Read Bibliya Yera 1951 Yesaya 66 Bible Online

Yesaya 66 - Bibliya Yera 1951 bible

Yesaya 66

¹Uku ni k’Uhoraho agize, at’ Ijuru ni ryo ntebe yanje y’ubgami, isi na yo n’indava y’ ibirenge vyanje: muzonyubakira inzu ki, kandi n’ahantu ki hombera uburuhukiro?

²Kukw ivyo vyose intoke zanje ari zo zabiremye, bikabaho vyose, ni k’ Uhoraho agize; arik’ umuntu w’impahazwa afise umutima umenetse, agahindishwa agashitsi n’ ijambo ryanje, uwo ni we nzohozakw ijisho.

³Ūkerera inka, ahwanye n’uwica umuntu; ūtanga umwagazi w’ intama kw ikimazi, ahwanye n’ ūvuna imbga izosi; ūshikana ishikanwa ry’amafu, ahwanye n’ ūzanye amaraso y’ingurube; uwosa imibavu, ahwanye n’ūhezagira ikigirwamana. N’ukuri koko bitoranirije inzira zabo ubgabo, imitima yabo ihimbarwa n’ ibizira vyabo vy’ubuyobe.

⁴None nanje nzobatoraniriza amagorwa, mbatēze ibibatera ubgoba; kukw aho nahamagara ata witavye, aho navuga ntibumve, ariko bagakora ivyo mbona kw ari bibi, bagahitamw’ ivyo nanka.

⁵Ni mwumve ijambo ry’Uhoraho, yemwe abahindishwa agashitsi n’ijambo ryiwe: ati Bene wanyu babanka, bakabaca babahoye izina ryanje, bāravuze ng’ Uhoraho n’agaragaze icubahiro ciwe, turābe umunezero wanyu! Ariko bo bazomāramāra.

⁶Umve urwānāga rwumvikana ku murwa, ruturutse mu rusengero! N’Uhoraho asubiriza abansi biwe mu nkōko.

⁷Siyoni hatararamukwa haravyara, ibise bitaraza havyara umwana w’umuhungu.

⁸Ni nde yigeze kwumva ibimeze birtyo? Ni nde yigeze kubona ibisa birtyo? Mbeg’ igihugu covukira umusi umwe? Ihanga ryovyarirwa icarimwe? Ariko Siyoni ho habaye hakiramukwa haca havyara abana.

⁹Mbega notuma baramukwa, sintume bavyara? ni k’Uhoraho abaza; kw ari jewe ntuma bavyara, nobaboheramw’ inda? ni kw Imana yawe ibaza.

¹⁰Munezeranwe n’i Yerusalemu, muhimbarwe kubgaho, yemwe abahakunda mwese; munezeranwe na ho akanyamuneza, yemwe abāharirira mwese:

¹¹kugira ngo mwonke, muhāge amaberebere y’ibihahūmuriza, mugutanye munezererwe icubahiro caho c’umureto.

¹²Kuk’ ukw ari k’Uhoraho agize, at’ Ehe nzohasendanishiriza amahoro ameze nk’uruzi, n’ubgiza bg’amahanga bumeze nk’umugezi usebereye; ivyo ni vyo muzokwonka, muzoshirwa mu kwaha, musimbagirizwe ku bibero.

¹³Nk’uk’ umwana ahūmurizwa na nyina ni ko nzobahūmuriza; kandi muzohūmuririzwa i Yerusalemu.

¹⁴Muzobibona, kand’ imitima yanyu izonezerwa, n’amagufa yanyu azototahara nk’ubgatsi bubisi, kand’ ukuboko kw’ Uhoraho kuzomenyekana mu basavyi biwe, kand’ azorakira abansi biwe.

¹⁵Kuk’ Uhoraho azozanana n’ umuriro, kand’ imikogote yiwe izoba imeze nk’agashururu; kugira ngo yīmarishe ishavu uburake bg’inkazi, abahanishe imbeya z’ umuriro.

¹⁶Kuk’ Uhoraho azocira abantu bose amateka, ayacishe umuriro n’inkota yiwe, kand’ abazokwicwa n’Uhoraho bazoba ari benshi.

¹⁷Abiyeza bakiyuhagira kugira ngo baje mu bigabiro barōngōye, abarya inyama z’ ingurube n’iz’ ivyikwega hasi n’ imbeba, abo bose bazoshirira icarimwe, ni k’Uhoraho agize.

¹⁸Kuko nzi ibikorwa vyabo n’ ivyiyumviro vyabo. Igihe kigiye kuza nzokoranya amahanga yose n’ab’ indimi zose; bazoza babone ubgiza bganje.

¹⁹Kandi nzoshira ikimenyetso muri bo, abarokotse muri bo nzobatuma mu mahanga, i Tarushishi n’i Puli n’i Ludi mu bafozi b’imiheto, n’i Tubali n’i Yavani, mu baba ku kiyaga kure, aho bataribgumve ko ndi rurangiranwa, ntibabone n’icubahiro canje; maze bazokwīgānira amahanga icubahiro canje.

²⁰Nuko bazozana bene wanyu bose babakūye mu mahanga yose kw ishikanwa ryanje Uhoraho, bazoza bagendera ku mafarasi no mu mikogote ikwegwa na yo, no mu nderuzo no ku nyumbu no ku ngamiya, bashike ku musozi wanje wera Yerusalemu, ni k’Uhoraho agize; bizoba nk’ ukw Abisirayeli bahora bazana amashikanwa yabo mu nzu yanje Uhoraho, bayazanye mu bintu bitunganye.

²¹Kandi nzorobanuramwo bamwe mbagire abaherezi n’Abalewi, ni k’Uhoraho agize.

²²Kuko nk’ukw ijuru risha n’isi nsha, ivyo nzorema, bizohorah’ imbere yanje, ni k’ uruvyaro rwawe n’izina ryawe bizohoraho, ni k’Uhoraho agize.

²³Igihe kizoza uhereye mu mboneko z’ukwezi ukageza mu mboneko z’ukundi, no guhēra kw isabato ukageza ku yindi, abantu bose bazohora baza gusenga imbere yanje, ni k’Uhoraho agize.

²⁴Nuko bazosohoka baje kwitegereza imivyimba y’abangararije; kukw inyo zabo zitazopfa, kandi n’umuriro wabo ntuzime; kandi bazotera abantu bose ishishi.