Read Bibliya Yera 1951 Abalewi 26 Bible Online

Abalewi 26 - Bibliya Yera 1951 bible

Abalewi 26

¹Ntimuze mwironderere ibigirwamana, canke ngo mushinge igishushanyo, ar’ ikibāzano, ar’ inkingi y’ibuye, kandi ntimuze mugire ikibuye mushira mu gihugu canyu gikorogoshoyekw ibishushanyo co kwunamira: kuko nd’ Uhoraho Imana yanyu.

²Muze mwitondere amasabato yanje, mwubahe Ahēra hanje: ni jewe Uhoraho.

³Ni mwahora mugendera mu mabgirizwa yanje, mukitondera ivyagezwe vyanje, mukavyumvira;

⁴nuko nanje nzogenda mbarekurira imvura mu bihe vyayo, n’ igihugu kizogenda cimbuka ivyimburo vyaco, n’ibiti vyo mu ndimiro bizokwama bitengengere.

⁵Igihe canyu c’isekura kizorinda gishitsa mw iyimbura ry’inzabibu, iryo yimbura na ryo ririnde rishitsa mw ibiba: muzokwama mu gahimbo, mwībēre mu gihugu canyu ata nkomanzi.

⁶Kandi nzoha ico gihugu kugira impore, muzokwiryamira ata kibateye akōba: kandi nzohaherengeteza ibikōko vy’inkazi, kandi nta nkota izogera mu gihugu canyu.

⁷Muzokinagiza abansi banyu, bahindikiranywe n’inkota imbere yanyu.

⁸Batanu muri mwebge bazokinagiza ijana, n’ijana muri mwebge bazokinagiza ibihumbi cumi, abansi banyu bazohindikiranywa n’ inkota imbere yanyu.

⁹Nzokwama mbashizek’ umutima, mbarōndōre, mbagwize, nkomeze isezerano ryanje namwe.

¹⁰Muzorya ibigugu vyahitikiranye, kandi muzodaha ibihitira kugira ngo mubone aho mwimburira ivyeze.

¹¹Nzoshira ihema ryanje hagati muri mwebge, kandi sinzokwigera ndabazinukwa.

¹²Nzogendera hagati muri mwebge, mbe Imana yanyu, namwe mube abantu banje.

¹³Ni jewe Uhoraho Imana yanyu, nabakūye mu gihugu ca Egiputa, kugira ngo ntimube abagurano babo; navunnye ibiti vy’ingōgo vyababoshe, mbaha kugenda mwemye.

¹⁴Ariko ni mutanyumvira, ntimwitondere ivyo vyagezwe vyose,

¹⁵kandi ni mwagaya amabgirizwa yanje, mukazinukwa ivyo nashinze, bigatuma mutitondera ivyagezwe vyanje vyose, mukica isezerano ryanje;

¹⁶nanje uko nzobagira n’uku: nzobagomorera ibibaca ivutu; kugenda mukōnyēra bo no kurwara inyonko bizotuma muhwera mu kajisho, imitima yanyu ihondobēre: muzorimira ubusa, kukw abansi banyu ari bo bazobirya.

¹⁷Kandi nzohoza igitsūre canje kuri mwebge, muzoneshwa n’abansi banyu: ababanka ni bo bazobaganza; kandi muzohunga ata kibirukanye.

¹⁸Ivyo ni bitātuma munyumvira, nanje nzokwongera kubahanira ivyaha vyanyu ibihetangabo ndwi.

¹⁹Nzocobogoza ubushobozi bganyu mwihaya, mpindure ijuru ryo hejuru yanyu nk’icuma, n’isi yanyu nk’umuringa.

²⁰Amaboko yanyu azopfa ubusa, n’igihugu canyu ntikizoruha cera, kandi n’ibiti vyo muri co ngo bigire ico vyama.

²¹Kandi ni mwashishikara kugenda munyuranya nanje, ntimunyumvire, nanje nzokwongera kubateza ivyago ibihetangabo ndwi bihwanye n’ivyaha vyanyu.

²²Kandi nzobatērēra ibikōko vyo mw ishamba, bitware abana banyu, biyigize amasho yanyu n’imikuku yanyu, bibatūvye, inzira zanyu zisibe.

²³Ivyo ni bitātuma mwihana ngo mumpindukirire, ariko mugashishikara kugenda munyuranya nanje,

²⁴nuko nanje nzogenda nnyuranya namwe, nzobakubita ibihetangabo ndwi jewe ubganje, mbahōra ivyaha vyanyu.

²⁵Kandi nzobatērēra inkota, ibahōre kuva mw isezerano ryanje; na ho ni mwirundaniriza mu bisagara vyanyu, nzobatērēra ikīza; kandi muzotangwa mu maboko y’abansi.

²⁶Ni navuna inkoni mwegamiye, ari yo vyo kurya vyanyu, abagore cumi bazoderenganiriza mu ziko rimwe, botsa udutsima, bazosigara babagaburira udutsima twa mugerwa: murye ututabahāgije.

²⁷Ivyo vyose ni bitātuma munyumvira, ariko mukagenda munyuranya nanje;

²⁸nuko nanje nzogenda nnyuranya namwe ndi n’uburake, kandi nzobahanira ivyaha vyanyu ibihetangabo ndwi.

²⁹Muzorya abahungu banyu n’ abakobga banyu.

³⁰Kandi nzokomvomvora ibitabo vyanyu vyo ku mpinga z’imisozi, nsiture ibishushanyo vyanyu vy’izuba, nshiburire imivyimba yanyu ku mirambararo y’ibigirwamana vyanyu; kandi nzobazinukwa mu mutima wanje.

³¹Nzohindura ibisagara vyanyu imisaka, ahēra hanyu ntume hatamārirwa, kandi sinzomoterwa n’ugutamirana kw’ibimoga vyanyu munyosereza.

³²Nzotuma igihugu canyu gitamārirwa, bijoreze abansi banyu bakibamwo.

³³Namwe nzobashwiragiriza mu mahanga, nsokōre inkota, mbirukane; igihugu canyu kizosigara gitamāriwe, n’ibisagara vyanyu bicike imisaka.

³⁴Ico gihe igihugu kizobona uko gishumbushwa ya masabato yaco, ico gihe cose kikir’ amatongo, namwe mukiri mu gihugu c’ abansi banyu; aho ni ho igihugu kizoruhuka, gishumbushwe ya masabato yaco.

³⁵Igihe cose kikir’ amatongo kizoruhuka ukuruhuka kitigeze kuruhuka ku masabato yanyu mukikibamwo.

³⁶Amasigarira yo muri mwebge nzotuma barandukira imitima mu gihugu c’abansi babo: bazokangwa n’ ukwumva akababi gakakaje, bahunge nk’ūhunga inkota; bazotemba ata kibirukanye.

³⁷Bazogwanako nk’abahunga inkota, ata kibirukanye; mbere ntimuzoshobora guhagarara abansi banyu imbere.

³⁸Muzohonera mu mahanga, igihugu c’abansi banyu kizobaherengeteza.

³⁹Amasigarira yo muri mwebge bazogenda bashirira umunywera mu gihugu c’abansi banyu kubg’ ibigabitanyo vyabo; kandi n’ibigabitanyo vya ba sekuruza bizotuma bagenda bashira umunywera nka bo.

⁴⁰Ariko ni bātura ibigabitanyo vyabo n’ibigabitanyo vya ba sekuruza, ari vyo bihemu vyabo, bakemera yuko kunyuranya nanje kwabo

⁴¹ari kwo kwatumye nanje nnyuranya na bo, nkabahindira mu gihugu c’abansi babo; kandi ni bicisha bugufi ico gihe mu mitima yabo imeze nk’imibiri itakebge, bakarīmbūka, bakemera yukw ibihano bāhanwe ar’ ivyazanywe n’ibigabitanyo vyabo;

⁴²ni ho nanje nzokwibuka isezerano ryanje nasezeraniye Yakobo, n’ iryo nasezeraniye Isaka, n’iryo nasezeraniye Aburahamu na ryo nzoryibuka; kandi n’igihugu na co nzocibuka.

⁴³Mber’ ico gihugu bazoba barakivuyemwo, gishumbushwe ya masabato yaco, gisigare ar’ imisaka batakikibamwo; na bo bazoba barīmbūtse, bemeye yukw ibihano bāhanwe ar’ ivyazanywe n’ibigabitanyo vyabo, kuko banse ivyagezwe vyanje, bakazinukwa amabgirizwa yanje.

⁴⁴Ariko naho bizomera birtyo, sinzobaheba, igihe bazoba bari mu gihugu c’abansi babo, kandi sinzobazinukwa, ngo ndabahenebereze rwose, mve mw isezerano ryanje nabasezeraniye: kuko nd’ Uhoraho Imana yabo.

⁴⁵Ariko kubgabo nzokwibuka isezerano nasezeraniye ba sekuruza, abo nakūye mu gihugu ca Egiputa amahanga arorēra, kugira ngo mbe Imana yabo: ni jewe Uhoraho.

⁴⁶Ayo ni yo mabgirizwa n’ ivyashinzwe n’ivyagezwe, ivyo Uhoraho yashize hagati yiwe n’ Abisirayeli, abigereye ku musozi Sinayi, abitumye Mose.