Read Bibliya Yera 1951 Yesaya 63 Bible Online

Yesaya 63 - Bibliya Yera 1951 bible

Yesaya 63

¹Uriya ni nde aturutse muri Edomu, i Bosira, yambaye imyambaro y’agahama, yambaye impuzu zikayangana, araramanga ari n’inkomezi nyinshi? Ni jewe mvuga mu bugororotsi, umunyabushobozi bgo gukiza.

²N’iki gitumye impuzu zawe ziba agatuku, n’imyambaro yawe igasa n’iy’ ūganisha ibirenge vino mu bgato?

³Nīganishije mu bgato nd’umwe; mu bantu bo mu mahanga yose nta n’umwe twari kumwe; n’ukuri nabaganishije ibirenge mu burake bganje, mbanyukuza ubushangashirwe bganje; kand’ amaraso yabo yatarukiye ku myambaro yanje, impuzu zanje zose zirayoberana.

⁴Kuko nari narashinze mu mutima umusi wo kwīhōra, kand’ umwaka wo gucungura abantu banje urashitse.

⁵Narēraguje, mbona nta wutabaye; ntangazwa n’ukw ata wo kundwanira; ni co catumye ukwanje kuboko ari kwo nitabarishije, kand’ ubushangashirwe bganje ni bgo bgampagarikiye.

⁶Nanyukuje amahanga uburake bganje, mbamenaguza ubushangashirwe bganje, mpondoganiriza amaraso yabo kw isi.

⁷Nzokwamamaza ukugira neza kw’Uhoraho n’ishimwe ryiwe, nk’ ukw ivyo Uhoraho yatugiriye vyose bingana; mvuge n’ivyiza vyinshi yagiriye inzu ya Isirayeli, nk’ukw imbabazi ziwe ziri, kandi nk’uk’ ukugira neza kwiwe kwinshi kungana.

⁸Kuko yavuze, ati N’ukuri n’abantu banje, abana batogunga; nuko rer’ ababera Umukiza.

⁹Yababaranye na bo mu mibabaro yabo yose, kand’ umumarayika yama ahagaze mu nyonga ziwe yarabakiza: urukundo rwiwe n’ikigongwe ciwe ni vyo vyamuteye kubacungura; yarabaterura akabaheka imisi yose ya kera.

¹⁰Ariko baragarariza, bababaza Mpwemu wiwe yera; bituma ahinduka umwansi wabo, ubgiwe arwana na bo.

¹¹Maz’ abantu biwe bibuka ibihe vya kera n’ivya Mose, bat’ Uwabadūgananye n’umwungere w’intama ziwe abakūye mu kiyaga ari hehe? Uwashize Mpwemu wiwe yera hagati muri bo ari hehe?

¹²Ni nde yatumye ukuboko kwiwe kw’ icubahiro kugendera ku ruhande rw’i buryo bga Mose? Ni nde yatandukanije amazi imbere yabo, akīhesha izina ritazoshira?

¹³Ni nde yabacishije ahār’ i bgina, nk’ah’ ar’ ifarasi ica mu bugaragwa, ntibatsitare?

¹⁴Nk’ ukw inka zishōka ku mwonga, ni ko Mpwemu w’Uhoraho yabaruhura; uko ni ko warōngōye abantu bawe, kugira ngo wiheshe izina ry’icubahiro.

¹⁵Tereza inyonga hasi uri mw ijuru, witegereze ur’ i wawe, ah’ ukwera kwawe n’icubahiro cawe biri: rya shaka ryawe n’ibikorwa vyawe vy’ubushobozi biri hehe? Igishika n’imbabazi umfitiye ko bibujijwe kunshikīra!

¹⁶Kuko wewe uri Data wa twese, naho Aburahamu atatuzi, kandi na Isirayeli ntatwemere: wewe ubgawe, Uhoraho, ni wewe Data; Umucunguzi wacu ni ryo zina ryawe uhereye kera hose.

¹⁷Ewe Uhoraho, n’iki gituma utuzimiza inzira zawe, ugakomantaza imitima yacu ntitukwubahe? Garuka kubg’ abasavyi bawe, imiryango y’ishamvu yawe.

¹⁸Abantu bawe bera bāhaganje igihe gito gusa; abarwanizi bacu bāsiribanze ahantu hawe hēra.

¹⁹Twahindutse nk’abatigeze kuganzwa nawe, nk’abatigeze kwitirirwa izina ryawe.