Read Bibliya Yera 1951 Yeremiya 20 Bible Online

Yeremiya 20 - Bibliya Yera 1951 bible

Yeremiya 20

¹Nuko Pashuri mwene Imeri umuherezi, yar’ umubgiriza mukuru wo mu ngoro y’Uhoraho, yumvise Yeremiya avuze izo mbūri,

²aca aramukubita, amushira mu mpatane z’ibiti vyari ku kirimba gihera haruguru citwa ica Benyamini, kirora ku ngoro y’ Uhoraho.

³Bukeye Pashuri akūra Yeremiya mur’ izo mpatane. Maze Yeremiya aramubgira, at’ Uhoraho ntiyakwise Pashuri,[5] ariko yakwise Magori‐misabibu.[6]

⁴Kuk’ ukw ari k’Uhoraho agize, ati Nzotuma wikanga, ukange na bagenzi bawe bose; bazohindikiranywa n’inkota z’abansi babo, nawe amaso yawe azovyibonera. Nzotanga Ubuyuda bgose mu kuboko kw’umwami w’i Babuloni, kand’ azobajana ar’ inyagano i Babuloni, kand’ azobicisha inkota.

⁵Ikigeretseko nzotanga itunga ryose ry’iki gisagara, n’ivyar’ inyungu zaco, n’ivy’ igiciro vyaco vyose, mbere n’ibitayega vyose vy’abami b’i Buyuda, mbitange mu maboko y’abansi babo bazoba babanyaze, babafashe, babajanye i Babuloni.

⁶Kandi nawe, Pashuri, mwe n’abo mu rugo rwawe bose, muzojanwa kw inyagano: kand’ uzoshika i Babuloni, ni yo uzogwa, ni yo uzohambga, mwe na bagenzi bawe bose, abo warotoreye ivy’ ibinyoma.

⁷Ewe Uhoraho, waranyoheje ndoha, wandushije inkomezi, uranjaniranya: mpindutse agatwengo kurenza umusi, umuntu wese arancokora.

⁸Kukw iyo mvuze, mvugira hejuru; mvugira hejuru, nti Har’ umuryano n’ubunyazi! Mber’ ijambo ry’Uhoraho ryampinduye agatukisha n’agatwengo kurenza umusi.

⁹Iyo mvuze, nti Sinzosubira kumuvuga, canke ngo ngire ico mvuga mw izina ryiwe, haca haba nk’umuriro uyingana mu mutima wanje, uhīshije uburimbi amagufa yanje, bikangora kwiyumanganya, nkaba ntobishobora.

¹⁰Kuko numvise benshi bandementaniriza, ubgoba bukantera irya n’ino. Abakunzi banje pfampfe bose, ni bo barereka ko notsitara, bavuga, bati Mumurege, natwe tumurege, kumbure yogwa mu mutego, natwe tukamunesha, tukamwīhōra.

¹¹Ariko noneh’ Uhoraho ari kumwe nanje nk’umunyenkomezi n’uw’ igitinyiro; ni co kizotuma abampama batsitara, ntibaneshe: bazorimarima rwose kuko batākoze ivy’ ubgenge, bagire ibitētērwa bitazobavako, bitazoruha vyibagirana.

¹²Ariko wewe, Uhoraho Nyen’ ingabo, wewe ugerageza abagororotsi, ukitegereza imishaha n’imitima, umpe kwibonera ingen’ ubīhōra, kukw ari wewe nitwayeko.

¹³Muririmbire Uhoraho, muhimbaze Uhoraho: kuko yarokoye ubugingo bg’umukene, akabukūra mu maboko y’inkozi z’ibibi.

¹⁴Umusi navukiyeko uravumwe! Umusi mama yamvyariyeko ntube ucitwa uw’ amahirwe.

¹⁵Aravumwe umuntu yazaniye inkuru data, at’ Uvyaye umwana w’umuhungu; bikamunezereza cane.

¹⁶Uwo muntu n’abe nka vya bisagara Uhoraho yasanganguye, ata kagongwe: ni yumve amaborogo mu gatondotondo, n’ akarūru ku murango;

¹⁷kukw atānyishe nkiri mu nda ya mama; ni ko mama yombereye imva, akazokwama akuriwe.

¹⁸N’iki cankūye mu nda, ngo nze mbone ubutame n’umubabaro, imisi yanje nkayimara mu bitētērwa?