Read Bibliya Yera 1951 Yeremiya 32 Bible Online

Yeremiya 32 - Bibliya Yera 1951 bible

Yeremiya 32

¹Ijambo ryaje kuri Yeremiya rivuye k’Uhoraho mu mwaka ugira icumi Zedekiya umwami w’i Buyuda ari ku ngoma, ni wo wagira icumi n’umunani Nebukadineza ari ku ngoma.

²Maz’ ico gihe ingabo z’uwo mwami w’i Babuloni zari zugarije i Yerusalemu: kand’ uwavugishwa n’ Imana Yeremiya yari yabohewe mu rugo rw’ibohero rwari rubangikanye n’ingoro y’umwami w’i Buyuda.

³Kuko Zedekiya umwami w’i Buyuda yari yamuboshe, ati N’iki gituma uvuga ng’ Uku ni k’Uhoraho agize, ati Rāba nzotanga iki gisagara mu kuboko kw’umwami w’i Babuloni, kand’ azohatsinda?

⁴Uti Na Zedekiya umwami w’i Buyuda ntazokira amaboko y’Abakaludaya, arik’ uti Ntazobura gutangwa mu kuboko kw’umwami w’i Babuloni, uti Bazokwivuganira barābana imbonankubone;

⁵uti Kand’ azoshumika Zedekiya amujane i Babuloni, ngw Azobayo gushitsa aho nzomugendera, ngo Ni k’Uhoraho agize; ngo Naho mworwanya Abakaludaya ntimuzotsinda?

⁶Yeremiya aravuga, at’ Ijambo ry’Uhoraho ryanjeko,

⁷riti Hanameli mwene so wanyu Shalumu, agira aze kuri wewe, akubgire, ati Ni wigurire ishamvu yanje iri Anatoti: kukw ari wewe wo kuyicungura.

⁸Nuko Hanameli mwene wacu aza kuri jewe aho ndi mu rugo rw’ibohero, nk’ukw ijambo ry’Uhoraho ryavuze, arambarira, ati Ndakwinginze, gura ishamvu yanje iri Anatoti, ho mu ntāra ya Benyamini: kuko na kare yar’ iyawe, kandi ni wewe wo kuyicungura: non’ uyigurire. Ni ho naciye mmenya yukw iryo jambo ar’ iry’ Uhoraho.

⁹Nuko ngura na Hanameli mwene wacu iyo shamvu iri Anatoti, ndamugerera ifeza ku munzane, ziba shekeli cumi n’indwi.

¹⁰Nandika icete c’uko tuguze, nkiyagirizakw ishashara ndomamw’ ikimenyetso, mpamagara ivyabona, ndamugerera za feza ku munzane.

¹¹Nuko nābīra ico cete c’uko tuguze, ikidomwekw ikimenyetso nk’ukw ivyagezwe n’imigenzo biri, bo n’ikindi kitamatanijwe,

¹²maz’ ico cete c’uko tuguze ngihēra Baruki mwene Neriya wa Mahaseya imbere ya Hanameli mwene wacu, n’imbere y’ivyabona vyari vyanditse amazina yabo kur’ ico cete c’uko tuguze, n’imbere y’Abayuda bose bari bicaye mu rugo rw’ibohero.

¹³Nihanikiririza Baruki imbere yabo,

¹⁴nt’ Uku ni k’ Uhoraho Nyen’ ingabo agize, ni we Mana y’Abisirayeli, ati Jana ibi vyete, iki cete c’uko tuguze kimatanishijwe ishashara, bo n’iki kitamatanijwe, ubibīke mw ikarabo, kugira ngo bize bimare igihe kinini.

¹⁵Kuk’ ukw ari k’ Uhoraho Nyen’ ingabo agize, ni we Mana y’Abisirayeli, at’ Amazu n’amatongo n’imirima y’imizabibu bizokwongera kugurwa mur’ iki gihugu.

¹⁶Nuko mpejeje gushīra Baruki mwene Neriya ico cete c’uko naguze, nca nsenga Uhoraho,

¹⁷nt’ Ewe Mwami Uhoraho! Erega ni wewe waremye ijuru n’isi, ubiremesha ubushobozi bgawe buhambaye, n’ukuboko kwawe kurāmvuye: nta kintu na kimwe kikunanira.

¹⁸Ni wewe ugirira imbabazi ibihumbi n’ibihumbi, ibigabitanyo vya ba se ubihōra n’abana babo babasubiriye mu gishingo: ni wewe ūhambaye, Imana y’ubushobozi, y’izina ryitwa Uhoraho Nyen’ ingabo:

¹⁹ur’ umujanama ahambaye, ur’ umunyenkomezi mu bikorwa; inyonga zawe zītegereza ingeso zose z’abana b’abantu, kugira ng’ ugerere umuntu wese ibikwiranye n’ ingeso ziwe, n’ibikwiranye n’ivy’ ibikorwa vyiwe vyamuje.

²⁰Ni wewe washizeh’ ibimenyetso n’ ibitangaza mu gihugu ca Egiputa, gushitsa no kur’ uyu musi, mu Bisirayeli no mu bandi bantu, ukīronkera izina rya rurangiranwa, nk’uko rimeze n’uyu musi;

²¹ugakūza abantu bawe b’Abisirayeli mu gihugu ca Egiputa ibimenyetso n’ibitangaza, n’ukuboko gukomeye kandi kurāmvuye, n’ibiteye ubgoba bginshi;

²²ukabaha iki gihugu, ico warahiye ba sekuruza babo kuzobaha, ar’ igihugu gitemba amata n’ubūki;

²³baracinjira barakiganza; yamara banka kukwumvira, no kugendera mu vyagezwe vyawe; ntibakora na kimwe mu vyo wabageze vyose gukora: ico ni co catumye ubatēza ivyo vyago vyose.

²⁴Eh’ ibirundo barundiye kwūririrako ngo baneshe igisagara birashitse: igisagara gitanzwe mu maboko y’Abakaludaya bagiteye, kubg’ inkota n’inzara n’ikīza. Ivyo wavuze birashitse, nawe urik’ uravyibonera.

²⁵Yamara Mwami Uhoraho, wambariye ngo nigurire itongo amahera, ngo ni mpamagare ivyabona, kand’ iki gisagara gitanzwe mu maboko y’ Abakaludaya!

²⁶Maz’ ijambo ry’Uhoraho riza kuri Yeremiya,

²⁷rit’ Ehe nd’ Uhoraho, Imana y’abariho bose: mbega har’ ikintu na kimwe kinnanira?

²⁸Nuko rero, uku ni k’Uhoraho agize, at’ Ehe nzotanga iki gisagara mu maboko y’Abakaludaya, no mu kuboko kwa Nebukadineza, umwami w’i Babuloni, kand’ azogitsinda;

²⁹n’Abakaludaya bateye iki gisagara, bazogishikamwo bagiturire bagitongore, bo n’amazu būriyeko hejuru ngo bosereze imibavu Bayali, bagasukira ibiturire izindi mana, kugira ngo bantere ishavu.

³⁰Kukw Abisirayeli n’Abayuda bākoze ibibi gusa mu nyonga zanje uhereye mu buto bgabo, kuko ku Bisirayeli ata kindi atar’ ukuntera ishavu, barinteresha ibikorwa vy’amaboko yabo, ni jewe Uhoraho mbivuze.

³¹Kukw iki gisagara, guhēra ku musi bācubakiye gushitsa no kur’ uyu musi, cabaye ico kuntera ishavu n’ubushangashirwe, bituma ngira ngikūre mu nyonga zanje;

³²kubg’ ibibi vyose Abisirayeli n’Abayuda bakoze kugira ngo bantere ishavu, bo n’abami babo n’abaganwa babo n’abaherezi babo, na ba kamenyi babo n’abagabo b’i Buyuda n’ababa i Yerusalemu.

³³Banteye ibitugu mu gishingo co kuntumbera, naho nabahanūra nkāma nzindurwa no kubahanūra, yamara ntibanyumviye ngo babishire ku mutima.

³⁴Ariko bāshize ibizira vyabo vy’ ubuyobe mu ngoro yanje yitirirwa izina ryanje ngo bayihumanye.

³⁵Kandi bātabiye ibitabo Bayali, ni vyo biri mu mwonga wa mwene Hinomu, bagatanga abana babo b’abahungu n’abakobga kw ibimazi ngo boserezwe Moleki; ar’ ikintu ntābageze, kitigeze no kuza mu mutima wanje, ko bokora ivyo bizira, bagacumuza Abayuda.

³⁶None rero, uku ni ko mvuze, jewe Uhoraho, Imana y’Abisirayeli, ku vy’iki gisagara, ico muvuga ngo Gitanzwe mu kuboko kw’ umwami w’i Babuloni kubg’ inkota n’inzara n’ikīza:

³⁷nti Rāba nzobakoranya, mbakūre mu bihugu vyose aho nzoba narabirukaniye mfise ishavu n’ubushangashirwe n’ uburake bg’inkazi; kandi nzokwongera kubagarukana aha hantu, ndababesheh’ amahoro:

³⁸kandi bazoba abantu banje, nanje nzoba Imana yabo.

³⁹Nzobaha umutima umwe no kujana inzira imwe, kugira ngo bahore banyubaha gushitsa ibihe vyose; ngo bahave baroranirwe, bo n’ abana babo bazoba babasubiriye mu gishingo.

⁴⁰Kandi nzosezerana na bo isezerano ritazoshira, yuko ntazorora irya ngo mbahebe, ndeke kubagirira neza; kandi mu mitima yabo nzohashira kunyubaha, na bo boye kumvako.

⁴¹Mbere nzobanezererwa mbagirire neza, kandi nzobatēragira mur’ iki gihugu vy’ukuri, bivuye mu mutima wanje wose no mu mushaha wanje wose.

⁴²Kuk’ ukw ari ko mvuze, jewe Uhoraho, nti Nk’uko nazaniye ubu bgoko ibi vyago vyose bikomeye, uko ni ko nzobazanakw ivyiza vyose nabasezeraniye.

⁴³Kand’ amatongo azogurwa mur’ iki gihugu, ico muririra, ngo Kirakomvomvowe, ata muntu agisigayemwo cank’ igitungwa; ngo Gitanzwe mu maboko y’Abakaludaya.

⁴⁴Abantu bazokwigurira amatongo amahera, bandike ivyete vy’uko baguze, babimatanishe ishashara bayidomemw’ ikimenyetso, bahamagare ivyabona; bizoba birtyo mu gihugu ca Benyamini, n’ahantu hahereranye n’i Yerusalemu, no mu bisagara vy’i Buyuda, no mu bisagara vyo mu mugamba waho, no mu bisagara vyo mu gihugu giciye bugufi, no mu bisagara vy’i bumanuko: kuko nzotuma bahindukira bave mu kinyago, ni jewe Uhoraho mbivuze.