Read Bibliya Yera 1951 Yeremiya 22 Bible Online

Yeremiya 22 - Bibliya Yera 1951 bible

Yeremiya 22

¹Uku ni k’Uhoraho agize, ati Manuka uje ku ngoro y’ umwami w’i Buyuda, uhavugire iri jambo,

²uti Ni wumve ijambo ry’ Uhoraho, yewe mwami w’i Buyuda, uri ku ngoma ya Dawidi, wewe n’abasavyi bawe, n’abaca mur’ aya marembo.

³Uku ni k’Uhoraho agize, ati Ni muce imanza ziroranye n’izigororotse, mukize ūnyazwe, mumukūre mu kuboko kw’ ūmuhahaza; ntimugirire nabi canke ngo muhahaze ingenzi n’ impfuvyi n’umupfakazi, canke ngo muvishirize aha hantu amaraso y’ abatācumuye.

⁴Kuko ni mwagenza murtyo koko, ni ho mu birimba vy’iki gisagara hazoca abami uko bakūranwa ku ngoma ya Dawidi, bagendera mu mikogote no ku mafarasi, umwami wese n’ abasavyi biwe n’abantu biwe.

⁵Ariko ni mwanka kwumva ayo majambo, iyi ngoro izocika umusaka, ndirahiye ubganje, ni jewe Uhoraho mbivuze.

⁶Kuk’ ukw ari k’Uhoraho agize, ku vy’ingoro y’umwami w’i Buyuda, ati War’ umbereye nka Gileyadi, canke nk’ agatwe ka Lebanoni: n’ukuri nzoguhindura ubugaragwa, ube nk’ ibisagara bitakirimw’ umuntu.

⁷Kandi nzogutegurira abo kugusangangura, umuntu wese muri bo afise ibirwanishwa; bazohimbagura inkingi zawe z’amasederi meza, baziterere mu muriro.

⁸Kand’ amahanga menshi azoca i ruhande y’iki gisagara, bazobazanya, bati N’iki catumye Uhoraho agirira artyo iki gisagara gihambaye?

⁹Maze bazobishura, bati Ni kuko bātaye isezerano bāsezeranye n’Uhoraho Imana yabo, bagasenga izindi mana bakazisaba.

¹⁰Ntimukaririre uwamaze gupfa, canke ngo mumuborogere: ariko muririre uwagiye mazimayongo, kukw atazoba akigaruka ukundi, canke ngw asubire kubona igihugu yavukiyemwo.

¹¹Kuko ku vya Shalumu mwene Yosiya umwami w’i Buyuda, yasubiye ku ngoma ya se Yosiya, yavuye aha hantu akagenda mazimayongo: ntazosubira kugaruka ino ukundi, ni jewe Uhoraho mbivuze;

¹²arikw iyo bāmushorereye ar’ inyagano ni yo azogwa, kandi ntazosubira kubona iki gihugu ukundi.

¹³Azobona ibara uwubakisha inzu yiwe mu biva mu kugabitanya, akayitegurisha ibigungano; agakoresha mugenzi we ku kagōbēro, ntamuhe ingero yiwe;

¹⁴akavuga, ati Hinge niyubakire inzu nini n’ivyumba vyagutse, akayicamw’ amadirisha; akayishiramw’ insenge z’amasederi, akazisīga irangi ritukura.

¹⁵Mbeg’ ubeshejwe ku ngoma n’uk’ urushije abandi kwubakisha amasederi? Mbega so ntiyabonye gufungura no kwuhira? Yamara we yaciye iziroranye n’izibereye; maze yibereye amahoro.

¹⁶Yaciriye urubanza umworo n’umukene; maze hakaba amahoro. Mbeg’ ivyo si kwo kummenya kw’ukuri? ni jewe Uhoraho mbibajije.

¹⁷Ariko weho amaso yawe n’umutima wawe nta handi bitumbereye atar’ ukwifuza inyungu mbi, no kuvisha amaraso y’abatācumuye, no guhahaza, n’umuryano.

¹⁸None rero, uku ni k’Uhoraho agize ku vya Yehoyakimu mwene Yosiya umwami w’i Buyuda, ati Ntibazomuborogera, bat’ Ewe musazanje! Ewe mwana wa mama! Ntibazomuborogera, bat’ Ewe mwami wanje! Ewe cubahiro ciwe!

¹⁹Azotabga nk’uko bata indogoba, bamukweze bamushiburiye inyuma y’ibirimba vy’i Yerusalemu.

²⁰Dūga i Lebanoni, utake; shira ijwi hejuru ur’ i Bashani; taka uhagaze ahitwa Abarimu; kukw abūzure bawe bose bageseye.

²¹Navuganye nawe igihe war’ umerewe neza, arik’ uravuga, uti Sinduha ndavyumva. Iyo ni yo ngeso yawe uhereye mu buto bgawe, yo kutanyumvira.

²²Umuyaga ni wo uzoragira abungere bākuragira bose, kand’ abūzure bawe bazoja mu mugozi: bibaye birtyo ntuzobura gutētērwa no kumāramāra kubg’ ibibi vyawe vyose.

²³Ewe uba kuri Lebanoni, ukārika icāri cawe mu masederi, es’ ukuntu uzoba uteye akagongwe igihe ibise bizoba bigufashe, nk’umubabaro w’umugore aramutswe!

²⁴Ndahiye ukubaho kwanje, ni jewe Uhoraho mbivuze, yuko naho wewe Koniya mwene Yehoyakimu umwami w’i Buyuda woba impeta y’ikimenyetso ku kuboko kwanje kw’i buryo, na ho nyene nogushikura nkagukūraho;

²⁵kandi nzokugabura mu maboko y’abarondera kukwica, no mu maboko y’abo utinya, mbere no mu kuboko kwa Nebukadineza umwami w’i Babuloni, no mu maboko y’Abakaludaya.

²⁶Kandi nzogushiburana na nyoko yakuvyaye, mbashiburire mu kindi gihugu, aho mutāvukiye; aho ni ho muzogwa.

²⁷Arikw igihugu imitima yabo yifuza kugarukamwo, ntibazokigarukamwo na mba.

²⁸Mbeg’ uyu Koniya n’urwavya rukēngērwa rusāvye? N’urwavya rudahimbaye? N’iki catumye bashiburwa, bashiburirwa mu gihugu batazi?

²⁹Ewe wa gihugu we, wa gihugu we, wa gihugu we, ni wumve ijambo ry’Uhoraho!

³⁰Uku ni k’Uhoraho agize, ati Ni mwandike uyu muntu kw abaye incike, umuntu atazopfa aroraniwe: kukw ata wo mu ruvyaro rwiwe azororanirwa, ngw asubire ku ngoma ya Dawidi, canke ngw az’ asubire kuganza i Buyuda.