Read Bibliya Yera 1951 Yeremiya 27 Bible Online

Yeremiya 27 - Bibliya Yera 1951 bible

Yeremiya 27

¹Mu matangura yo kuba ku ngoma kwa Yehoyakimu mwene Yosiya umwami w’Abayuda, haza iri jambo kuri Yeremiya rivuye k’Uhoraho,

²riti Rondera imvuto n’ingōgo, bimwe uvyiyambike mw izosi,

³ibindi ubirungikire umwami w’i Edomu, n’umwami w’i Mowabu, n’ umwami w’Abamoni, n’umwami w’i Tiro, n’umwami w’i Sidoni, ubirungikane intumwa zaje i Yerusalemu zitumwe kuri Zedekiya, umwami w’i Buyuda;

⁴ubatume amajambo bashīra ba shebuja, ut’ Uku ni k’Uhoraho Nyen’ ingabo agize, ni we Mana y’Abisirayeli, at’ Uku abe ari ko mubarira ba shobuja,

⁵mut’ Uhoraho agize ngo Ni jewe naremye isi, n’abantu n’ibikōko biri kw isi, mbiremesha ubushobozi bganje bginshi n’ukuboko kwanje kurāmvuye; kand’ ivyo mbigabira uwo ngomba.

⁶Kandi non’ ibi bihugu vyose mbishize mu kuboko kwa Nebukadineza umwami w’i Babuloni, umusavyi wanje; ndamuhaye n’ibikōko vyo ku misozi kumukorera.

⁷Kand’ amahanga yose azomusaba, asabe n’umwana wiwe n’umwuzukuru wiwe, gushitsa igihe co kūzirwa kw’igihugu ciwe kigeze; ni ho amahanga menshi n’abami bahambaye bazomuhindura umuja na we.

⁸Maz’ ihanga ryose cank’ igihugu c’ umwami wese, ni habah’ abatemera gusaba Nebukadineza, uyo mwami w’i Babuloni, canke ngo bemere kugondera izosi ingōgo yiwe, iryo hanga nzorihana, ni k’ Uhoraho agize, ndarihanishe inkota n’inzara n’ikīza, gushitsa aho nzoba mperaheje kubaranduza ukuboko kwiwe.

⁹None rero mwebge, ntimuruhe mwumvira ba kamenyi banyu, cank’ abapfumu banyu, cank’ inzozi zanyu, cank’ abamenyi banyu, cank’ abarozi banyu, bababarira, bati Ntimuzoruha musaba umwami w’i Babuloni:

¹⁰kuko babaragurira ibinyoma, kugira ngo mwambukanwe kure y’igihugu canyu, no kugira ngo nanje ndakibirukanemwo, muhone.

¹¹Arikw ihanga rizogondera izosi umwami w’i Babuloni, rikamusaba, iryo nzoryemerera kuguma mu gihugu cabo bgite, ni jewe Uhoraho mbivuze; bazokirima, bakibemwo.

¹²Nuko mbarira Zedekiya umwami w’i Buyuda nk’ukw ayo majambo yose ameze, nti Ni mugondere izosi ingōgo y’umwami w’i Babuloni, mumusabe, musabe n’abantu biwe, mubone kubaho.

¹³Mugombera iki gupfa, wewe n’abantu bawe, ngo mwicishwe inkota n’inzara n’ikīza, nk’uk’ Uhoraho yavuze kw ihanga ritazokwemera gusaba umwami w’i Babuloni?

¹⁴Ntimuruhe mwumvira amagambo ya ba kamenyi bababarira, bati Ntimuzoruha musaba umwami w’i Babuloni: kuko babaragurira ibinyoma.

¹⁵Kuk’ Uhoraho avuze kw atari we yabatumye, ariko bavuga ibinyoma mw izina ryiwe; kugira ngw abirukane, muhone, mwe n’ abo ba kamenyi babaragurira.

¹⁶Kandi mbarira n’abaherezi n’ ubgo bgoko bgose, nt’ Uku ni k’Uhoraho agize, ati Ntimuruhe mwumvira amagambo y’abo ba kamenyi banyu babaragurira, bat’ Ibintu vy’imbombovu vyo mu ngoro y’Uhoraho bizohava bigarukanwa bive i Babuloni: kuko babaragurira ibinyoma.

¹⁷Ntimuruhe mubumvira: musabe umwami w’i Babuloni, mubone kubaho: n’iki cotuma iki gisagara gihinduka amatongo?

¹⁸Namb’ ar’ abavugishwa n’Imana, kandi namb’ ijambo ry’Uhoraho riri muri bo, ni bashireko binginge Uhoraho Nyen’ ingabo ngw ibintu vy’imbombovu bisigaye mu ngoro y’Uhoraho no mu ngoro y’umwami w’i Buyuda, n’i Yerusalemu, bireke kujanwa i Babuloni.

¹⁹Kuk’ ukw ari k’ Uhoraho Nyen’ ingabo agize ku vy’inkingi, no ku vya ca gikarabiro citwa ikiyaga, no ku vy’ibitereko, no ku vy’ibisigaye vy’imbombovu bigisigaye mur’ iki gisagara,

²⁰ivyo Nebukadineza umwami w’i Babuloni atātwaye, igihe yajana Yekoniya mwene Yehoyakimu umwami w’i Buyuda ar’ inyagano, amukūye i Yerusalemu amujanye i Babuloni, bo n’abaganwa bose b’i Buyuda n’i Yerusalemu;

²¹n’ukuri uku ni k’Uhoraho Nyen’ ingabo agize, ni we Mana ya Isirayeli, ku vy’ibintu vy’imbombovu bisigaye mu ngoro y’Uhoraho no mu ngoro y’umwami w’i Buyuda, n’i Yerusalemu:

²²ati Bizojanwa i Babuloni, bibeyo, gushitsa umusi azobagendera, akabidūgana, akabisubiza aha hantu; ni k’Uhoraho agize.