Read Bibliya Yera 1951 Yesaya 65 Bible Online

Yesaya 65 - Bibliya Yera 1951 bible

Yesaya 65

¹Nabaririkijwe n’abatānyibaza; nabonywe n’abatāndondeye; nabariye ihanga ritāmbaje izina ryanje, nt’ Ehe rāba, ndi hano.

²Nirirwa ntegeye amaboko ihanga rigarariza, bagendera mu nzira zitari nziza, bakurikira ivyabo vyiyumviro.

³N’abantu bahora banshinyaguriza imbonankubone, bagatangira ibimazi mu bigabiro, bakosereza imibavu ku bicaniro vyubakishijwe amatafari;

⁴bakicara hagati y’imva, bakarāra mu bitabo ahihishije; bakarya inyama z’ingurube, kandi mu nzavya zabo hakabamw’ umufa w’inyama z’ibizira;

⁵bakavuga, bati Hagarara ukwawe, ntunyegēre, kuko jewe nkurusha kuba uwejejwe. Ben’ abo bambera umwotsi wo mu mazuru, n’umuriro wīriza umusi waka.

⁶Eh’ ivyo biranditswe imbere yanje, sinzohora, ariko nzobibasubizako, mbere nzobasubiriza mu nkōko.

⁷Ibigabitanyo vyanyu ubganyu, ni k’ Uhoraho agize, nzobibasubirizakw icarimwe n’ibigabitanyo vya ba sogokuruza banyu, bosereza imibavu ku misozi, bakantukira ku turambi: ni co gituma nzobasubiriza mu nkōko ibikwiranye n’ ibikorwa vyabo.

⁸Uku ni k’Uhoraho agize, ati Nk’ukw ihando ry’umuzabibu riboneka ko ririmw’ umutobe, bakavuga, bati Ntuwurandure, kuk’ ugifise ikimazi, uko ni ko nanje nzogira, kubg’ abasavyi banje, noye kubarandura bose.

⁹Nzokwironkera uruvyaro muri Yakobo, n’ūzoragwa imisozi yanje muri Yuda; abo nitoranirije bazoharagwa, n’abasavyi banje bazohaba.

¹⁰Maz’ i Sharoni hazoba icanya c’intama, kand’ ikiyaya c’i Akori kizoba ivyagiro ry’ inka, n’uburuhukiro bg’abantu banje bandondeye.

¹¹Ariko mwebge abantaye jewe Uhoraho, mukibagira umusozi wanje wera, mugatereka Gadi, mugaturiraniriza Meni;

¹²nanje nzobashirirah’ inkota, mwese muzokwunamira kwicwa: kukw igihe nahamagara mutitavye, n’igihe navuga mutumvise; ariko mugakora ivyo mbona kw ari bibi, mukitoraniriza ibitannezera.

¹³Nuko rero, uku ni k’Uhoraho Imana agize, ati Rāba, abasavyi banje bazorya, ariko mweho muzokwicwa n’inzara; abasavyi banje bazonywa, ariko mweho muzokwicwa n’inyota; abasavyi banje bazonezerwa, ariko mweho muzomāramāra:

¹⁴rāba, abasavyi banje bazoririmbishwa n’ umunezero wo mu mitima, ariko mweho muzorizwa n’intuntu yo mu mitima, muborozwe n’ukw imitima yanyu isābijwe n’umubabaro.

¹⁵Kand’ izina ryanyu muzorisigarana abo nitoranirije, barigire umuvumo, bat’ Urakicwa n’Uhoraho Imana! Maz’ abasavyi banje bazokwitwa irindi zina.

¹⁶Nuk’ uwo mu gihugu yisabīra umugisha n’awusabe Imana y’ukuri, kand’ uwo mu gihugu arahira, n’arahire Imana y’ukuri; kukw amagorwa ya mbere yibagiranye, agahishwa inyonga zanje.

¹⁷Kuko rāba, ndarema ijuru risha n’isi nsha; ivya mbere ntibizokwibukwa, kandi ntibizoruha vyiyumvirwa.

¹⁸Ariko munezerwe, muze muhore muhimbawe n’ivyo ndema; kuko rāba, ndema Yerusalemu ngo mpagire umunezero, n’abantu baho ngo ndabagire akanyamuneza.

¹⁹Kandi nzohimbarwa n’i Yerusalemu, nnezerwe n’abantu banje: kand’ ijwi ryo kurira ntirizohumvikana ukundi, cank’ ijwi ryo kuboroga.

²⁰Ntihazokwongera kubamw’ abapfa bakir’ inzoya, cank’ umutāma adasozereye imyaka yiwe; kuk’ umwana azopfa amaze imyaka ijana, kand’ ūkenyutse ntashitse ijana azoba yavumwe.

²¹Bazokwubaka amazu bayīberemwo, kandi bazotera uruzabibu, bīrīre inzabibu zarwo.

²²Ntibazokwubaka ngw abandi binjire; ntibazorima ngw abandi babirye: kuko nk’ukw imyaka y’igiti ingana ari kw abantu banje bazoramba, kand’ abo nitoranirije bazoshitsa igihe kirekire banezererwa igikorwa c’amaboko yabo.

²³Ntibazoruhira ubusa, kandi ntibazovyara abo kugesezwa, kuko bazoba ar’ uruvyaro jewe Uhoraho nahezagiye, bo n’abazobakomokako.

²⁴Maze batarampamagara nzobitaba, kandi bakivuga nzokwumva.

²⁵Ibingira n’umwagazi w’intama bizorīshanya; intambge izorīsha ubgatsi nk’inka; kand’ umukungugu ni wo uzoba ivyo kurya vy’inzoka. Ntibizoryana canke ngo bigire ico vyica ku musozi wanje wera iy’ uva ukagera, ni k’Uhoraho agize.