Read Bibliya Yera 1951 Yeremiya 31 Bible Online

Yeremiya 31 - Bibliya Yera 1951 bible

Yeremiya 31

¹Ico gihe, ni k’Uhoraho agize, nzoba Imana y’imiryango yose y’Abisirayeli, na bo bazoba abantu banje.

²Uku ni k’Uhoraho agize, at’ Abantu bāsigajwe n’inkota ni bo bāgiriwe ubuntu mu bugaragwa, ni bo Bisirayeli, abo nagiye mpa kuruhuka.

³Uhoraho yanyiyeretse kera, ati N’ukuri naragukunze urukundo rudashira; ni co gituma nkwiyegerezanya imbabazi.

⁴Nzosubira kukwubaka, nawe uzoba wubakitse, ewe nkumi, ni yo Bgisirayeli: uzosubira gushazisha udushako twawe tw’ingoma, usohoke uvyinane n’abanezerewe.

⁵Uzosubira gutera inzabibu ku misozi y’i Samariya: abarimyi bazozitera, bazīyereze.

⁶Kuko hazoza umusi abama bagavye ku misozi ya Efurayimu bazosemerera, bati Ni muve hasi tudūge i Siyoni, dushengerere Uhoraho Imana yacu.

⁷Kuk’ ukw ari k’ Uhoraho agize, ati Muririmbane umunezero kubga Yakobo, musemerere kubg’ umukuru w’amahanga: mwamamaze mushima, mut’ Uhoraho, kiza abantu bawe, ni bo masigarira y’Abisirayeli.

⁸Ehe nzobazana mbakūye mu gihugu c’i burārūko, mbakoranirize hamwe mbakūye ku mpera z’ isi; kandi bazozanana n’impumyi n’ūcumbagira, n’umugore akuriwe hamwe n’ūramutswe: bazogaruka ino ar’ ishengero rinini.

⁹Bazoza barira, kandi nzobarōngōra banyinginga, nzobacisha i ruhande y’inzūzi zuzuye, mu nzira igororotse aho batazotsitara; kuko Isirayeli namubereye se, Efurayimu n’imfura yanje.

¹⁰Ni mwumve ijambo ry’Uhoraho, mwa mahanga, muvyamamaze mu bizinga vya kure mu kiyaga: muvuge, mut’ Uwashwiragije Abisirayeli ni we azobatororokanya, abazigame, nk’uk’ umwungere agirira umukuku wiwe.

¹¹Kuk’ Uhoraho yagobotoye aba Yakobo, yabacunguye abakūra mu kuboko kw’uwabarusha inkomezi.

¹²Bazoza baririmbire ku mpinga y’i Siyoni, bazohondogana bose hamwe, baja ku vyiza vy’Uhoraho, ni vyo ngano na vino n’amavuta n’imyagazi y’imikuku n’inyana z’amasho. Imitima yabo izomera nk’indimiro ikwegewemw’ umwuzi; nta ho bazogira umubabaro ukundi.

¹³Ni ho inkumi izonezerezwa n’ imvyino, n’abasore n’abatāma bose hamwe: kukw ikigandaro cabo nzogihindura umunezero, nzobīrūra, mbanezereze mbakūye mu mubabaro wabo.

¹⁴Imitima y’ abaherezi nzoyihāza ibinure, kand’ abantu banje bazohāzwa n’ ivyiza vyanje, ni jewe Uhoraho mbivuze.

¹⁵Uku ni k’Uhoraho agize, at’ Induru yumvikana i Rama, amaborogo n’amarira menshi: Rakeli aririra abana biwe, yanka kwīrūrwa umubabaro w’abana, kuko batakiriho.

¹⁶Uku ni k’Uhoraho agize, ati Buza ijwi ryawe ryoye kurira, n’amaso yawe yoye gukorora amosozi, kukw ibikorwa vyawe bizokwishurwa, ni k’Uhoraho agize; kandi bazosubira kugaruka bavuye mu gihugu c’abansi.

¹⁷Kandi hazoba ivyizigiro vyo mw iherezo ryawe, ni k’Uhoraho agize; abana bawe bazosubira kugaruka mu gihugu cabo bgite.

¹⁸N’ukuri numvise Efurayimu yiganyira, ati Warankubise, ndakubitika, mmera nk’inyana itamenyereye ingōgo: mpindukiza mbone guhindukira, kuko wewe ur’ Uhoraho Imana yanje.

¹⁹N’ ukuri mmaze guhindukizwa narihannye; bimaze kunyigisha narishishitiye: nagize isoni, mbere ndatētērwa, kukw ibiteye isoni vyo mu buto bganje vyansubiyeko.

²⁰Mbega Efurayimu n’umwana wanje nkunda koko? N’umwana ateye igomwe? Kuk’ uko ndamukankamiye nama ndamwibukana igishika; ni co gituma ndamuhagarikira umutima: sinzobura kumugirira ikigongwe, ni jewe Uhoraho mbivuze.

²¹Wishingire ibimenyetso bikurangira inzira, wironkere ibiti vy’ivyapa: shira umutima ku nzira y’iroro, imwe wajana ukijayo: hindukira, ewe nkumi, ruvyaro rwa Isirayeli, hindukira ugaruke mur’ ibi bisagara vyawe.

²²Uzogeza ryari kwāngāra irya n’ino, ewe mukobga wasubiye inyuma? Kuk’ Uhoraho yaremye ikintu gisha mw isi, k’umugore azozigama umugabo.

²³Uku ni k’Uhoraho Nyen’ ingabo agize, ni we Mana y’Abisirayeli, ati Bazosubira ukundi gusha kuvugira aya majambo mu gihugu c’i Buyuda no mu bisagara vyaho, ni nasubira kubagarukana mbakūye mu kinyago, bat’ Uhoraho n’aguhezagire, wewe i wabo w’ubugororotsi, wewe musozi wera.

²⁴Maz’ ab’ i Buyuda n’ibisagara vyaho vyose bazohasāsagara; bo n’abarimyi n’abaragiye imikuku.

²⁵Kuko nashubije intege mu mutima urushe, n’umutima udendebukiwe nkawuhēmbūra.

²⁶Bishitse aho ndikangura, nsanga itiro ryari rindyoheye.

²⁷Eh’ imisi izoza, ni jewe Uhoraho mbivuze, nzobiba imbibe, ni yo nzu ya Isirayeli n’inzu ya Yuda, ndayibibemw’ imbuto, ari zo bantu n’ibitungwa.

²⁸Maz’ ico gihe, nk’uko nabahozakw igitsure ngo mbarandure, mbahomvore, mbasangangure, mbahonnye, mbababaze, ni ko nzobahozakw ijisho ngo mbubake mbatēragire, ni jewe Uhoraho mbivuze.

²⁹Mur’ iyo misi ntibazoba bakivuga, ngo Ba se barya inzabibu z’ibitumbge, amenyo y’abana akajiginyurwa.

³⁰Arik’ umuntu wese azopfa azize ivyiwe bigabitanyo nyene: ūriye inzabibu z’ibitumbge, ayiwe menyo nyene ni yo azojiginyurwa.

³¹ Eh’ imisi igira ize, ni jewe Uhoraho mbivuze, aho nzosezerana isezerano risha n’umuryango wa Isirayeli n’umuryango wa Yuda:

³²ridahwanye n’isezerano nasezeranye na ba sekuruza, ku musi nabafata ukuboko nkabakūra mu gihugu ca Egiputa; kand’ iryo sezerano nyene bāraryishe, naho nari shebuja, ni jewe Uhoraho mbivuze.

³³Arikw iri ni ryo sezerano nzosezerana n’umuryango w’Abisirayeli hanyuma y’ iyo misi, ni jewe Uhoraho mbivuze; nzoshira ivyagezwe vyanje imbere muri bo, no mu mitima yabo ni ho nzovyandika; nanje nzobabera Imana, na bo bazoba abantu banje.

³⁴Kandi ntibazoba bacigishanya, ng’ umuntu wese yigishe mugenzi we, canke ngo yigishe uwo bavukana, ati Menya Uhoraho; kuko bose bazonyimenyera, uhereye kuri nyarucari ugashitsa k’ūhambaye, ni jewe Uhoraho mbivuze; kuko nzoharira ukugabitanya kwabo, kand’ icaha cabo sinzocibuka ukundi.

³⁵Uku ni k’Uhoraho agize, uwatanze izuba ngo ribe umuco w’ umurango, akagera ukwezi n’ inyenyeri ngo vyake mw ijoro, ni we azīkurura ikiyaga ngw imipfunda yaco ibomborane: Uhoraho Nyen’ ingabo ni ryo zina ryiwe:

³⁶at’ Ivyo nageze ivyo ni vyava mu nyonga zanje, ni jewe Uhoraho mbivuze, ni ho uruvyaro rwa Isirayeli na rwo ruzoreka kuba ihanga mu nyonga zanje ibihe bidashira.

³⁷Uku ni k’ Uhoraho agize, at’ Ijuru ryogerwa, amatanguriro y’isi agaserangurwa, ni ho nanje noca uruvyaro rwose rwa Isirayeli, mbahōye ivyo bakoze vyose, ni jewe Uhoraho mbivuze.

³⁸Eh’ imisi izoza, ni k’Uhoraho agize, ca gisagara kizokwubakirwa Uhoraho, uhereye ku munara wa Hananeli, ugashitsa no kw irembo ryo ku mfuruka y’uruzitiro.

³⁹Kand’ umugozi bazogeresha uzovuduka aho hantu ugororwe ushike ku gatumba k’i Garebu, maz’ uzozenguka ushike i Gowa.

⁴⁰Kand’ umwonga wose uhambgamw’ imivyimba ugatābgamwo n’umunyota, n’indimiro zose ukarinda ushitsa ku mugezi Kidironi, ugashitsa no ku mfuruka y’irembo ry’amafarasi aherekeye i burasirazuba, hose hazoba ahēra h’ Uhoraho; ntihazokwongera guhomvorwa ngo hasangangurwe gushitsa ibihe bidashira.