Read Bibliya Yera 1951 Yeremiya 13 Bible Online

Yeremiya 13 - Bibliya Yera 1951 bible

Yeremiya 13

¹Uku ni k’Uhoraho yambariye, ati Genda wigurire umukanda w’impuzu yera, uwukenyeze, ntuwukoze mu mazi.

²Nuko ngura umukanda nk’ukw ijambo ry’ Uhoraho ryambariye, ndawukenyeza.

³Ijambo ry’ Uhoraho rinzako ubugira kabiri,

⁴riti Jana wa mukanda wagura, umwe ukenyeye, uve hasi uje kuri Efurate, uwunyegezeyo mu mugāga wo mu gitandara.

⁵Nuko ndagenda, ndawuhisha i ruhande ya Efurate, nk’uk’ Uhoraho yangeze.

⁶Hanyuma hahise imisi myinshi, Uhoraho arambarira, ati Va hasi, uje kuri Efurate, ukūreyo wa mukanda, umwe nakubarira kunyegezayo.

⁷Nuko ndagenda nja kuri Efurate, ndaseregeta nkūra wa mukanda ahantu nari narawunyegeje: nsanga wa mukanda warononekaye, ata co ukimaze.

⁸Maz’ ijambo ry’Uhoraho rinzako,

⁹rit’ Uku ni k’Uhoraho agize, at’ Uko ni ko nzokwonona amanyama y’ Ubuyuda n’amanyama akomeye y’i Yerusalemu.

¹⁰Aba bantu b’abanyakibi, uko bākanse kwumva amajambo yanje, bakagendera mu budadarare bg’imitima yabo, bagakurikira izindi mana ngw abe ari zo basaba, bazisenge, bazomera nk’uyu mukanda utakigira ico umaze.

¹¹Nk’uk’ umukanda uramata ubura bg’ umuntu, uko ni ko nari naratumye inzu yose ya Isirayeli indamatako, bo n’inzu yose ya Yuda, ni jewe Uhoraho mbivuze; kugira ngo bambere ubgoko niharije, bampeshe izina ry’iritazirano, n’icubahiro n’ubgiza: ariko banka kwumva.

¹²None rer’ ubabgire iri jambo, ut’ Uku ni k’Uhoraho agize, ni we Mana y’Abisirayeli, at’ Umubindi wose uzokwuzuzwa vino. Na bo bazokwishura, bat’ Ugira ngo ntitwari tubizi yuk’ umubindi wose uzokwuzuzwa vino?

¹³Ni ho uzoca ubabgira, ut’ Uku ni k’Uhoraho agize, at’ Ehe ngira nuzuze ababa mur’ iki gihugu bose ubudandahirwe, uhereye ku bami uko bakūranwa ku ngoma ya Dawidi, no ku baherezi, no kuri ba kamenyi, no ku baba i Yerusalemu bose.

¹⁴Nzobasekanisha nk’impfizi z’intama, umwe n’uwundi, abana na ba se, ni jewe Uhoraho mbivuze: nta kagongwe nzogira, cank’ impuhwe, cank’ imbabazi, ngo bimbuze kubageseza.

¹⁵Ni mwumve, mutege amatwi: nta co mugira ubgibone; kuk’ Uhoraho ari we avuze.

¹⁶Muheshe Uhoraho Imana yanyu icubahiro, atarazana umwiza, ibirenge vyanyu bitaratsitarira ku misozi icuze umwiza; namwe muciteze umuco akawuhindura igitūtu c’urupfu, akawugira umwiza w’umuzitanya.

¹⁷Ariko ni mwanka kuvyumva, umutima wanje uzoririra mu mpisho, urizwe n’ubgibone bganyu; amaso yanje azorira cane, acundugute amosozi, kuk’ umukuku w’intama z’Uhoraho unyazwe.

¹⁸Barira umwami n’umugabekazi, uti Ni mwicishe bugufi, mwicare hasi, kukw ibitsibo vyanyu bishajije mwambaye mu mutwe biriko birakoroka.

¹⁹Ibisagara vy’i bumanuko birugarijwe, nta wugicārūka: Abayuda bajanywe kw inyagano bose, ntihasigara n’uwa kirazira.

²⁰Ni wunamure amaso, urābe abaje baturutse i burārūko: mbeg’ umukuku wahawe uri hehe, wa mukuku wawe mwiza?

²¹Abo wironkeyekw abagenzi ni yabashira hejuru yawe ngo bakuganze, uzovuga iki, kand’ ari wewe wabiyigishirije? Mbeg’ umubabaro ntuzogufata nk’uw’ umugore ari ku nda?

²²Kandi ni wibaza mu mutima, uti N’iki gitumye mbonye aya? Umurengera w’ibigabitanyo vyawe ni wo watumye impuzu zawe zigukūrwako, ibitsintsiri vyawe bigasigara ar’ inkobe.

²³Mbeg’ Umunyetiyopiya yoshobora guhindura urukoba rw’umubiri wiwe, cank’ ingwe yokwihindura amabara yayo? Ivyo bishobotse, namwe mwoshobora gukora ivyiza, mwebge abāmogoreye gukora ibibi.

²⁴Nuko rero nzobashwiragiza, nk’ibishingwe bitwawe n’umuyaga wo mu bugaragwa.

²⁵Ivyo ni vyo bizokubako, ni wo mugabane nkugereye, ni jewe Uhoraho mbivuze, kuko wanyibagiye ukizigira ibinyoma.

²⁶Nuko rero nanje nzogukūrakw impuzu, mfate ku musozo ndenze ku mutwe wawe, ubgambure bgawe buboneke.

²⁷Nabonye ibizira vyawe, ni bgo busambanyi bgawe, n’ukuroherana kwawe, ni bgo bushakanyi bg’ubusambanyi bgawe, ku misozi no ku gahinga. Uzobona ibara, ewe Yerusalemu! Ko wanse kwezwa: mbeg’ uzogeza ryari?