Read Bibliya Yera 1951 Yeremiya 39 Bible Online

Yeremiya 39 - Bibliya Yera 1951 bible

Yeremiya 39

¹Nuko Yerusalemu haratsindwa. Nebukadineza umwami w’i Babuloni, n’ingabo ziwe zose, yaje gutera Yerusalemu arahugariza, mu mwaka ugira icenda Zedekiya umwami w’i Buyuda ari ku ngoma, mu kwezi kw’icumi;

²maze mu mwaka ugira icumi na rimwe Zedekiya ari ku ngoma, mu kwezi kwa kane, ku musi wakwo w’icenda, basatura uruzitiro rw’ico gisagara.

³Hatsinzwe, abaganwa bose b’umwami w’i Babuloni baraza basagaza mu kirimba co hagati, ni bo aba: Nerugali‐sharezeri, na Samugari‐nebo, na Sarusekimu, na Rabu‐sarisi, na Nerugali‐sharezeri, na Rabu‐magu, bo n’abandi baganwa bose b’umwami w’i Babuloni.

⁴Maze Zedekiya umwami w’i Buyuda n’ingabo zose bababonye, barahunga, bahenga mw ijoro bava mu gisagara, baciye mu ndimiro y’umwami no mu kirimba kiri hagati y’inzitiro zibiri: umwami ajana inzira ica mu kiyaya Araba.

⁵Maz’ ingabo z’Abakaludaya zibōma inyuma, zihambiriza Zedekiya mu kiyaya c’i Yeriko: bamaze kumufata, baramudūgana, bamuzanira Nebukadineza umwami w’i Babuloni bamumusanza i Ribula mu ntāra y’i Hamati: amucirakw iteka.

⁶Nuk’ uwo mwami w’i Babuloni yicira abahungu ba Zedekiya imbere y’amaso yiwe nyene i Ribula; kand’ uwo mwami w’i Babuloni yica n’abaganwa bose b’i Buyuda.

⁷Ikigeretseko anogora amaso Zedekiya, amwambika umunyororo kugira ngo bamujane i Babuloni.

⁸Abakaludaya banda umuriro ingoro y’umwami n’ amazu y’abantu, basangangura n’ inzitiro zikikije i Yerusalemu.

⁹Maze Nebuzaradani, umukuru w’abashibamyi, ajana i Babuloni amasigarira y’abantu bāri bagisigaye mu gisagara, n’abāri bāragiye kumwisaba, n’amasigarira y’abantu bāri bagisigaye, abajana ar’ inyagano.

¹⁰Ariko Nebuzaradani uwo mukuru w’abashibamyi, asiga mu gihugu c’i Buyuda abantu ba nyarucari batagira ico batunze, abaha imirima y’inzabibu n’amatongo ico gihe.

¹¹Maze Nebukadineza umwami w’i Babuloni agera Nebuzaradani uwo mukuru w’abashibamyi ku vya Yeremiya,

¹²ati Mujane, umuzigame neza, ntugire ico umugira; kand’ ukw azogomba abe ari k’uzomugirira.

¹³Nuko Nebuzaradani uwo mukuru w’abashibamyi aratuma, bo na Nebushazabani na Rabu‐sarisi na Nerugali‐sharezeri na Rabu‐magu, n’abakuru bose b’umwami w’i Babuloni,

¹⁴baratuma, bakūra Yeremiya mu rugo rw’ibohero, bamuha Gedaliya mwene Ahikamu, Ahikamu wa Shafani, ngw amujane i we: nuko yibera ngaho mu bandi bantu.

¹⁵Kand’ ijambo ry’Uhoraho ryari ryaje kuri Yeremiya, igihe yar’ acugaraniwe mu rugo rw’ ibohero,

¹⁶riti Genda ubarire Ebedumeleki Umunyetiyopiya, ut’ Uku ni k’Uhoraho Nyen’ ingabo agize, ni we Mana y’Abisirayeli, ati Rāba ngira nshitse kur’ iki gisagara ayo nakivuzeko y’ivyago, atar’ ay’ ivyiza; kandi bizoshika uvyibonera kuri nya musi.

¹⁷Ariko weho nzokurokora kur’ uwo musi, ni jewe Uhoraho mbivuze: kandi ntuzotangwa mu maboko y’abo utinya.

¹⁸Kuko ntazobura kugukiza; ntuzokwicwa n’inkota, arikw amagara yawe uzoba uyakijije, kuko wanyizigiye, ni jewe Uhoraho mbivuze.