Read Bibliya Yera 1951 Abalewi 13 Bible Online

Abalewi 13 - Bibliya Yera 1951 bible

Abalewi 13

²at’ Umuntu ni yagira igishundu, cank’ akagira ibintu bitongangiye, cank’ akagira ikibibi, ku mubiri wiwe inyuma ku rukoba, ico kintu kigahinduka indwara y’imibembe aho nyene ku rukoba rwiwe, baze bamuzanire Aroni umuherezi, cank’ umwe wo muri bene Aroni abaherezi.

³Nuk’ uwo muherezi asuzume iyo ndwara iri ku mubiri wiwe inyuma ku rukoba; maz’ ubgoya bg’aho hantu harwaye, ni yasanga bgahindutse bukēra, iyo ndwara igasa n’aho yinjiye imbere mu rukoba, iyo ndwara izoba ar’ iy’ imibembe: nuk’ uwo muherezi amusuzumye, avuge kw ahumanye.

⁴Na ho ni yasanga ico kibibi co ku mubiri wiwe cera, kandi kidasa n’aho cinjiye imbere mu rukoba, n’ ubgoya bgaho butāhindutse ngo bgere, nuk’ uwo muherezi yugarane uwo murwayi kumara imisi ndwi.

⁵Ku musi ugira indwi uwo muherezi amusuzume; ni yasanga iyo ndwara itayegayeze, ngo yunguruze inyuma ku rukoba, uwo muherezi asubire amwugarane kumara iyindi misi ndwi.

⁶Ku musi ugira indwi, yongere amusuzume; nuko ni yabona iyo ndwara irikw irazimangana, itunguruje inyuma ku rukoba, avuge kw adahumanye: kizoba car’ igisekera; uwo muntu agende amesure impuzu ziwe, abe uwejejwe.

⁷Arikw amaze guheza kwiyereka umuherezi, akezwa, ico gisekera kikunguruza inyuma ku rukoba, aze yongere kwiyereka umuherezi.

⁸Uwo muherezi amusuzume, maze ni yabona ico gisekera cunguruje koko aho nyene inyuma ku rukoba, avuge kw ahumanye: izoba ar’ imibembe.

⁹Umuntu ni yafatwa n’indwara y’imibembe, az’ azanirwe umuherezi;

¹⁰uwo muherezi amusuzume; maze ni haboneka ahashundashe, inyuma ku rukoba, hagatako hakēra, bigatuma ubgoya bgaho bgera, inyama zaho zikajējēta;

¹¹izoba ar’ imibembe yamaze igihe kirekire mu rukoba rw’umubiri wiwe: uwo muherezi avuge kw ahumanye, ntarinde kumwugarana, kukw ahumanye.

¹²Arikw imibembe ni yasēsa ku mubiri, ikarangiza umubiri wose w’uwafashwe n’iyo ndwara, uhereye ku mutwe ugashitsa ku birenge, ah’ umuherezi ageza amaso hose;

¹³uwo muherezi amusuzume: maze ni yabona iyo mibembe imukwiye umubiri wose, az’ avuge yuk’ uyo yafashwe n’iyo ndwara adahumanye: umubiri wiwe ko wahindutse ukēra hose, ntahumanye.

¹⁴Ariko ni yaramuka agize ahamyotse, hakaba inyama zijega, azoba ahumanye.

¹⁵Umuherezi az’ ahasuzume, avuge kw ahumanye: izo nyama zijega n’uguhumana: n’imibembe.

¹⁶Na ho ahar’ izo nyama zijega, ni hasubira guhinduka, hakēra, asubire ku muherezi,

¹⁷na we amusuzume; maze ni yasanga aho hārwaye hahindutse, hakēra, uwo muherezi avuge ko yahumanutse: azoba atagihumanye.

¹⁸Umuntu ni yagira inkovu y’ahahora igihute inyuma ku rukoba,

¹⁹maze muri nya nkovu hagashundaha hakabenjuka, canke hakaza ikibibi, hagatukura; haze herekwe umuherezi,

²⁰na we ahasuzume, maze ni yasanga ico kintu gisa n’icinjiye imbere mu rukoba, ubgoya bgaho bgahindutse, bukēra, uwo muherezi az’ avuge kw ahumanye: izoba ar’ indwara y’imibembe, yaziye mu nkovu y’igihute.

²¹Arik’ umuherezi ni yahasuzuma, agasanga hatar’ ubgoya bgera, kandi kitinjiye imbere mu rukoba, ariko kiriko kirazimangana, uwo muherezi az’ amwugarane kumara imisi ndwi.

²²Maze ni yasanga cunguruje inyuma ku rukoba, avuge kw ahumanye: izoba ar’ imibembe.

²³Arikw ico kibibi ni kitayegayega ngo cunguruze, kizoba ar’ inkovu ya ca gihute; umuherezi az’ avuge ko yeze.

²⁴Cank’ umuntu ni yagira ubushe ku mubiri wiwe, inyuma ku rukoba, inkovu yabgo igahinduka ikibibi, hagatukura canke hakabenjuka;

²⁵umuherezi az’ ahasuzume; ni yasanga ubgoya bgo mur’ ico kibibi buhindutse, bukēra, kigasa n’icinjiye imbere mu rukoba, izoba ar’ imibembe yaziye muri bga bushe: nuk’ uwo muherezi avuge kw ahumanye; izoba ar’ indwara y’imibembe.

²⁶Arik’ umuherezi ni yahasuzuma, agasanga ubgoya bgo mur’ ico kibibi butera, kandi kitinjiye imbere mu rukoba, ariko kiriko kirazimangana, uwo muherezi amwugarane kumara imisi ndwi.

²⁷Ku musi ugira indwi, uwo muherezi amusuzume; maze ni yasanga cunguruje inyuma ku rukoba, avuge kw ahumanye: izoba ar’ indwara y’imibembe.

²⁸Arikw ico kibibi ni kitayegayega ngo cunguruze inyuma ku rukoba, kandi kikaba kiriko kirazimangana, hazoba haje igishundu kiziye muri bga bushe: uwo muherezi avuge ko yeze; izoba ar’ inkovu y’ubgo bushe.

²⁹Kand’ umugabo cank’ umugore ni yafatwa n’indwara mu mutwe canke mu bganwa,

³⁰umuherezi az’ asuzume iyo ndwara; ni yabona isa n’iyinjiye musi y’ urukoba, umushatsi waho ugacēkūka, ukaba intaragande; avuge kw ahumanye: kizoba ar’ igiturika c’imibembe ifatiye mu mutwe canke mu bganwa.

³¹Arik’ umuherezi ni yasuzuma iyo ndwara y’igiturika, agasanga isa n’ah’ itinjiye imbere mu rukoba, kandi hatar’ umushatsi wirabura, uwo muherezi yugarane uwafashwe n’ iyo ndwara y’igiturika kumara imisi ndwi.

³²Ku musi ugira indwi umuherezi az’ asuzume iyo ndwara; maze ni yasanga ico giturika kitunguruje, hatar’ umushatsi ucēkūtse, kandi kidasa n’aho cinjiye imbere mu rukoba,

³³baheze bamumwe, arikw ah’ ico giturika kiri ntibahamwe; uwo muherezi asubire yugarane uwafashwe n’ico giturika iyindi misi ndwi.

³⁴Ku musi ugira indwi uwo muherezi asuzume ico giturika: maze ni yasanga kitunguruje inyuma ku rukoba, kandi kidasa n’aho cinjiye imbere mu rukoba, uwo muherezi avuge kw adahumanye: uwo muntu agende amesure impuzu ziwe, abe uwejejwe.

³⁵Arikw amaze guheza kwitwa uweze, ico giturika kikunguruza inyuma ku rukoba,

³⁶umuherezi aheze amusuzume; maze ni yasanga ico giturika cunguruje inyuma ku rukoba, ntiyirirwe aserangura umushatsi k’ucēkūtse: uyo azoba ahumanye.

³⁷Na ho ku ruhande rwiwe ni yasanga ico giturika kitayegayeze, n’umushatsi wahameze wirabura; ico giturika kizoba gikize, uwo muntu azoba yeze: umuherezi avuge ko yeze.

³⁸Kandi ni hagira umugabo cank’ umugore agira ibibibi ku mubiri wiwe inyuma ku rukoba, ivyo bibibi bikēra;

³⁹umuherezi az’ abisuzume: maze ni yasanga ivyo bibibi vyo ku mubiri wiwe vyeragurika gusa, bizoba ar’ amabara yadutse inyuma ku rukoba: uyo muntu azoba adahumanye.

⁴⁰Kand’ umugabo ni yavunguka umushatsi, buzoba ar’ ubuhanza, ariko ntazoba ahumanye.

⁴¹Kandi ni yavunguka umushatsi wo mu gitwariro, azoba ar’ ubuhanza yatobotse mu gitwariro, ariko ntazoba ahumanye.

⁴²Ariko ni haturika ibintu vy’indwara bitukura mu buhanza bgo mu gakomokomo canke mu bgo mu gitwariro; izoba ar’ imibembe yaje mur’ ubgo buhanza bgo mu gakomokomo canke mu bgo mu gitwariro.

⁴³Nuk’ umuherezi az’ amusuzume: maze ni yasanga ico gishundu arwaye gitukura aho nyene mu buhanza bgo mu gakomokomo canke mu bgo mu gitwariro, igasa n’imibembe ir’ inyuma ku rukoba;

⁴⁴uwo muntu azoba ar’ umunyamibembe, azoba ahumanye; umuherezi ntaz’ abure kuvuga kw ahumanye; iyo ndwara izoba yamufatiye mu mutwe.

⁴⁵Kand’ umunyamibembe iy’ arwaye iyo ndwara, agende yambaye impuzu zitantamutse, ahamburuye umushatsi wiwe, yipfutse ku munwa, agende arasemerera, ati Ndahumanye, ndahumanye!

⁴⁶Imisi yose akirwaye iyo ndwara azoba ahumanye; mber’ azoba ar’ igihumane, abe ukwiwe: az’ abe hirya y’aho mushagaje.

⁴⁷Kandi ni hagira umwambaro urikw indwara yo mu buryo bg’ imibembe, n’iyo woba wajishwe mu bgoya bg’intama, canke mu nyuzi zera derere;

⁴⁸iyo ndwara igafata kur’ ico kijishano uko kijishwe kwose, ari mu nyuzi zera derere canke mu z’ubgoya bg’ intama; cank’ igafata ku rusāto, canke ku kintu cose cakozwe mu rusāto;

⁴⁹iyo ndwara ikagomba gusa n’akatsi gatoto canke n’agahama, aho nyene ku mwambaro uk’ ujishwe kwose, canke ku rusāto, canke ku kintu cose cakozwe mu rusāto; iyo ndwara izoba ar’ iyo mu buryo bg’ imibembe: ivyo vyerekwe umuherezi.

⁵⁰Na we asuzume iyo ndwara, yugarane ico iriko kumara imisi ndwi.

⁵¹Ku musi ugira indwi asubire asuzume iyo ndwara; maze ni yasanga iyo ndwara yunguruje kur’ uwo mwambaro uk’ ujishwe kwose, canke kur’ urwo rusāto, ico rwoba rukora cose; iyo ndwara izoba ar’ imibembe igenda irarya: ico kintu kizoba gihumanye.

⁵²Aheze aturire uwo mwambaro, iyo ndwara namba yoba ifashe kur’ ico kijishano uko kijishwe kwose, ari mu nyuzi z’ubgoya bg’intama canke mu zera derere, canke namba yoba ifashe ku kintu cose cakozwe mu rusāto, kukw ar’ imibembe igenda irarya; ico kintu kize giturirwe.

⁵³Arik’ uwo muherezi ni yasuzuma, akabona iyo ndwara itunguruje kur’ uwo mwambaro uk’ ujishwe kwose, canke ku kintu cose cakozwe mu rusāto;

⁵⁴avuge ko bamesura ico iyo ndwara yafashe, aheze acugarane kumara iyindi misi ndwi.

⁵⁵Maz’ ico kintu indwara yafashe, uwo muherezi az’ agisuzume, kimaze kumesurwa; nuko ni yasanga ah’ iyo ndwara yafashe hadahinduye ibara, kand’ iyo ndwara itunguruje, na ho nyene kizoba gihumanye; kize giturirwe: izoba ar’ iyo ndwara igenda irarya, naho coba kibaye inkūte imbere cank’ inyuma.

⁵⁶Maz’ ico kintu indwara yafashe, uwo muherezi ni yagisuzuma, agasanga iyo ndwara irikw irazimangana, kimaze kumesurwa, aho hantu aheze ahatabure, ahakūre kur’ uwo mwambaro uk’ ujishwe kwose, canke kur’ urwo rusāto.

⁵⁷Maz’ iyo ndwara ni yasubira kwubuka kur’ uwo mwambaro uk’ ujishwe kwose, canke ku kintu cose cakozwe mu rusāto, izoba igitwarije; ico kintu kirimw’ iyo ndwara kize giturirwe.

⁵⁸Na ho iyo ndwara ni yaba yavuye mur’ uwo mwambaro uk’ ujishwe kwose, canke mu kintu ic’ ari co cose cakozwe mu rusāto, cari caramesuwe, kize gisubire kumesurwa ubugira kabiri, kibe gihumanutse.

⁵⁹Ico ni co cagezwe c’indwara yo mu buryo bg’imibembe ifashe umwambaro, ar’ uwajishwe mu bgoya bg’intama canke mu nyuzi zera derere, igafata kur’ ico kijishano uko kijishwe kwose, canke ku kintu cose cakozwe mu rusāto, ngo babone kuvuga ko gihumanye canke ko kidahumanye.