Read Bibliya Yera 1951 Yeremiya 5 Bible Online

Yeremiya 5 - Bibliya Yera 1951 bible

Yeremiya 5

¹Ni mwiruke hirya no hino mu nzira z’i Yerusalemu, murondere mwitegereze, mucakare no mu hiyaguye haho, namba mwobona umuntu yoba umugororotsi arondera ivy’ ukuri, nanje nzohaharira.

²Naho barahira uguhoraho kw’Uhoraho, n’ukuri barahira ibinyoma.

³Mbeg’ Uhoraho, inyonga zawe ntizitegereza ivy’ ukuri? Warabakubise, ntibābibabara; warabatūbije, banka guhaha: bākomantaje mu maso habo gusumvya ibuye; banse kugaruka.

⁴Maze ndavuga, nt’ Erega n’ukw ari ba nyarucari: n’ibijuju, kuko batazi inzira y’Uhoraho, ntibamenye n’ukuroranya kw’Imana yabo.

⁵Reka nje ku bakuru, mvugane na bo; kuko bo bazi inzira y’Uhoraho, n’ukuroranya kw’Imana yabo. Ariko na bo nyene bāhūrije inama hamwe kuvuna ingōgo no gucagagura imvuto.

⁶Ni co gituma intambge yo mu kibira izobica, n’ibingira rigendagenda uko buhwibiriye rizobasahura, n’ingwe izotegera ku bisagara vyabo, maz’ ūbisokorokamwo wese atabagurwe; kuk’ ukugabitanya kwabo ari kwinshi, n’ugusubira inyuma kwabo kukaba kurenze urugero.

⁷Mbega noshobora nte kuguharira? Abana bawe barantaye, bīrahira izitar’ imana; mpejeje kubagaburira bagahāga, bāciye basambana, barema inteko i wabo w’abasambanyikazi.

⁸Bameze nk’impfizi z’amafarasi ahimvye yiruka irya n’ino, umuntu wese akaroherana, arondera umugore wa mugenzi we.

⁹Mbeg’ ivyo ntibizotuma nisidukira? ni k’Uhoraho abaza; mbeg’ ivyo umutima wanje ntuzobihōra ubgoko bumeze burtyo?

¹⁰Ni mwūrire ku nzitiro zaho, muhonnye; yamara ntimuherengeteze rwose: mukūreh’ amashami yaho, kukw atar’ ay’ Uhoraho.

¹¹Kukw inzu ya Isirayeli n’inzu ya Yuda zandyarutse rwose, ni k’Uhoraho agize.

¹²Bīhakanye Uhoraho, ngo Nta we; kandi ngo Nta vyago bizotuzako, nta n’inkota tuzobona cank’ amapfa;

¹³ngw Ivy’ abavugishwa n’Imana n’ibitwarwa n’umuyaga, kand’ ijambo ryayo ntiriri muri bo: ngw Ivyo babūra birakaba ari bo bigarukako.

¹⁴Nuko rero, uku ni k’Uhoraho agize, ni we Mana Nyen’ ingabo, ati Ko bavuga ben’ ayo magambo, ehe ngira mpindure amajambo yanje umuriro mu kanwa kawe, ubu bgoko na bgo ndabuhindure inkwi, ubatongore.

¹⁵Ehe ngira mbazanire ihanga rivuye kure, yemwe ab’ inzu ya Isirayeli, ni jewe Uhoraho mbivuze; n’ihanga rihambaye, n’ihanga ryamyeho kera, n’ihanga rivuga ururimi mutazi, mutoshobora no kwumva ico rivuga.

¹⁶Umutana wabo ni nk’imva irangaye, bose n’abantu b’abahizi.

¹⁷Bazorya ivyimburwa vyanyu n’ivyo kurya vyanyu, ivyo abahungu banyu n’abakobga banyu boriye; bazorya imikuku yanyu n’amasho yanyu; bazorya imizabibu yanyu n’imisukoni yanyu; kand’ ibisagara vyanyu vyubakiwe inzitiro, ivyo mwishimira, bazobisanganguza inkota.

¹⁸Yamara no mur’ iyo misi na ho sinzobaherengeteza rwose, ni jewe Uhoraho mbivuze.

¹⁹Maz’ igihe bazobaza, bati Mbeg’ Uhoraho Imana yacu ivyo vyose yabidukoreye ku ki? nawe ni ho uzobabarira, uti Nk’uko mwataye Imana, mugakorerera imana z’inyamahanga mu gihugu canyu, uko ni ko muzokorerera abanyamahanga mu gihugu kitar’ icanyu.

²⁰Mutāngāze ibi ku b’inzu ya Yakobo, muvyamamaze i Buyuda,

²¹mut’ Enda ni mwumve ibi, mwa bantu b’ibipfu, batagira umutima, bafise amaso ntibabone, bafise n’amatwi ntibumve:

²²muti Mbega nta n’ukuruha mumutinya? ni k’Uhoraho abajije; muti Nta guhindira agashitsi imbere yiwe, kand’ ari we yashinze umusenyi ng’ ubere ikiyaga akarimbi, ni co cagezwe kizokwamaho, ngo ntikikarēngāne? Mbere nah’ imipfunda yaco yosuriranya, ntiyowutsinda; naho yobomborana, ntiyowurēngāna.

²³Yamar’ ubu bgoko bgo bufise umutima ugarariza, ugābagāba; bāragararije, baracika.

²⁴Nta ho bīvuganya mu mitima, bat’ Enda twubahe Uhoraho Imana yacu, ni yo iduha imvura y’agatāsi n’iy’ urushana, nk’ukw ibihe bihaye ibindi; ni yo itugerera amayinga yashinzwe yo kwimburiramwo.

²⁵Mut’ Ibigabitanyo vyanyu ni vyo bibujije ivyo, kand’ ivyaha vyanyu ni vyo bibīmishije ivyiza.

²⁶Muti Kuko mu bantu biwe habonekamw’ abantu b’abanyakibi: baratega nk’ukw abatezi b’inyoni batega; batega umutego, bagafata abantu.

²⁷Nk’ukw igisamba cokwuzuzwa izo nyoni, ni kw amazu yabo yuzuyemw’ ibigungano: ni co catumye bacika abahambaye, bakaba abatunzi.

²⁸Bacitse ibisēme, barayagayaga; bakora ibibi vy’akarenzarugero: ntibabūrana impfuvyi mu manza ngo zibone kuroranirwa; kand’ urubanza rw’aboro ntibaruca.

²⁹Mbeg’ ivyo ntibizotuma nisidukira? ni jewe Uhoraho mbibajije; mbeg’ umutima wanje ntuzohōra ubgoko bumeze burtyo?

³⁰Habonetse ikintu c’akumiza giteye ubgoba mu gihugu:

³¹ba kamenyi bavuga ibinyoma, kandi n’abaherezi, uko baganza kwose bagukūra kuri bo; kand’ abantu banje ni co bakunda: mbega none muzokora iki kw iherezo ryavyo?