Read Bibliya Yera 1951 Yeremiya 46 Bible Online

Yeremiya 46 - Bibliya Yera 1951 bible

Yeremiya 46

¹Ijambo ry’Uhoraho ryaje kuri Yeremiya uwavugishwa na we ku vy’amahanga.

²Ku vya Egiputa: amajambo yo ku vy’ingabo za Farawo‐Neko umwami wa Egiputa, zari ku nkengera y’uruzi Efurate i Karukemeshi, izo Nebukadineza umwami w’i Babuloni yanesheje mu mwaka ugira kane Yehoyakimu mwene Yosiya umwami w’i Buyuda ari ku ngoma.

³Mutegure inkinzo nto‐nto na nini‐nini, mutonde urugamba murwane.

⁴Mushire amatandiko ku mafarasi, muheze mwūrire, mwebge abayagenderako, mutonde mwambaye inkofero z’ivyuma; murtyorore amacumu, mwambare ivyuma vyo gukīngira imibiri.

⁵N’iki gitumye bacika ivutu bagakimirana? Abahizi babo batsinzwe hasi, barahunga baratemesha, batarinze no gukebuka: haba ibibateye ubgoba irya n’ino, ni k’Uhoraho agize.

⁶Ntihagira impayamaguru icīka, cank’ umuhizi ngo hagire uwikiza; i burārūko ku nkengera y’uruzi Efurate ni ho batsitaye baratemba.

⁷Uyu ni nde asendanisha nka Nili, amazi yiwe agatera imipfunda nk’inzūzi?

⁸Ni Egiputa hasendanisha nka Nili, n’amazi yaho atera imipfunda nk’inzūzi: havuga, hati Hinge nsendanishe, ndenge isi yose; nze ngeseze ibisagara n’ ababibamwo.

⁹Mudūge, mwa mafarasi, mugende akabushungwe, mwa mikogote! Abahizi ni barumikeko, ni bo Banyetiyopiya n’ Abaputi batwara inkinzo, n’Abaludimu batwara imiheto bazi kuyifora.

¹⁰Kuk’ uwo musi ar’ uw’ Umwami, ni we Uhoraho Nyen’ ingabo, ar’ umusi wo kwīhōrako, kugira ngo yīhōre abarwanizi biwe: inkota izorya ihāge, izonywa amaraso yabo ihīmbe: kuk’ Umwami, ari we Uhoraho Nyen’ ingabo, acumitira ibimazi mu gihugu c’i burārūko ku nkengera y’uruzi Efurate.

¹¹Dūga upfe kwizenza i Gileyadi, wābīrey’ umuti, wewe mukobga w’inkumi ari we Egiputa: nta kimazi kunywa imiti myinshi: nta wo kuzogukiza uriho.

¹²Amahanga yumvise ibitētērwa vyawe, isi yuzuye amaborogo yawe: kuk’ umuhizi atsitaye ku wundi, bompi bagatemba hamwe.

¹³Ijambo Uhoraho yabariye Yeremiya ūvugishwa na we, ry’ ingene Nebukadineza umwami w’i Babuloni azoza gutera igihugu ca Egiputa.

¹⁴Muvugire muri Egiputa, muvyamamaze i Migidoli, muvyamamaze n’i Nofu n’i Tahapanesi, muti Mutonde, mwitegure, kukw inkota yariritse impande zose zigukikije.

¹⁵N’iki gituma abahizi bawe bahunga? Ntibāshinze ikirenge, kuk’ Uhoraho yabirukanye.

¹⁶Yatumye benshi batsitara, mbere bātsitaranyeko: bati Ngo tuvyuke twisubirire mu b’i wacu, no mu gihugu twavukiyemwo, duhunge inkota iririka.

¹⁷Aho hantu ni ho basemerereye, bati Farawo umwami wa Egiputa n’ukureremesha akarūru gusa! Yazangazanze mu gihe cashinzwe.

¹⁸Nk’uko ndiho, ni k’Umwami agize, ari we yitwa Uhoraho Nyen’ ingabo, n’ukuri nk’uko Tabora umeze ku yindi misozi, kandi nk’ uko Karumeli umeze ku kiyaga, ni k’ūgiye kuza azoza ameze.

¹⁹Ewe wa mukobga wibereye muri Egiputa, witegure kujanwa kw inyagano; kukw i Nofu hazohinduka amatongo, hazotongorwa, hasigare ata wukihaba.

²⁰Egiputa n’inka y’iriza iteye igomwe rwose; ariko haje ikibugu kivuye i burārūko, kirashitse.

²¹Kand’ ingabo zaho z’abacangero ziri hagati yaho, zimeze nk’inyana zo mu ruhongore: kuko na zo zakimiranye, zahungiye icarimwe, ntizashinga ikirenge: kuk’ umusi w’ ivyago vyabo ubashitseko, ni co gihe co kūzirwa kwabo.

²²Akariri kabo kazokwumvikana nk’ ugukakamba kw’inzoka; kuko bazobāzira bari n’ingabo, babatere bari n’amacabiti, nk’abaje kwicira ibiti.

²³Bazokwicira ikibira caho, ni k’Uhoraho agize, naho kizitanye gite; kuko barusha inzige ubginshi, kandi badaharūrika.

²⁴Umukobga, ni we Egiputa, azokorwa n’isoni; azotangwa mu maboko y’abantu b’i burārūko.

²⁵Uhoraho Nyen’ ingabo, ni we Mana y’Abisirayeli, aravuga, ati Nzohana Amona ikigirwamana c’ ahitwa No, na Farawo na Egiputa n’imana zaho n’abami baho; mbere Farawo nzomuhanana n’abamwizigira.

²⁶Nzobatanga mu maboko y’abashaka kubica, no mu kuboko kwa Nebukadineza umwami w’i Babuloni, no mu maboko y’ abasavyi biwe; ariko hanyuma y’ivyo muri Egiputa hazosubira kubamw’ abantu, nk’uko hamye mu misi ya kera, ni jewe Uhoraho mbivuze.

²⁷Ariko weho ntutinye, ewe Yakobo musavyi wanje, nturanduke umutima, ewe Isirayeli: kuko rāba nzogukiza ngukūre kure, uruvyaro rwawe ndarukūre mu gihugu rwajanywemwo ar’ inyagano; Yakobo azogaruka, kand’ azokwibera amahoro ata nkomanzi, kandi nta wuzomutera ubgoba.

²⁸Ntutinye, ewe Yakobo musavyi wanje, ni jewe Uhoraho mbivuze, kuko ndi kumwe nawe: kuko nzoherengeteza amahanga yose, ayo nagushwiragirijemwo: ariko weho sinzoguherengeteza; mugabo nzoguhana ibigeze, sinzokureka ntaguhannye.