Read Bibliya Yera 1951 Yeremiya 34 Bible Online

Yeremiya 34 - Bibliya Yera 1951 bible

Yeremiya 34

¹Ijambo ryaje kuri Yeremiya rivuye k’Uhoraho, igihe Nebukadineza umwami w’i Babuloni n’ingabo ziwe zose n’abami bo mw isi yose yaganzwa na we, n’ amahanga yose, bāriko bararwana n’i Yerusalemu n’ibisagara vyaho vyose,

²rit’ Uku ni k’Uhoraho agize, ni we Mana y’Abisirayeli, ati Genda ubarire Zedekiya umwami w’i Buyuda, umubgire, ut’ Uku ni k’Uhoraho agize, ngw Eh’ azotanga iki gisagara mu kuboko kw’ umwami w’i Babuloni, na we azogitongoza umuriro:

³nawe ubgawe ntuzomukira, ntuzobura gufatwa ng’ utangwe mu kuboko kwiwe; uzomwibonera imbonankubone, na we muzokwivuganira; kand’ uzoja i Babuloni.

⁴Uti Yamara ni wumve ijambo ryiwe Uhoraho, ewe Zedekiya mwami w’i Buyuda: ut’ Uku ni kw avuze ku vyawe, ati Ntuzokwicwa n’inkota,

⁵arik’ uzokwipfira bupfe; nk’ uko boshereje imibavu ba sogokuruza, abami bākwitangiye imbere, ni ko bazoyikwosereza nawe; bazokuborogera, bati Yewe mwami wacu! uti Kukw ari we avuze iryo jambo, uti Ni kw agize.

⁶Nuk’ ūvugishwa n’Imana Yeremiya abarira Zedekiya umwami w’i Buyuda ayo majambo yose ar’ i Yerusalemu,

⁷igihe ingabo z’umwami w’i Babuloni zāriko zirarwana n’i Yerusalemu n’ibisagara vyose vy’i Buyuda vyari bigisigaye, n’i Lakishi n’i Azeka; kukw ivyo ari vyo vyari bigisigaye mu bisagara vy’i Buyuda bikizitiriwe inzitiro.

⁸Ijambo ryaje kuri Yeremiya rivuye k’Uhoraho, igihe umwami Zedekiya yar’ amaze gusezerana isezerano n’abantu bose b’i Yerusalemu, ryo gutanga umwidegemvyo;

⁹kugira ng’ umuntu wese arekure umuja wiwe, ar’ uwitwa umuhungu, cank’ umukobga, ar’ Umuheburayo cank’ Umuheburayokazi abe uwidegemvya; kugira ngo hoye kuba ūbagaba, ar’ Umuyuda ngw agabe mugenzi we.

¹⁰Nukw abaganwa bose n’ abantu bose baramwumvira, abāri basezeranye iryo sezerano ry’uk’ umuntu wese akwiye kurekura umuja wiwe, ar’ uwitwa umuhungu cank’ umukobga, abe uwidegemvya, ngo hoye kuba ūkibagaba; baramwumvira, barabarekura;

¹¹ariko hanyuma barihindukiza, bagarukana abo baja b’abahungu n’abakobga, abo bāri barekuye ngo babe abidegemvya, babasubiza mu buja ukw ar’ abahungu n’abakobga.

¹²Ico ni co catumye ijambo ry’Uhoraho riza kuri Yeremiya,

¹³rit’ Uku ni k’ Uhoraho agize, ni we Mana y’ Abisirayeli, ati Nasezeranye isezerano na ba sogokuruza, umusi nabakūra mu gihugu ca Egiputa, no mu nzu y’ubuja,

¹⁴nt’ Ukw imyaka ndwi igiye gushira, umuntu wese az’ arekure mugenzi we w’Umuheburayo, uwo yaguze akamukorera imyaka ndwi, amurekure amuveko, abe uwidegemvya: yamara ba sogokuruza ntibānyumvira, canke ngo bantege ugutwi.

¹⁵Ariko mweho mwari mwigaruye, mukora igitunganye mu nyonga zanje, mutanga umwidegemvyo, umuntu wese arekura mugenzi we; kandi mwari musezeraniye isezerano imbere yanje mu ngoro yitirirwa izina ryanje;

¹⁶maze murihindukiza, mutukisha izina ryanje, umuntu wese agarukana umuja wiwe ar’ umuhungu cank’ umukobga, abo mwari mwarekuye ngo babe abidegemvya uko bagomba; mubasubiza mu buja ukw ar’ abahungu n’abakobga.

¹⁷Nuko rero, uku ni ko mvuze, jewe Uhoraho, nti Ntimwanyumviye, ngo mutange umwidegemvyo, ng’ umuntu wese arekure mwene wabo, umuntu wese arekure mugenzi we: nuko rero nanje ntanze umwidegemvyo kuri mwebge, ni jewe Uhoraho mbivuze, w’inkota n’ikīza n’inzara; kandi nzotuma mutererekanywa irya n’ino mu bihugu vy’ abami bose bo mw isi.

¹⁸Kandi nzotanga abantu bāciye mw isezerano ryanje, ntibashitse amajambo y’isezerano bāsezeraniye imbere yanje, hamwe bāhimburamwo kubiri imasa, bagaca hagati y’ibihimba vyayo;

¹⁹ni bo baganwa b’i Buyuda n’abaganwa b’i Yerusalemu n’inkone n’abaherezi n’abantu bose bo mu gihugu, abāciye hagati ya vya bihimba vy’iyo masa:

²⁰nzobatanga mu maboko y’abansi babo, no mu maboko y’ababahiga ngo babice, kand’ imivyimba yabo izoba inyama z’ibisīga vyo mu kirēre n’iz’ ibikōko vyo kw isi.

²¹Kandi Zedekiya umwami w’i Buyuda n’abaganwa biwe nzobatanga mu maboko y’abansi babo, no mu maboko y’ababahīga ngo babice, no mu maboko y’ingabo z’umwami w’i Babuloni zari zabaretse zikabavako.

²²Rāba nzobigera, ni jewe Uhoraho mbivuze, mbagarukane kur’ iki gisagara; kandi bazokirwanya bagitsinde, bagitongoze umuriro: kand’ ibisagara vy’i Buyuda nzobigira imisaka, ata wukihaba.