Read Bibliya Yera 1951 Yeremiya 37 Bible Online

Yeremiya 37 - Bibliya Yera 1951 bible

Yeremiya 37

¹Zedekiya mwene Yosiya aja ku ngoma mu gishingo ca Koniya mwene Yehoyakimu, Nebukadineza umwami w’i Babuloni ari we amwimitse mu gihugu c’i Buyuda.

²Ariko ntiyumvira amajambo y’Uhoraho ayo yavugisha Yeremiya, ubgiwe cank’ abasavyi biwe cank’ abantu bo mu gihugu.

³Maz’ umwami Zedekiya atuma Yehukali mwene Shelemiya na Zefaniya mwene Mayaseya umuherezi kuri Yeremiya uwavugishwa n’Imana, ati N’udusengere k’Uhoraho Imana yacu.

⁴Kandi Yeremiya yar’ acigendagendera mu bandi bantu, kuko bataribgamushire mw ibohero.

⁵Kand’ ingabo za Farawo zari zije zivuye muri Egiputa: maz’ Abakaludaya bari bugarije i Yerusalemu bumvise inkuru zavyo, bata i Yerusalemu barakimirana.

⁶Maz’ ijambo ry’Uhoraho riza kur’ uwo yavugisha Yeremiya,

⁷rit’ Uku ni k’ Uhoraho agize, ni we Mana y’ Abisirayeli, at’ Uku abe ari ko mubarira umwami w’i Buyuda yabantumyeko kunsiguza, muti Rāba ingabo za Farawo zije kubatabara zizosubira muri Egiputa mu gihugu cabo.

⁸Kand’ Abakaludaya bazogaruka, batere iki gisagara; bazogitsinda bagitongoze umuriro.

⁹Uku ni k’Uhoraho agize, ati Ntimwihende, mut’ Abakaludaya bazotuvako nta kabuza: kuko batazobavako.

¹⁰Kuko naho mwotikiza ingabo zose z’Abakaludaya babarwanya, hagasigaramw’ abakomeretse basa, na ho nyene bova hasi, umuntu wese aho yar’ ari mw ihema ryiwe, bagatongoza iki gisagara umuriro.

¹¹Nukw ingabo z’Abakaludaya zimaze gukimirana zitaye i Yerusalemu kubgo kugirira ubgoba ingabo za Farawo,

¹²Yeremiya asokoroka i Yerusalemu ngw aje mu ntāra ya Benyamini, gushikiririzway’ umugabane wiwe hagati mu bantu.

¹³Agishika mw irembo ryitwa irya Benyamini, umukuru w’ abashibamyi yitwa Iriya mwene Shelemiya, Shelemiya wa Hananiya, ni ho yar’ ahagaze: afata uwo muvugishwa Yeremiya, at’ Uroye kwisaba Abakaludaya.

¹⁴Yeremiya ati S’ivy’ ukuri; singiye kwisaba Abakaludaya. Ariko yanka kuvyumva: nuko Iriya afata Yeremiya, amushīra abaganwa.

¹⁵Abaganwa bashavurira Yeremiya, baramukubita, bamushira mw ibohero mu nzu ya Yonatani umukarani, kuko bāri bayigize ibohero.

¹⁶Nuko Yeremiya amaze gushika mw ibohero, mu kazu ko mu kuzimu, ahamaze imisi myinshi,

¹⁷umwami Zedekiya atuma kumuzana; nuk’ umwami amubariza mu mpisho mu ngoro yiwe, ati Mbega nta jambo ryoba rivuye k’Uhoraho? Yeremiya ati Ririho; at’ Uzotangwa mu kuboko kw’umwami w’i Babuloni.

¹⁸Ikindi, Yeremiya abaza umwami Zedekiya, ati Mbega nagucumuyekw iki, cank’ abantu bawe, cank’ ubu bgoko, ko mwanshize mw ibohero?

¹⁹Ba kamenyi banyu bābabarira, ng’ Umwami w’i Babuloni ntazobatera canke ngw atere iki gihugu, bari hehe?

²⁰Non’ urazirikanye, mwami wanje nyen’ ingoma, tegēra ivyo ngusavye ndakwinginze; ntunsubize mu nzu ya Yonatani umukarani, simpfireyo.

²¹Nuk’ umwami Zedekiya aravuga, bashira Yeremiya mu rugo rw’ibohero, bamugaburira umutsima uko bukeye, bawuguriye ku nzira y’abacumvyi, gushitsa ah’ imitsima yose yahebūriwe mu gisagara. Nuko Yeremiya aguma ngaho mu rugo rw’ibohero.