Read Bibliya Yera 1951 Yeremiya 29 Bible Online

Yeremiya 29 - Bibliya Yera 1951 bible

Yeremiya 29

¹Aya ni yo majambo y’icete ūvugishwa n’Imana Yeremiya yarungitse ar’ i Yerusalemu, akirungikira abāsigaye b’abashingantahe mu bambukanywe, n’ abaherezi n’abavugishwa n’abantu bose Nebukadineza yambukanye abakūye i Yerusalemu abajana i Babuloni.

²Ico gihe umwami Yekoniya n’umugabekazi n’abantu b’inkone n’abaganwa b’i Buyuda n’i Yerusalemu n’ababāji n’abacuzi, bāri bamaze kuvanwa i Yerusalemu.

³Akirungikana Elasa mwene Shafani na Gemariya mwene Hilukiya, abo Zedekiya umwami w’i Buyuda atumye i Babuloni kuri Nebukadineza umwami w’i Babuloni, cāri canditse,

⁴ng’ Uku ni k’ Uhoraho Nyen’ ingabo agize, ni we Mana y’Abisirayeli, abarira abānyazwe bose, abo yambukanishije ngo bakūrwe i Yerusalemu bajanwe i Babuloni,

⁵ati Ni mwiyubakire amazu, muyabemwo; mwirimire amatongo murye ibiyezemwo;

⁶mwiyabīrire abagore, muvyare abahungu n’abakobga; musabire abahungu banyu abageni, mushingire abakobga banyu, kugira ngo na bo bavyare abahungu n’abakobga; murondokereyo, ntimube inkehwa.

⁷Mwifurize amahoro igisagara, ico natumye mwambukanirwamwo, mugisengere Uhoraho: kuko kibaye amahoro namwe muzoba amahoro.

⁸Kuk’ ukw ari k’ Uhoraho Nyen’ ingabo agize, ni we Mana y’Abisirayeli, ati Ba kamenyi banyu baba muri mwebge n’abapfumu banyu ntibabahende, kandi ntimukumvire inzozi babarotera.

⁹Kuko babaragurira ibinyoma mw izina ryanje, nanje ntābatumye, ni jewe Uhoraho mbivuze.

¹⁰Kuk’ ukw ari k’Uhoraho agize, at’ Imyaka mirongwirindwi ni yarangira mur’ i Babuloni, nzobagendera, mbashitsekw ijambo ryanje ryiza, mbagarukane aha hantu.

¹¹Kuko nzi ivyiyumviro mbiyumvirako, ni jewe Uhoraho mbivuze, kw ar’ ivyiyumviro vy’amahoro, atar’ ivy’ ivyago, kugira ngo mbahe ivyizigiro vyo mw iherezo ryanyu.

¹²Kandi muzonyambaza, muzoza munsenge, nanje nzobumva.

¹³Muzondondera kandi muzombona, ni mwandondeza umutima wanyu wose.

¹⁴Nanje nzobabonekera, ni jewe Uhoraho mbivuze, ntume muhindukira, muve mu kinyago, kandi nzobakoranya mbakūye mu mahanga yose n’ahantu hose aho nabirukaniye, ni jewe Uhoraho mbivuze; kandi nzobagarukana ahantu nabakūye igihe nabambukanisha.

¹⁵Ko muvuga, mut’ Uhoraho yaduhagurukirije abavugishwa na we i Babuloni.

¹⁶Uku ni k’ Uhoraho agize ku vy’umwami ari ku ngoma ya Dawidi, no ku vy’ abantu bose baba mur’ iki gisagara, ni bo bene wanyu mutājanye igihe mwambukanwa;

¹⁷uku ni k’Uhoraho Nyen’ ingabo agize, ati Rāba nzorungika inkota n’ inzara n’ikīza muri bo, mbahindure nk’insukoni ziteye ishishi, zidashoboka kuribga kubgo kubora.

¹⁸Nzobirukanisha inkota n’inzara n’ikīza, mbatange batererekanywe irya n’ino mu bihugu vy’abami bose bo mw isi, ngo babe ibivume n’akajoreza n’ abo kuvuzwakw agahwa n’igitutsi mu mahanga yose aho nabirukaniye;

¹⁹kuko batumviye amajambo yanje, ni jewe Uhoraho mbivuze, ayo natumye abasavyi banje mvugisha, nama nzindurwa no kubatuma, ariko ntibaruha bumva, ni jewe Uhoraho mbivuze.

²⁰None rero ni mwumve ijambo ryanje, jewe Uhoraho, mwebge mwese abambukanywe, abo narungitse ngo muve i Yerusalemu muje i Babuloni.

²¹Uku ni ko mvuze, jewe Uhoraho Nyen’ ingabo, Imana y’Abisirayeli, ku vya Ahabu mwene Kolaya no ku vya Zedekiya mwene Mayaseya, babaragurira ibinyoma mw izina ryanje, nt’ Ehe nzobatanga mu kuboko kwa Nebukadineza umwami w’i Babuloni, na we azobicira imbere y’ amaso yanyu;

²²kandi bazohinduka umuvumo wo kuvumana w’abambukanywe bose b’i Buyuda bar’ i Babuloni, ng’ Uhoraho arakakugira nka Zedekiya na Ahabu, abo umwami w’i Babuloni yataze ku muriro babona;

²³kuko bākoze ivy’ ubupfu mu Bgisirayeli, bagasambana n’abagore ba bagenzi babo, bakavuga amagambo y’ibinyoma mw izina ryanje, ayo ntābageze; jewe ubganje ndabizi, kandi nd’icabona, ni jewe Uhoraho mbivuze.

²⁴Kandi ku vya Shemaya w’i Nehelamu uvuge,

²⁵ut’ Uku ni k’Uhoraho Nyen’ ingabo agize, ni we Mana y’Abisirayeli, ati Ko warungitse ivyete mw izina ryawe, ukabirungikira ababa i Yerusalemu bose, na Zefaniya mwene Mayaseya umuherezi, n’abaherezi bose,

²⁶ukavuga, ut’ Uhoraho ko yaguhinduye umuherezi mu gishingo c’umuherezi Yehoyada, namwe kugira ngo mube ababgiriza mu ngoro y’Uhoraho, ngo mubuze umuntu wese w’ umusazi yīgira ūvugishwa n’Imana, ngo mumushire mu mpatane z’ibiti no mu minyororo;

²⁷none rero n’iki cakubujije guhana Yeremiya w’i Anatoti, yīgira ūvugishwa n’Imana ngo yabatumweko?

²⁸Kw adutumakw amajambo i Babuloni, avuga, ngo Turacasigaje igihe kirekire tur’ inyagano: ngo Ni twiyubakire amazu, tuyabemwo; ngo Ni twirimire amatongo turye ibiyezemwo.

²⁹Maze Zefaniya umuherezi asoma ico cete ūvugishwa n’ Imana Yeremiya yumva.

³⁰Nukw ijambo ry’Uhoraho riza kuri Yeremiya,

³¹riti Tuma ku bājanywe kw inyagano bose, ubabgire, ut’ Uku ni k’Uhoraho agize ku vya Shemaya w’i Nehelamu, ati Kw ababariye amagambo, nanje ntāmutumye, akabizigiza ibinyoma,

³²nuko rero, uku ni ko mvuze, jewe Uhoraho, nti Rāba, nzohana Shemaya w’i Nehelamu n’ uruvyaro rwiwe; ntazosigarana n’ umwe mu biwe azoba mur’ ubu bgoko, na we ntazoruha abona ivyiza nzogirira abantu banje, ni jewe Uhoraho mbivuze: kuko yavuze ivy’ ukungarariza jewe Uhoraho.