951 Yesaya 62 Bible Online

Yesaya 62 - Bibliya Yera 1951 bible

Yesaya 62

¹Kubga Siyoni sinzocereza, no kubga Yerusalemu sinzoruhuka, gushitsa ah’ ugutsinda kwaho kuzoserukira nk’umuco, n’ agakiza kaho kakamera nk’itara ryaka.

²Nukw amahanga azobona ugutsinda kwawe, n’abami bose bazobona icubahiro cawe; maz’ uzokwitwa izina risha, wiswe n’akanwa k’Uhoraho.

³Kand’ uzoba igitsibo c’ubgiza mu kuboko kw’Uhoraho, n’umugāra w’ ubgami mu kuboko kw’Imana yawe.

⁴Ntuzosubira kwitwa Ntabga, n’igihugu cawe ntikizosubira kwitwa Misaka; arik’ uzokwitwa Nkundwakazi, n’igihugu cawe kizokwitwa Uwābiriwe; kuk’ Uhoraho agukundwakaje, kand’ igihugu cawe kizokwābīrwa.

⁵Nk’uk’ umusore arongora inkumi, ni kw abakubamwo bazokurongora, ewe Yerusalemu; kandi nk’uk’ umukwe anezererwa umugeni, ni kw Imana yawe izokunezererwa.

⁶Ewe Yerusalemu, nshize abashibamyi hejuru ku nzitiro zawe z’amabuye; nta ho bazocereza ku murango no mw ijoro; yemwe abibutsa Uhoraho ntimukaruhuke,

⁷kandi na we ntimwemere kw aruhuka, gushitsa ah’ azovyurira Yerusalemu, akahahindura ishimwe mw isi.

⁸Uhoraho yarahije ukuboko kwiwe kw’i buryo, ukuboko kw’inkomezi ziwe, ati N’ukuri sinzokwongera guha abansi bawe amasaka yawe ngo bayarye, kand’ abanyamahanga ntibazokunywera vino wacumukuriye;

⁹arikw abazoyimbura ni bo bazoyarya, banshime jewe Uhoraho, kand’ abazoyamura ni bo bazoyinywa, mu ntangaro y’ ahēra hanje.

¹⁰Ni murenge, ni murenge amarembo; mutunganirize abantu inzira; muharure, muharure inzira y’iroro, muyikūremw’ amabuye; mushingire amoko ibendera.

¹¹Rāba, Uhoraho yabariye abo ku mpera y’isi, ati Ni mubgire umukobga w’i Siyoni, muti Rāba, agakiza kawe karaje; rāba, araje azanye impēra, kand’ inyishu yiwe ir’imbere yiwe.

¹²Kandi bazobita Ihanga ryera, Abācunguwe n’Uhoraho; kand’ uzokwitwa Ahārondewe, Umurwa utāhebge.