Read Bibliya Yera 1951 Yeremiya 49 Bible Online

Yeremiya 49 - Bibliya Yera 1951 bible

Yeremiya 49

¹Ku vy’Abamoni. Uku ni k’ Uhoraho agize, ati Mbega Isirayeli nta bahungu afise? Nta samuragwa agira? None n’iki gituma ikigirwamana Malukamu ari co cegukiye Gadi, n’abantu baco baba mu bisagara vyaho?

²None rero, ehe rāba imisi igira ize, ni k’Uhoraho agize, nzokwumvikanisha akarūru k’intambara i Raba h’Abamoni; kandi hazohinduka ibirundo vy’amasakamburira, n’ abakobga baho bazoyigizwa n’ umuriro: ni ho Isirayeli azokwiguranura, akegukira abāmwegukiye, ni k’Uhoraho agize.

³Boroga, Heshiboni we, kuko Hayi hanyazwe; murire, mwa bakobga b’i Raba, mukenyere amagunira: mwivugirize amarūru, mwiruke mujarajare hirya no hino mu nzitiro; kuko Malukamu kizojanwa ar’ inyagano, bo n’abaherezi baco n’abaganwa baco.

⁴N’iki gitumye wirata imyonga? Umwonga wawe uratwarwa, ewe mukobga usubiye inyuma, wishimiye ubutunzi bgawe, uti Ni nde azonshikīra?

⁵Ehe nzogushitsakw ibiteye ubgoba, ni k’Umwami agize, ni we Uhoraho Nyen’ ingabo, biturutse mu bagukikije bose; muzokwirukanwa, umuntu wese atūmūke, kandi ntihazoboneka uwo gukoraniriza hamwe abazimiye.

⁶Ariko hanyuma nzotuma Abamoni bahindukira bave mu kinyago, ni k’Uhoraho agize.

⁷Ku vya Edomu. Uku ni k’ Uhoraho Nyen’ ingabo agize, ati Mbeg’ ubgenge nta bukiriho i Temani? Mbeg’ inama yabuze mu bahanga? Mbeg’ ubgenge bgabo bgakamanganye?

⁸Muhunge, musubire inyuma, muje kuba ahigobetse, yemwe ababa i Dedani; kuko nzoshitsa ivyago kuri Esau, mu gihe nzomūzira.

⁹Abamura inzabibu bogushikako, mbega hari n’uduhumbga tw’ inzabibu bogusigariza? Cank’ ibisuma vyogutahako mw ijoro ntivyokwoza uko bishaka?

¹⁰Ni ko nanje Esau namusize amēnya, natwikuruye ahinyegeje hiwe ngo ntāshobore kwinyegeza: uruvyaro rwiwe n’abo bavukana n’ababanyi biwe barageseye, na we ubgiwe ntakiriho.

¹¹Siga abana bawe b’ impfuvyi, nzobazigama mbabesheho; abapfakazi bawe ni banyizigire.

¹²Kuk’ ukw ari k’Uhoraho agize, at’ Abāri batabereye kunywa kur’ ico gikombe ko batazobura kukinywa, none weho uzogenda udahanwe na gatoya? Eka ntuzogenda udahanwe, arik’ uzonywa nta kabuza.

¹³Kuko nirahiye ubganje, ni jewe Uhoraho mbivuze, yukw i Bosira hazohinduka akajoreza n’igitutsi n’ ibitongozi n’ikivume; kand’ ibisagara vyaho vyose bizoba ibitongozi gushitsa ibihe bidashira.

¹⁴Numvise inkuru zivuye k’ Uhoraho, kandi har’ intumwa itumwe ku mahanga, ngo Mwikoranye muhatere, muhaguruke muje mu ntambara.

¹⁵Kuko rāba, nakugize ritoya ku yandi mahanga, n’inkēngērwa mu bantu.

¹⁶Gutera ubgoba kwawe n’ubgibone bgo mu mutima wawe vyaraguhenze, wewe uba mu bihoro vyo mu bitandara, wihase ku mpinga y’ umusozi: naho wokwārika icāri cawe hejuru iyo bigwa nk’inkukuma,[9] nzokumanura ngukūreyo, ni k’Uhoraho agize.

¹⁷Kandi Edomu hazohinduka akajoreza: ūzohaca wese azojorerwa, azovuza agahwa kubg’ ivyago vyaho vyose.

¹⁸Nk’ukw i Sodomu n’i Gomora vyabaye, igihe hākomvomvorwa, bo n’ibisagara bihereranye na ho, ni kw ata muntu azobayo, canke ngo hagire umwana w’umuntu azoba akihaba, ni k’Uhoraho agize.

¹⁹Eh’ azodūga nk’intambge ivuye kuri Yorodani iyo rwigize akagabo, ngw atere ahantu h’itsitsi hakomeye: ariko nzotuma ahahunga giturumbuka, kand’ uwo nzotoranya ni we nzoshinga ngw ahaganze: none ni nde ahwanye nanje? Kandi ni nde azonshingira igihe? Kandi ni nde mwungere yohangara guhagarara imbere yanje?

²⁰Nuko rero ni mwumve inama Uhoraho yarunduye kuri Edomu, n’imigabo yagabiye y’ivyo azogirira ababa i Temani: ati N’ukuri bazobakwega nk’imyagazi yo mu mukuku; n’ukuri azobagesezanya n’aho baba.

²¹Isi ihindishwa agashitsi no kwumva ugusenyerana kwabo; amarūru yabo yumvikana gushitsa ku Kiyaga Gitukura.

²²Eh’ azodūga aguruke nk’inkukuma, asānze amababa i Bosira: kand’ umutima w’abahizi b’i Edomu kur’ uwo musi uzohinduka nk’umutima w’ umugore ari ku bise.

²³Ivy’ i Damasiko. I Hamati haratēterewe, bo n’i Arupadi; kuko humvise inkuru mbi, harashonga: ku kiyaga hahagaritse umutima, ntihashobora gutēkāna.

²⁴I Damasiko haradendebukiwe, harakimiranye ngo hiruke, hafashwe n’agatengo: uburibge n’ umubabaro vyahafashe nk’umugore aramutswe.

²⁵Mbega n’ iki catumye igisagara c’ishimwe kitāzigurijwe, ca gisagara cannezereza?

²⁶Ni co gitumye imisore yaho izohindikirana mu nzira zaho, n’abahizi bose bazozibizwa kur’ uwo musi, ni jewe Uhoraho Nyen’ ingabo mbivuze.

²⁷Nzokwanda umuriro uruzitiro rw’i Damasiko, kand’ uzotongora ingoro za Beni‐hadadi.

²⁸Ivy’ i Kedari, n’ivy’ ibihugu vy’abami b’i Hazori, ivyo Nebukadineza umwami w’i Babuloni yahavuye atsinda. Uku ni k’Uhoraho agize, ati Ni muhaguruke mudūge i Kedari, munyage abantu b’i burasirazuba.

²⁹Bazonyaga amahema yabo n’ imikuku yabo, bazokwinyagira impuzu z’imikingo yabo n’ivy’ imbombovu vyabo vyose n’ingamiya zabo: kandi bazobabarira basemerera, bati Har’ ibiteye ubgoba irya n’ino.

³⁰Muhunge, mukwiragire kure, muje kuba ahigobetse, yemwe ababa i Hazori, ni k’Uhoraho agize; kuko Nebukadineza umwami w’i Babuloni yabahigiye imihigo, yarunduye imigabo y’ivy’ azobagirira.

³¹Ni muhaguruke mudūge, muje kw ihanga ryidibamiye, ryibereye aho ata co ryinona, ritagira imyugariro cank’ ibihindizo, ryibera aho ukwaryo, ni k’Uhoraho agize.

³²Ingamiya zabo zizoba iminyago, n’isinzi ry’ibitungwa vyabo rizoba inyagano: kandi nzoshwiragiriza mu birēre vyose abīca amasoso; nzobazanakw ivyago biturutse impande zose, ni jewe Uhoraho mbivuze.

³³Kand’ i Hazori hazoba i wabo w’imbgebge, n’ibitongozi vy’ibihe bidashira: nta muntu azobayo, cank’ umwana w’umuntu azoba akihaba.

³⁴Ijambo ry’Uhoraho ryaje kuri Yeremiya uwavugishwa na we, ku vya Elamu, igihe Zedekiya umwami w’i Buyuda yar’ agiye ku ngoma,

³⁵rit’ Uku ni k’ Uhoraho Nyen’ ingabo agize, at’ Ehe nzovuna umuheto w’i Elamu, ni wo binunu vy’ubuhizi bgaho.

³⁶Kandi nzohuruza kuri Elamu imiyaga ine iturutse ku mpande zine z’ijuru, mbashwiragirize mur’ ivyo birēre vyose; abirukanywe b’i Elamu nta hanga batazoshikamwo.

³⁷Nzotera Abelamu agatengo imbere y’abansi babo, n’imbere y’abarondera kubica: kandi nzobazanakw ivyago, ni vyo burake bganje bg’inkazi, ni jewe Uhoraho mbivuze; kandi nzorungika inkota ibakurikirane, gushitsa mbamaze.

³⁸Nzoshinga intebe yanje y’ubgami i Elamu, kandi nzohagesereza umwami n’ abaganwa baho, ni jewe Uhoraho mbivuze.

³⁹Yamara mu misi yo hanyuma nzotuma Abelamu bahindukira bave mu kinyago, ni jewe Uhoraho mbivuze.