Read Bibliya Yera 1951 Yeremiya 21 Bible Online

Yeremiya 21 - Bibliya Yera 1951 bible

Yeremiya 21

¹Ijambo ryaje kuri Yeremiya rivuye k’Uhoraho, igihe umwami Zedekiya yamutumako Pashuri mwene Malakiya na Zefaniya mwene Mayaseya umuherezi,

²muti Basigurize Uhoraho; kuko Nebukadineza umwami w’i Babuloni ateye: kumbure Uhoraho yotugirira nk’ukw ibikorwa vyiwe vyose vy’igitangaza bimeze, agatuma asubira inyuma akatureka.

³Maze Yeremiya arabishura, at’ Uku abe ari ko mubarira Zedekiya:

⁴mut’ Uku ni k’Uhoraho agize, ni we Mana y’Abisirayeli, at’ Ehe nzobakubiranya hamwe n’ibirwanishwa biri mu maboko yanyu, ivyo murwanisha umwami w’i Babuloni n’Abakaludaya babugarije, muriko murabarwanisha inyuma y’inzitiro z’iki gisagara, mbakoranirize hamwe hagati muri co.

⁵Kandi nanje ubganje nzobarwanya, mbarwanishe ukuboko kubānguye n’ukuboko kw’inkomezi, ndi n’ishavu n’ubushangashirwe n’uburake bg’inkazi.

⁶Kandi nzokubita ababa mur’ iki gisagara, abantu n’ibitungwa: bazokwicwa n’ikīza gikomeye.

⁷Kandi hanyuma y’ivyo, ni jewe Uhoraho mbivuze, nzogabura Zedekiya umwami w’Abayuda, n’ abasavyi biwe, n’abantu bazoba bagisigaye mur’ iki gisagara, batishwe n’ikīza n’inkota n’inzara, mbashire mu kuboko kwa Nebukadineza umwami w’i Babuloni, no mu maboko y’abansi babo, no mu maboko y’abarondera kubica: azobicisha ubugi bg’inkota; ntazobagirira impuhwe cank’ akagongwe cank’ imbabazi.

⁸Maz’ aba bantu ubabarire, ut’ Uku ni k’Uhoraho agize, ati Rāba mbashize imbere inzira y’ubugingo n’inzira y’urupfu.

⁹Ūguma mur’ iki gisagara azokwicwa n’inkota n’inzara n’ikīza: arik’ ūsokoroka muri co, akīsaba Abakaludaya babugarije, azobaho, kand’ azoba akijije amagara yiwe.

¹⁰Kuko ntungiriye igitsure iki gisagara ngo nkizanekw amagorwa, sinkizanekw amahirwe, ni jewe Uhoraho mbivuze; kizotangwa mu kuboko kw’umwami w’i Babuloni, kand’ azogitongoza umuriro.

¹¹Kandi ku vy’inzu y’umwami w’i Buyuda, ni mwumve ijambo ry’ Uhoraho:

¹²Ewe nzu ya Dawidi, uku ni k’Uhoraho agize, ati Ni muce imanza ziroranye uko bukeye, mukize ūnyazwe mumukūre mu kuboko kw’ūmuhahaza, uburake bganje bgoye kurabagiza nk’umuriro, bukarurumba ntihagire ūshobora kubuzimya, kubg’ ibibi mukora.

¹³Rāba nzohigūra nawe, wewe gisagara cubatswe ku mushasha, ku gitandara co mu kiyaya, ni jewe Uhoraho mbivuze; yemwe abavuga, muti Ni nde yorinduka kumanuka ngw adutere? Canke ni nde yoshika mu ngo zacu?

¹⁴Nzobahana nk’ukw ibikorwa vyanyu vyamuje, ni jewe Uhoraho mbivuze; kandi nzodomeka umuriro mu kibira caho uzotongora ibiri hirya no hino yaho vyose.