Read Bibliya Yera 1951 Abalewi 22 Bible Online

Abalewi 22 - Bibliya Yera 1951 bible

Abalewi 22

¹Uhoraho abarira Mose,

²ati Barira Aroni n’abana biwe baze bitonde mu kwēgēra ivyejejwe Abisirayeli banshikanira, boye gutukisha izina ryanje ryera: nd’ Uhoraho.

³Ubabarire yuk’ umuntu wese wo mu ruvyaro rwabo azokwēgēra ivyejejwe Abisirayeli banshikaniye, ahumanye, uk’ urunganwe rwabo ruzogenda rukurikirana, uwo muntu az’ arandurwe, akūrwe imbere yanje: nd’ Uhoraho.

⁴Umuntu wese wo mu ruvyaro rwa Aroni yabaye umunyamibembe cank’ afise igisokoro, ntaz’ arye ku vyera gushitsa ahumanutse. Kand’ ūzokora ku kintu ic’ ari co cose cahumanijwe no gukora ku muvyimba, canke ku mugabo intanga zavuyemwo;

⁵cank’ ūzokora ku kanyonyera ak’ ari ko kose, ar’ akomuhumanya, canke ku muntu, ar’ uwomuhumanisha ubuhumane ubg’ ari bgo bgose;

⁶ūzokora ku bimeze birtyo azoba ahumanye arinde ashitsa ku mugoroba; ntaz’ arye kur’ ivyo vyejejwe, shit’ abanje kwiyuhagira.

⁷Izuba ni ryamara kurenga azoba ahumanutse; ni h’azobona kurya ku vyejejwe, kukw ivyo ari vyo vyar’ indya ziwe.

⁸Icipfiriye cank’ ikirangara, ntaz’ agire ico arya muri vyo ngw acihumanishe: nd’ Uhoraho.

⁹Ni co gituma bakwiye kwitondera ibgirizwa ryanje, boye kwikwēgera icaha kubgaryo, rikabicisha, kuko bazoba bahumanije ivyejejwe: kukw ari jewe Uhoraho ndabeza.

¹⁰Ntihaze hagire ūtar’ uwo mu baherezi arya ku kintu cejejwe; umushitsi arāriye umuherezi, cank’ umucangero, ntaz’ arye ku kintu cejejwe.

¹¹Umuherezi ni yaramuka yaraguze umuntu, akaba uwo yiguriye amahera yiwe, uyo we azobiryako; n’abavukiye mu rugo rwiwe na bo bazorya ku vyo kurya vyiwe.

¹²Umukobga w’ umuherezi ni yābīrwa n’ūtar’ uwo mu baherezi ntaz’ arye ku vyejejwe vyashikanywe.

¹³Arik’ umukobga w’umuherezi apfakaye canke yirukanywe, atagira umwana, akaba igisubiramuhira mu rugo kwa se, akamera nk’uko yahoze mu bgana bgiwe, we azorya ku vyo kurya vya se: arik’ ūtar’ uwo mu baherezi ntaz’ abiryeko.

¹⁴Umuntu ni yaramuka ariye ku kintu cejejwe atabizi, az’ akirihe, asubize umuherezi ikingana n’ico kintu cejejwe yariye, akigerekeko n’ikingana n’ikigira gatanu caco.

¹⁵Kand’ abaherezi ntibaze bahumanye ivyejejwe Abisirayeli banshikaniye,

¹⁶bigatuma babacumuza, bikabazanira gutsindwa, iyo hagize abarya ku vyejejwe vyabo: kukw ari jewe Uhoraho ndabeza.

¹⁷Uhoraho abarira Mose,

¹⁸ati Barira Aroni n’abana biwe, n’Abisirayeli bose, yuk’ umuntu wese wo mu b’inzu ya Isirayeli, canke wo mu banyamahanga baba muri bo, azoha jewe Uhoraho ikimazi co kwoswa, ar’ ico gushitsa isezerano ryiwe, ar’ ico atanze avyigombeye,

¹⁹az’ atange ishuri cank’ isuguru y’intama cank’ iy’ impene, kugira ngw abone kwemerwa.

²⁰Arikw igifise agasembga cose ntimuze mugitange, kuko kitazokwemerwa ko mushikanye.

²¹Umuntu wese azotanga ikimazi c’ishimwe, akakimpa jewe Uhoraho ngw ashitse isezerano ryiwe, canke kikaba ico atanze avyigombeye, ar’ ico akūye mu busho canke mu mukuku, kize kibe ciza kugira ngo cemerwe: ntihaze hagire agasembga kibonekako.

²²Ntihaze hagire impumyi, cank’ ikivunitse, cank’ icakomerekejwe, cank’ igifise igisebe, cank’ ikirwaye umwirye, cank’ ubushita, muzonshikanira muri ben’ ivyo, canke ngo mugitange kw ishikanwa munshikaniye jewe Uhoraho, ngo gitōngōrwe n’umuriro ku gicaniro.

²³Ishuri cank’ umwana w’intama, hagize igifise urugingo rutareha n’izindi, umuntu aremererwa kugitanga kw ishikanwa ashikanye avyigombeye; ariko nticokwemerwa kuba ishikanwa ryo gushitsa isezerano yasezeranye.

²⁴Igifise amavya yahomberanye canke yamenetse canke yajanjaguritse canke yashahuwe, ntimuze mukinshikanire, jewe Uhoraho; ntimuze mugenze murtyo mu gihugu canyu.

²⁵N’iyo coba kizanywe n’umunyamahanga, ntimuze mwemere ikimeze girtyo na kimwe, ngo mukinshikanire kw imfungurwa, jewe Imana yanyu; ntikizokwemerwa ko mushikanye, kuko gitosekaye, kikabakw agasembga.

²⁶Uhoraho abarira Mose,

²⁷at’ Ishuri ni yavuka, cank’ umwagazi w’intama canke w’impene, iz’ imarane na nyina imisi ndwi; uhereye umusi ugira umunani yoshobora kwemerwa kuba ikimazi nshikanirwa jewe Uhoraho, gitōngōrwa n’umuriro.

²⁸Kand’ inka cank’ intama, ntimuze muzibāgane n’izazo ku musi umwe.

²⁹Kandi ni mwampa ikimazi co gukenguruka, mugitange uburyo butuma mwemerwa.

³⁰Kize kiribge kur’ uwo musi nyene mugitanzeko; ntihaze hagire ico musigaza ngo kirāre: ni jewe Uhoraho.

³¹Nuko muze mwitondere ivyagezwe vyanje, mubishitse: ni jewe Uhoraho.

³²Ntimuze mutukishe izina ryanje ryera, ariko nze name mboneka nd’Uwera hagati mu Bisirayeli: ni jewe Uhoraho ndabeza,

³³nabakūye mu gihugu ca Egiputa, ngo mbe Imana yanyu: ni jewe Uhoraho.